ਚੀਨ : ਕਮਿਊਨਿਸਟ ਪਾਰਟੀ ਦੇ ਸਾਬਕਾ ਅਧਿਕਾਰੀ ਨੂੰ ਰਿਸ਼ਵਤਖੋਰੀ ਮਾਮਲੇ 'ਚ ਸੁਣਾਈ ਗਈ ਮੌਤ ਦੀ ਸਜ਼ਾ

ਚੀਨ ਦੀ ਇੱਕ ਅਦਾਲਤ ਨੇ ਰਿਸ਼ਵਤਖੋਰੀ ਤੇ ਇਨਸਾਈਡਰ ਟ੍ਰੇਡਿੰਗ ਦੇ ਮਾਮਲੇ ਵਿਚ ਹਾਲ ਹੀ ਵਿਚ ਦੱਖਣੀ ਚੀਨ ਦੇ ਹੈਨਾਨ ਸੂਬੇ ਤੋਂ ਕਮਿਊਨਿਸਟ ਪਾਰਟੀ ਦੇ ਸਾਬਕਾ ਅਧਿਕਾਰੀ ਟੋਂਗ ਦਾਓਚੀ ਨੂੰ ਦੋ ਸਾਲ ਦੀ ਰਾਹਤ ਦੇ ਨਾਲ ਮੌਤ ਦੀ ਸਜ਼ਾ ਸੁਣਾਈ ਹੈ।

ਗੁਆਂਗਡੋਂਗ ਸੂਬੇ ਦੀ ਸ਼ੇਨਜ਼ੇਨ ਇੰਟਰਮੀਡੀਏਟ ਪੀਪਲਜ਼ ਕੋਰਟ ਨੇ 2 ਜੂਨ ਨੂੰ ਸਾਬਕਾ ਉੱਚ ਅਧਿਕਾਰੀ ਨੂੰ ਰਾਜਨੀਤਿਕ ਅਧਿਕਾਰਾਂ ਤੋਂ ਲਾਂਭੇ ਕਰਦੇ ਹੋਏ ਉਸ ਦੀ ਸਾਰੀ ਜਾਇਦਾਦ ਜ਼ਬਤ ਕਰਨ ਦੇ ਹੁਕਮ ਦਿੱਤੇ ਅਤੇ ਕਿਹਾ ਕਿ ਇਸ ਤੋਂ ਹੋਏ ਸਾਰੇ ਲਾਭਾਂ ਨੂੰ ਸਰਕਾਰੀ ਖਜ਼ਾਨੇ ਨੂੰ ਸੌਂਪ ਦਿੱਤਾ ਜਾਵੇ।

ਦਾਓਚੀ ਚੀਨ ਦੀ ਕਮਿਊਨਿਸਟ ਪਾਰਟੀ ਦੀ ਹੈਨਾਨ ਸੂਬਾਈ ਕਮੇਟੀ ਦੇ ਸਾਬਕਾ ਸਟੈਂਡਿੰਗ ਕਮੇਟੀ ਮੈਂਬਰ ਸਨ। ਇਸ ਤੋਂ ਇਲਾਵਾ ਉਹ ਚਾਈਨਾ ਸਕਿਓਰਿਟੀਜ਼ ਰੈਗੂਲੇਟਰੀ ਕਮਿਸ਼ਨ (ਸੀ. ਐੱਸ. ਆਰ. ਸੀ.) ਦਾ ਕੰਮਕਾਰ ਦੇਖ ਰਹੇ ਸਨ। ਕੋਰਟ ਨੇ ਕਿਹਾ ਕਿ ਟੋਂਗ ਨੇ 2004 ਤੇ 2020 ਵਿਚਕਾਰ ਸੀ. ਐੱਸ. ਆਰ. ਸੀ. ਤੇ ਹੈਨਾਨ ਵਿਚ ਕਈ ਅਹੁਦਿਆਂ 'ਤੇ ਰਹਿੰਦੇ ਹੋਏ ਕੰਪਨੀਆਂ ਦੀ ਲਿਸਟਿੰਗ, ਬਿਜ਼ਨੈੱਸ ਓਪਰੇਸ਼ਨ, ਫਾਇਨੈਂਸ ਬੋਰੋਇੰਗ ਤੇ ਪਰਸਨਲ ਪ੍ਰੋਮੋਸ਼ਨ ਵਿਚ ਮਦਦ ਕਰਨ ਵਰਗੇ ਕੰਮ ਕੀਤੇ, ਜਿਸ ਦੇ ਬਦਲੇ ਉਸ ਨੇ ਸਿੱਧੇ ਤੇ ਕਿਸੇ ਦੇ ਰਾਹੀਂ ਲਗਭਗ 41 ਮਿਲੀਅਨ ਅਮਰੀਕੀ ਡਾਲਰ ਧਨ ਤੇ ਗਿਫਟ ਦੇ ਰੂਪ ਵਿਚ ਲਏ।

ਇਸ ਤੋਂ ਇਲਾਵਾ ਇਨਸਾਈਡਰ ਟ੍ਰੇਡਿੰਗ ਜ਼ਰੀਏ ਉਸ ਨੇ 2006 ਤੇ 2007 ਦਰਮਿਆਨ 3.38 ਮਿਲੀਅਨ ਯੂਆਨ ਦਾ ਗੈਰ-ਕਾਨੂੰਨੀ ਲਾਭ ਕਮਾਇਆ ਸੀ।