ਸਰੀ 'ਚ ਹੋਈ ਗੋਲੀਬਾਰੀ ਤੋਂ ਬਾਅਦ ਕੰਜ਼ਰਵੇਟਿਵ ਵਿਧਾਇਕਾਂ ਨੇ ਫਿਰ ਬਿਆਨ ਜਾਰੀ ਕਰ ਕਾਰਵਾਈ ਦੀ ਕੀਤੀ ਮੰਗ

ਸਰੀ ਦੇ ਪੈਨੋਰਮਾ ਰਿਜ ਇਲਾਕੇ ਵਿਚ ਇੱਕ ਘਰ 'ਤੇ ਹੋਈ ਗੋਲੀਬਾਰੀ ਵਿਚ ਫਿਰੌਤੀ ਦੇ ਲਿੰਕ ਦਾ ਖੁਲਾਸਾ ਹੋਣ ਮਗਰੋਂ ਬੀਸੀ ਕੰਜ਼ਰਵੇਟਿਵ ਪਾਰਟੀ ਦੇ ਵਿਧਾਇਕਾਂ ਨੇ ਸਰਕਾਰ ਤੋਂ ਇਸ ਮਾਮਲੇ ਵਿਚ ਤਤਕਾਲ ਐਕਸ਼ਨ ਦੀ ਮੰਗ ਕੀਤੀ ਹੈ।ਕੰਜ਼ਰਵੇਟਿਵ ਦੇ ਅਟਾਰਨੀ ਜਨਰਲ ਆਲੋਚਕ ਸਟੀਵ ਕੂਨਰ ਨੇ ਕਿਹਾ ਕਿ ਇਹ ਮਾਮਲਾ ਕਾਫੀ ਗੰਭੀਰ ਹੈ।

ਪੁਲਿਸ ਨਿਗਰਾਨੀ ਦੇ ਬਾਵਜੂਦ ਘਰ 'ਤੇ ਦੋ ਵਾਰ ਦਰਜਨਾਂ ਗੋਲੀਆਂ ਚਲਾਈਆਂ ਗਈਆਂ, ਸਰੀ ਪੁਲਿਸ ਵਲੋਂ ਇਸ ਮਾਮਲੇ ਦੀ ਜਾਂਚ ਸੰਗਠਿਤ ਅਪਰਾਧਿਕ ਜਬਰਨ ਵਸੂਲੀ ਵਜੋਂ ਕੀਤੀ ਜਾ ਰਹੀ ਹੈ। ਸਰੀ ਪੈਨੋਰਮਾ ਤੋਂ ਕੰਜ਼ਰਵੇਟਿਵ ਵਿਧਾਇਕ ਬ੍ਰਾਇਨ ਨੇ ਬੀਸੀ ਐੱਨਡੀਪੀ 'ਤੇ ਵਰ੍ਹਦਿਆਂ ਕਿਹਾ ਕਿ ਸਰਕਾਰ ਦੀ ਨਾਕਾਮੀ ਅਤੇ ਅਦਾਲਤਾਂ ਦੀ ਕਮਜ਼ੋਰੀ ਨੇ ਅਰਜਾਕਤਾ ਵਿਚ ਵਾਧਾ ਕੀਤਾ ਹੈ, ਜਿਸ ਨਾਲ ਸੰਗਠਿਤ ਅਪਰਾਧ ਬੇਲਗਾਮ ਹੋ ਗਿਆ ਹੈ।

ਉਨ੍ਹਾਂ ਕਿਹਾ ਕਿ ਅਪਰਾਧੀਆਂ ਨੂੰ ਪੁਲਿਸ ਦਾ ਕੋਈ ਡਰ ਨਹੀਂ ਹੈ ਕਿਉਂਕਿ ਉਹਨਾਂ ਨੂੰ ਪਤਾ ਹੈ ਕਿ ਜੇ ਗ੍ਰਿਫਤਾਰੀ ਹੋ ਵੀ ਗਈ ਤਾਂ ਉਹਨਾਂ ਨੂੰ ਕੋਈ ਮਿਸਾਲੀ ਨਤੀਜਾ ਨਹੀਂ ਭੁਗਤਣਾ ਪਵੇਗਾ। ਰਿਚਮੰਡ-ਕਵੀਨਜ਼ਬਰੋ ਤੋਂ ਵਿਧਾਇਕ ਸਟੀਵ ਕੂਨਰ ਨੇ ਕਿਹਾ ਕਿ ਸੂਬਾ ਸਰਕਾਰ ਦੀ ਅਜਿਹੇ ਮਾਮਲਿਆਂ ਵਿਚ ਚੁੱਪੀ ਖ਼ਤਰਨਾਕ ਹੈ।