ਕੈਨੇਡਾ ਦੀ ਸਾਬਕਾ ਵਿੱਤ ਮੰਤਰੀ ਨੇ ਮੈਂਬਰ ਪਾਰਲੀਮੈਂਟ ਵਜੋਂ ਦਿੱਤਾ ਅਸਤੀਫਾ

ਕੈਨੇਡਾ ਦੀ ਸਾਬਕਾ ਵਿੱਤ ਮੰਤਰੀ ਕ੍ਰਿਸਟੀਆ ਫ੍ਰੀਲੈਂਡ ਨੇ ਅੱਜ ਅਧਿਕਾਰਤ ਤੌਰ 'ਤੇ ਮੈਂਬਰ ਪਾਰਲੀਮੈਂਟ ਵਜੋਂ ਅਸਤੀਫਾ ਦੇ ਦਿੱਤਾ ਹੈ। ਉਹ ਹੁਣ ਯੂਕਰੇਨ ਦੀ ਸਰਕਾਰ ਨੂੰ ਸਲਾਹਕਾਰ ਵਜੋਂ ਆਪਣੀਆਂ ਸੇਵਾਵਾਂ ਦੇਣਗੇ।ਫ੍ਰੀਲੈਂਡ ਦੇ ਅਸਤੀਫੇ ਤੋਂ ਬਾਅਦ ਹਾਊਸ ਔਫ ਕਾਮਨਜ਼ ਵਿਚ ਲਿਬਰਲ ਪਾਰਟੀ ਕੋਲ ਹੁਣ 170 ਸੀਟਾਂ ਰਹਿ ਗਈਆਂ ਹਨ, ਜਦੋਂ ਕਿ ਵਿਰੋਧੀ ਧਿਰਾਂ ਕੋਲ ਕੁੱਲ 172 ਸੀਟਾਂ ਹਨ। ਇਸ ਵੇਲੇ ਕੰਜ਼ਰਵੇਟਿਵ ਕੋਲ 142, ਬਲਾਕ ਕਿਊਬੈਕਵਾ ਕੋਲ 22, ਐਨ.ਡੀ.ਪੀ. ਕੋਲ 7 ਅਤੇ ਗ੍ਰੀਨ ਪਾਰਟੀ ਕੋਲ ਇੱਕ ਸੀਟ ਹੈ।

ਹਾਲਾਂਕਿ, ਪਿਛਲੇ ਸਾਲ ਦੋ ਕੰਜ਼ਰਵੇਟਿਵ ਐਮ.ਪੀ. ਦੇ ਲਿਬਰਲ ਪਾਰਟੀ ਵਿਚ ਸ਼ਾਮਲ ਹੋਣ ਨਾਲ ਸਰਕਾਰ ਨੂੰ ਰਾਹਤ ਮਿਲੀ ਸੀ ਪਰ ਫ੍ਰੀਲੈਂਡ ਦੀ ਵਿਦਾਇਗੀ ਤੋਂ ਬਾਅਦ ਸਰਕਾਰ ਮੁੜ ਬਹੁਮਤ ਤੋਂ ਦੋ ਸੀਟਾਂ ਪਿੱਛੇ ਆ ਗਈ ਹੈ। ਫ੍ਰੀਲੈਂਡ ਪਿਛਲੇ ਇੱਕ ਦਹਾਕੇ ਤੋਂ ਟੋਰਾਂਟੋ ਦੀ ਯੂਨੀਵਰਸਿਟੀ-ਰੋਜ਼ਡੇਲ ਸੀਟ ਦੀ ਨੁਮਾਇੰਦਗੀ ਕਰ ਰਹੇ ਸਨ।

ਕੈਨੇਡਾ ਇਲੈਕਸ਼ਨ ਐਕਟ ਅਨੁਸਾਰ, ਸਪੀਕਰ ਨੂੰ ਖਾਲੀ ਸੀਟ ਦੀ ਸੂਚਨਾ ਮਿਲਣ ਤੋਂ ਬਾਅਦ 11 ਤੋਂ 180 ਦਿਨਾਂ ਦੇ ਅੰਦਰ ਚੋਣ ਕਰਵਾਉਣਾ ਲਾਜ਼ਮੀ ਹੈ। ਇਸ ਅਨੁਸਾਰ, ਜ਼ਿਮਨੀ ਚੋਣ ਦੀ ਪਹਿਲੀ ਸੰਭਾਵਨਾ ਮਾਰਚ ਵਿਚ ਬਣਦੀ ਹੈ। ਗੌਰਤਲਬ ਹੈ ਕਿ ਕ੍ਰਿਸਟੀਆ ਫ੍ਰੀਲੈਂਡ ਨੇ ਸਾਬਕਾ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੇ ਕਾਰਜਕਾਲ ਦੌਰਾਨ ਵਿੱਤ ਮੰਤਰੀ ਅਤੇ ਡਿਪਟੀ-ਪ੍ਰਧਾਨ ਮੰਤਰੀ ਵਰਗੇ ਅਹਿਮ ਅਹੁਦੇ ਸੰਭਾਲੇ ਸਨ।