11.5C Vancouver 11.5C VancouverApr 10, 2025 5:45 PM - Connect Newsroom
ਕੰਜ਼ਰਵੇਟਿਵ ਅਤੇ ਲਿਬਰਲ ਵਿਚਕਾਰ ਮੁਕਾਬਲਾ ਕਰੜਾ ਹੋ ਰਿਹਾ ਹੈ, ਚੋਣ ਮੁਹਿੰਮ ਦੇ 19ਵੇਂ ਦਿਨ ਵਿਚ ਦਾਖ਼ਲ ਹੋਣ ਵਿਚਕਾਰ ਦੋਵੇਂ ਪ੍ਰਮੁੱਖ ਧਿਰਾਂ ਵਿਚ ਮਹਿਜ 5 ਅੰਕਾਂ ਦਾ ਅੰਤਰ ਰਹਿ ਗਿਆ ਹੈ। ਲਗਭਗ ਇੱਕ ਹਫ਼ਤੇ ਪਹਿਲਾਂ ਲਿਬਰਲ ਲੀਡਰ ਮਾਰਕ ਕਾਰਨੀ ਨੂੰ ਪਸੰਦੀਦਾ ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ 'ਤੇ ਜੋ 20 ਅੰਕ ਦੀ ਬੜ੍ਹਤ ਹਾਸਲ ਸੀ, ਉਹ ਵੀ ਲਗਾਤਾਰ ਘਟੀ ਹੈ।
ਨੈਨੋ ਰਿਸਰਚ ਦੇ 9 ਅਪ੍ਰੈਲ ਤੱਕ ਦੇ ਤਿੰਨ ਦਿਨਾਂ ਟ੍ਰੈਕਿੰਗ ਸਰਵੇ ਮੁਤਾਬਕ, ਲਿਬਰਲ ਦੀ ਸਪੋਰਟ ਹੁਣ 43 ਫੀਸਦੀ 'ਤੇ ਹੈ, ਕੰਜ਼ਰਵੇਟਿਵ 38.1 ਫੀਸਦੀ 'ਤੇ ਆ ਗਏ ਹਨ ਅਤੇ ਐਨ.ਡੀ.ਪੀ. ਦਾ ਸਮਰਥਨ 9 ਫੀਸਦੀ ਨਾਲ ਸਿੰਗਲ ਅੰਕ ਵਿਚ ਬਣਿਆ ਹੋਇਆ ਹੈ। ਬਲਾਕ ਕਿਊਬੈਕਵਾ ਦਾ ਸਮਰਥਨ 6 ਫੀਸਦੀ 'ਤੇ ਹੈ।
ਨੈਨੋ ਮੁਤਾਬਕ, ਪ੍ਰੇਅਰੀਜ਼ ਯਾਨੀ ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਵਿਚ ਕੰਜ਼ਰਵੇਟਿਵ ਦਾ ਸਮਰਥਨ 55 ਫੀਸਦੀ ਹੈ, ਜਦੋਂ ਕਿ ਬ੍ਰਿਟਿਸ਼ ਕੋਲੰਬੀਆ ਵਿਚ ਲਿਬਰਲਸ ਨੂੰ 41 ਫੀਸਦੀ, ਕੰਜ਼ਰਵੇਟਿਵ ਨੂੰ 36 ਫੀਸਦੀ ਅਤੇ ਐੱਨ. ਡੀ. ਪੀ. ਨੂੰ 16 ਫੀਸਦੀ ਸਮਰਥਨ ਮਿਲਦਾ ਦਿਖਾਈ ਦੇ ਰਿਹਾ ਹੈ। ਪਸੰਦੀਦਾ ਪ੍ਰਧਾਨ ਮੰਤਰੀ ਦੇ ਰੂਪ ਵਿਚ ਕਾਰਨੀ ਅਤੇ ਪੌਲੀਐਵ ਵਿਚਕਾਰ ਫਾਸਲਾ ਹੁਣ 12 ਅੰਕ ਦਾ ਹੈ।
