ਕੰਜ਼ਰਵੇਟਿਵ ਨੇ ਆਪਣੇ ਨਜ਼ਦੀਕੀ ਸਾਥੀ ਦੇ ਕਤਲ ਨੂੰ ਫਰਸਟ ਡਿਗਰੀ ਅਪਰਾਧ ਬਣਾਉਣ ਲਈ ਬਿੱਲ ਕੀਤਾ ਪੇਸ਼

ਕੰਜ਼ਰਵੇਟਿਵ ਨੇ ਨਜ਼ਦੀਕੀ ਸਾਥੀ ਦੇ ਕਤਲ ਨੂੰ ਫਰਸਟ ਡਿਗਰੀ ਦਾ ਕ੍ਰਾਈਮ ਬਣਾਉਣ ਸਬੰਧੀ ਅੱਜ ਹਾਊਸ ਔਫ ਕਾਮਨਜ਼ ਵਿਚ ਇੱਕ ਪ੍ਰਾਈਵੇਟ ਮੈਂਬਰ ਬਿੱਲ ਪੇਸ਼ ਕੀਤਾ ਹੈ। ਕੰਜ਼ਰਵੇਟਿਵ ਪਾਰਟੀ ਦੇ ਪਬਲਿਕ ਸੇਫਟੀ ਆਲੋਚਕ ਫਰੈਂਕ ਕੈਪੂਟੋ ਨੇ ਕਿਹਾ ਕਿ ਇਹ ਕਾਨੂੰਨ ਜੱਜਾਂ ਲਈ ਇੱਕ ਨਵੀਂ ਵਿਵਸਥਾ ਵੀ ਬਣਾਏਗਾ, ਜਿਸ ਤਹਿਤ ਉਹ ਨਜ਼ਦੀਕੀ ਸਾਥੀ 'ਤੇ ਹਮਲਾ ਕਰਨ ਵਾਲੇ ਆਰੋਪੀ ਅਤੇ ਰਿਹਾਅ ਹੋ ਚੁੱਕੇ ਦੋਸ਼ੀ ਦੀ ਜ਼ਮਾਨਤ ਦਾ ਮੁਲਾਂਕਣ ਕਰਨ ਦਾ ਆਦੇਸ਼ ਦੇ ਸਕਣਗੇ।

ਕੈਪੂਟੋ ਨੇ ਕਿਹਾ ਕਿ ਇਹ ਕਾਨੂੰਨ ਅਜਿਹੇ ਅਪਰਾਧਾਂ ਨਾਲ ਠੀਕ ਉਸੇ ਤਰ੍ਹਾਂ ਨਜਿੱਠੇਗਾ ਜਿਸ ਤਰ੍ਹਾਂ ਕ੍ਰਿਮੀਨਲ ਕੋਡ ਮੌਜੂਦਾ ਸਮੇਂ ਕਿਸੇ ਪੀਸ ਔਫੀਸਰ ਦੀ ਹੱਤਿਆ ਨਾਲ ਨਜਿੱਠਦਾ ਹੈ।

ਕੰਜ਼ਰਵੇਟਿਵ ਪਾਰਟੀ ਨੇ ਇੱਕ ਪ੍ਰੈਸ ਰਿਲੀਜ਼ ਵਿਚ ਕਿਹਾ ਕਿ ਇਸ ਦੇ ਕਾਨੂੰਨ ਬਣਨ 'ਤੇ ਇੰਟੀਮੇਟ ਸਹਿਭਾਗੀ ਹਿੰਸਾ ਦੇ ਦੋਸ਼ੀ ਲੋਕਾਂ ਨੂੰ ਰਿਸਕ ਅਸੈਸਮੈਂਟ ਦੇ ਆਧਾਰ 'ਤੇ ਕਿਸੇ ਵੀ ਸਮੇਂ ਹਿਰਾਸਤ ਵਿਚ ਲਿਆ ਜਾ ਸਕਦਾ ਹੈ। ਕੈਪੂਟੋ ਨੇ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਇਸ ਹਿੰਸਾ ਖਿਲਾਫ ਨਕੇਲ ਕੱਸਣ ਲਈ ਲਿਬਰਲਸ ਤੋਂ ਇਸ ਬਿੱਲ ਨੂੰ ਤੇਜ਼ੀ ਨਾਲ ਪਾਸ ਕਰਨ ਵਿਚ ਮਦਦ ਕਰਨ ਦੀ ਉਮੀਦ ਕਰਦੀ ਹੈ।