ਕੈਲਗਰੀ ਡੇਅਕੇਅਰਜ਼ ਈ-ਕੋਲਾਈ ਮਾਮਲਾ, ਖਾਣਾ ਦੇਣ ਵਾਲੀ ਕੰਪਨੀ ਨੂੰ ਅੱਜ ਮਿਲ ਸਕਦੀ ਸਜ਼ਾ

ਕੈਲਗਰੀ ਡੇਅਕੇਅਰਜ਼ ਵਿਚ ਫੈਲੇ ਈ-ਕੋਲਾਈ ਬੈਕਟੀਰੀਆ ਦੇ ਮਾਮਲੇ ਵਿਚ ਫੂਡ ਸਪਲਾਈ ਕਰਨ ਵਾਲੀ ਵਪਾਰਕ ਰਸੋਈ ਦੇ ਔਫੀਸ਼ੀਅਲਜ਼ ਨੂੰ ਅੱਜ ਅਦਾਲਤ ਵਿਚ ਸਜ਼ਾ ਲਈ ਪੇਸ਼ ਕੀਤਾ ਜਾਣਾ ਹੈ। 2023 ਵਿਚ ਇਸ ਬੈਕਟੀਰੀਆ ਕਾਰਨ ਸੈਂਕੜੇ ਬੱਚੇ ਬੀਮਾਰ ਹੋ ਗਏ ਸਨ। ਫਿਊਲਿੰਗ ਮਾਈਂਡਜ਼ ਇਨਕੋਰਪੋਰੇਟਡ ਨੂੰ ਅਪ੍ਰੈਲ ਵਿਚ 4 ਅਪਰਾਧਾਂ ਲਈ ਦੋਸ਼ੀ ਠਹਿਰਾਇਆ ਗਿਆ ਸੀ।

ਕਰੀਬ 2 ਮਹੀਨਿਆਂ ਤੱਕ ਫੈਲੇ ਈ-ਕੋਲਾਈ ਕਾਰਨ 448 ਲੋਕ ਇਸ ਦੇ ਸ਼ਿਕਾਰ ਹੋਏ ਸਨ। ਇਨ੍ਹਾਂ ਵਿਚੋਂ ਇਕ ਬਾਲਗ ਅਤੇ 39 ਬੱਚਿਆਂ ਨੂੰ ਕਈ ਦਿਨਾਂ ਤੱਕ ਹਸਪਤਾਲ ਵਿਚ ਦਾਖਲ ਰਹਿਣਾ ਪਿਆ ਸੀ। ਵਕੀਲਾਂ ਵਲੋਂ $10,000 ਦਾ ਜੁਰਮਾਨਾ ਲਾਉਣ ਦੀ ਸਿਫਾਰਿਸ਼ ਕੀਤੀ ਗਈ ਹੈ।

ਐਲਬਰਟਾ ਹੈਲਥ ਸਰਵਿਸਿਜ਼ ਦੀ ਪਿਛਲੇ ਸਾਲ ਦੀ ਰਿਪੋਰਟ ਵਿਚ ਦੱਸਿਆ ਗਿਆ ਕਿ ਮੀਟ ਦੀ ਰੋਟੀ ਕਾਰਨ ਇਹ ਬੀਮਾਰੀ ਫੈਲੀ ਹੋਵੇਗੀ ਪਰ ਇਹ ਸਪੱਸ਼ਟ ਨਹੀਂ ਹੋਇਆ ਕਿ ਬੈਕਟੀਰੀਆ ਕਿਵੇਂ ਬਣਿਆ।