ਗਾਜ਼ੀਪੁਰ ਦੀ ਭਾਰਤ-ਪਾਕਿ ਬਾਰਡਰ ਨਾਲ ਤੁਲਨਾ ਕਰਦਿਆਂ ਵਿਰੋਧੀ ਧਿਰਾਂ ਵੱਲੋਂ ਲੋਕ ਸਭਾ ਦੇ ਸਪੀਕਰ ਨੂੰ ਖੇਤੀ ਕਾਨੂੰਨਾਂ 'ਤੇ ਗੱਲ ਕਰਨ ਦੀ ਮੰਗ

ਭਾਰਤ 'ਚ ਵੱਖੋ-ਵੱਖ ਵਿਰੋਧੀ ਧਿਰਾਂ ਦੇ ਐੱਮ ਪੀਜ਼ ਵੱਲੋਂ ਲੋਕ ਸਭਾ ਦੇ ਸਪੀਕਰ ਓਮ ਬਿਰਲਾ ਨੂੰ ਚਿੱਠੀ ਲਿਖ ਕੇ ਦਿੱਲੀ-ਗ਼ਾਜ਼ੀਪੁਰ ਬਾਰਡਰ ਦੇ ਹਾਲਾਤ ਦੀ ਤੁਲਨਾ ਭਾਰਤ-ਪਾਕਿਸਤਾਨ ਦੇ ਹਾਲਾਤ ਨਾਲ ਕਰਦਿਆਂ ਖੇਤੀ ਕਾਨੂੰਨਾਂ ਦੇ ਮੁੱਦੇ 'ਤੇ ਵੱਖਰੇ ਤੌਰ 'ਤੇ ਗੱਲ-ਬਾਤ ਦੀ ਮੰਗ ਕੀਤੀ ਗਈ ਹੈ|

ਇਸ ਚਿੱਠੀ 'ਚ ਐੱਮ ਪੀਜ਼ ਵੱਲੋਂ ਆਖਿਆ ਗਿਆ ਹੈ ਕਿ ਬਾਰਡਰਾਂ 'ਤੇ ਵੱਡੇ ਬੈਰੀਕੇਡ ਦੇ ਨਾਲ ਨਾਲ ਕੰਡਿਆਲੀ ਤਾਰ ਲੈ ਗਈ ਹੈ, ਇਸਦੇ ਨਾਲ ਹੀ ਪੱਕੀ ਵਾੜ ਕਰ ਦਿੱਤੀ ਗਈ ਹੈ, ਜਿਸ ਨਾਲ ਉੱਥੇ ਭਾਰਤ-ਪਾਕਿਸਤਾਨ ਦੇ ਬਾਰਡਰ ਵਰਗਾ ਨਜ਼ਰ ਆ ਰਿਹਾ ਹੈ|

ਇਸ ਚਿੱਠੀ 'ਤੇ ਕੇ ਕਨਿਮੋਜ਼ੀ (ਡੀਐੱਮਕੇ), ਪ੍ਰੋਫ਼ ਸੌਗਾਤ ਰਾਏ (ਏਆਈਟੀਸੀ ), ਸੁਪ੍ਰੀਆ ਸੂਲ (ਐਨਸੀਪੀ), ਹਰਸਿਮਰਤ ਕੌਰ ਬਾਦਲ (ਸ਼੍ਰੋ ਅ ਦ ), ਐੱਨਕੇ ਪ੍ਰੇਮਚੰਦਰਨ (ਆਰ ਐੱਸ ਪੀ), ਤਿਰੁਚੀ ਸਿਵਾ (ਡੀ ਐੱਮ ਕੇ), ਏ ਐੱਮ ਆਰਿਫ਼ (ਸੀਪੀਆਈ-ਐਮ), ਐੱਸ ਵੈਂਕਟੇਸ਼ਨ (ਸੀਪੀਆਈ-ਐੱਮ), ਐੱਮ ਸੇਲਵਰਾਜ (ਸੀਪੀਆਈ), ਡਾ. ਹਸਨੈਨ ਮਸੂਦੀ (ਐਨਸੀ), ਟੀ ਥਿਰੁਮਵਾਲਵਨ (ਵੀਸੀ) ਅਤੇ ਰਵੀ ਕੁਮਾਰ (ਵੀਸੀਕੇ) ਵੱਲੋਂ ਦਸਤਖ਼ਤ ਕੀਤੇ ਗਏ ਹਨ|

ਦੱਸਣਯੋਗ ਹੈ ਕਿ ਬੀਤੇ ਕੱਲ, ਵਿਰੋਧੀ ਧਿਰ ਦੇ ਨੇਤਾਵਾਂ ਨੂੰ ਗਾਜ਼ੀਪੁਰ ਬਾਰਡਰ 'ਤੇ ਧਰਨੇ 'ਤੇ ਬੈਠੇ ਕਿਸਾਨਾਂ ਨੂੰ ਮਿਲਣ ਲਈ ਨਹੀਂ ਜਾਣ ਦਿੱਤਾ ਗਿਆ|

ਨੈਸ਼ਨਲਿਸਟ ਕਾਂਗਰਸ ਪਾਰਟੀ (ਐੱਨਸੀਪੀ) ਤੋਂ ਐੱਮ ਪੀ ਸੁਪ੍ਰੀਆ ਸੂਲ ਨੇ ਕਿਹਾ,"ਅਸੀਂ ਗਾਜ਼ੀਪੁਰ ਬਾਰਡਰ 'ਤੇ ਵਿਰੋਧ ਕਰ ਰਹੇ ਕਿਸਾਨਾਂ ਨੂੰ ਮਿਲਣ ਗਏ ਸੀ ਖ਼ਾਸਕਰ ਔਰਤਾਂ ਅਤੇ ਬੱਚਿਆਂ ਨੂੰ ਮਿਲਣ ਪਰ ਪੁਲਿਸ ਨੇ ਜਾਣ ਨਹੀਂ ਦਿੱਤਾ| ਕੀ ਅਸੀਂ ਪੁਲਿਸ ਰਾਜ 'ਚ ਰਹਿ ਰਹੇ ਹਾਂ, ਜਿੱਥੇ ਚੁਣੇ ਗਏ ਐਮਪੀਸ ਕਿਸਾਨਾਂ ਨੂੰ ਮਿਲਣ ਨਹੀਂ ਦਿੱਤੇ ਜਾਂਦੇ?"

ਉਹਨਾਂ ਆਖਿਆ,"ਸਾਨੂੰ ਲਗਾਤਾਰ ਉਨ੍ਹਾਂ ਦੇ ਬੁਰੇ ਹਾਲਾਤ ਬਾਰੇ ਸੁਨੇਹੇ ਮਿਲ ਰਹੇ ਹਨ ਅਤੇ ਜੋ ਅਸੀਂ ਵੇਖਿਆ, ਉਹ ਡਰਾਉਣ ਵਾਲਾ ਸੀ| ਜੋ ਹਾਲਾਤ ਉੱਥੇ ਬਣਾਏ ਜਾ ਰਹੇ ਹਨ, ਉਹ ਮੁਲਕ ਦੇ ਹਿੱਤ 'ਚ ਨਹੀਂ ਹਨ|"

ਉਹਨਾਂ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਮੁੱਦੇ ਦਾ ਹੱਲ ਗੱਲ-ਬਾਤ ਰਾਹੀਂ ਕੱਢਿਆ ਜਾਣਾ ਚਾਹੀਦਾ ਹੈ, ਅਜਿਹੀਆਂ ਕੋਸ਼ਿਸ਼ਾਂ ਨਾਲ ਹੀ ਹੱਲ ਨਿਕਲੇਗਾ|
ਗ਼ੌਰਤਲਬ ਹੈ ਕਿ ਕਿਸਾਨ ਬੀਤੇ ਸਾਲ 26 ਜਨਵਰੀ ਤੋਂ ਦਿੱਲੀ ਦੀਆਂ ਸਰਹੱਦਾਂ 'ਤੇ ਭਾਰਤ ਸਰਕਾਰ ਵਲੋਂ ਪਾਸ ਕੀਤੇ ਤਿੰਨ ਖੇਤੀ ਬਿੱਲਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ|