ਕੰਜ਼ਰਵੇਟਿਵ ਅਤੇ ਬਲਾਕ ਕਿਊਬੈਕਵਾ ਵਲੋਂ ਫੈਡਰਲ ਬਜਟ ਦਾ ਵਿਰੋਧ

ਕੰਜ਼ਰਵੇਟਿਵ ਅਤੇ ਬਲਾਕ ਕਿਊਬੈਕਵਾ ਵਲੋਂ ਲਿਬਰਲ ਸਰਕਾਰ ਦੇ ਬਜਟ ਦਾ ਸਮਰਥਨ ਨਹੀਂ ਕੀਤਾ ਜਾਵੇਗਾ। ਪੀਅਰ ਪੌਲੀਐਵ ਨੇ ਇਸ ਨੂੰ ਮਹਿੰਗਾਈ ਵਧਾਉਣ ਵਾਲਾ ਬਜਟ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ 'ਅਸੀਂ ਕੰਜ਼ਰਵੇਟਿਵ ਇਸ ਮਹਿੰਗੇ ਲਿਬਰਲ ਬਜਟ ਦਾ ਸਮਰਥਨ ਨਹੀਂ ਕਰ ਸਕਦੇ।

ਪੌਲੀਐਵ ਨੇ ਕਿਹਾ ਕਿ ਉਹ ਕੈਨੇਡੀਅਨਜ਼ ਦੀ ਲਾਈਫ ਨੂੰ ਕਿਫਾਇਤੀ ਬਣਾਉਣ ਲਈ ਕਿਫਾਇਤੀ ਬਜਟ ਚਾਹੁੰਦੇ ਸਨ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਕੈਨੇਡਾ ਨੂੰ ਵਾਪਸ ਕਿਫਾਇਤੀ ਬਣਾਉਣ ਦੇ ਉਦੇਸ਼ ਨਾਲ ਬਜਟ ਵਿਚ ਇੱਕ ਸੋਧ ਲਈ ਪ੍ਰਸਤਾਵ ਪੇਸ਼ ਕਰੇਗੀ।

ਗੌਰਤਲਬ ਹੈ ਕਿ ਕੰਜ਼ਰਵੇਟਿਵ ਅਤੇ ਬਲਾਕ ਤਿੰਨ ਵਿਰੋਧੀ ਪਾਰਟੀਆਂ ਵਿਚੋਂ ਦੋ ਵੱਡੀਆਂ ਪਾਰਟੀਆਂ ਹਨ ਜਿਨ੍ਹਾਂ ਕੋਲ ਸਦਨ ਵਿਚ ਕਾਫ਼ੀ ਸੀਟਾਂ ਹਨ ਜੋ ਕਾਰਨੀ ਦੀ ਘੱਟ ਗਿਣਤੀ ਸਰਕਾਰ ਨੂੰ ਬਜਟ ਪਾਸ ਕਰਨ ਵਿਚ ਮਦਦ ਕਰ ਸਕਦੀਆਂ ਹਨ ਪਰ ਹੁਣ ਸਰਕਾਰ ਕੋਲ ਐਨ.ਡੀ.ਪੀ.ਹੀ ਇੱਕੋ-ਇੱਕ ਵਿਕਲਪ ਬਚਿਆ ਹੈ ਅਤੇ ਅਜੇ ਉਸ ਨੂੰ ਆਪਣੇ ਪੱਤੇ ਨਹੀਂ ਖੋਲ੍ਹੇ ਹਨ। ਹਾਲਾਂਕਿ,ਬਜਟ ਦਾ ਸਮਰਥਨ ਕਰਨ ਦੀ ਸੰਭਾਵਨਾ ਦਾ ਰਾਹ ਖੁੱਲ੍ਹਿਆ ਰੱਖਿਆ ਹੈ,ਜਿਸ ਨਾਲ 2025 ਵਿਚ ਦੁਬਾਰਾ ਚੋਣਾਂ ਹੋਣ ਨੂੰ ਰੋਕਿਆ ਜਾ ਸਕਦਾ ਹੈ। ਬਜਟ 'ਤੇ ਵੋਟਿੰਗ 17 ਨਵੰਬਰ ਨੂੰ ਹੋਣ ਦੀ ਉਮੀਦ ਹੈ।