ਕੋਕੁਇਟਲਮ ’ਚ ਬੀਤੇ ਦਿਨ ਲੱਗੀ ਅੱਗ, ਪੁਲਿਸ ਵਲੋਂ ਕੀਤੀ ਜਾ ਰਹੀ ਜਾਂਚ

ਕੋਕੁਇਟਲਮ ਦੇ ਨਾਰਥ ਰੋਡ ’ਤੇ ਪੈਂਦੇ ਸਟ੍ਰਿਪ ਮਾਲ ਵਿਚ ਬੀਤੇ ਦਿਨ ਲੱਗੀ ਅੱਗ ਦੇ ਮਾਮਲੇ ਵਿਚ ਪੁਲਿਸ ਵਲੋਂ ਜਾਂਚ ਕੀਤੀ ਜਾ ਰਹੀ ਹੈ। ਔਫੀਸਰਜ਼ ਅਤੇ ਫਾਇਰ ਫਾਈਟਰਜ਼ ਨੂੰ ਸਵੇਰੇ ਕਰੀਬ 6 ਵਜੇ 341 ਨਾਰਥ ਰੋਡ ਦੇ ਪਲਾਜ਼ਾ ਵਿਚ ਮਦਦ ਲਈ ਬੁਲਾਇਆ ਗਿਆ ਸੀ।

ਜਦ ਔਫੀਸਰਜ਼ ਇੱਥੇ ਪੁੱਜੇ ਤਾਂ ਉਨ੍ਹਾਂ ਦੇਖਿਆ ਕਿ ਇਸ ਦੇ ਇਕ ਯੂਨਿਟ ਵਿਚੋਂ ਧੂੰਆਂ ਨਿਕਲ ਰਿਹਾ ਸੀ ਕੁਝ ਹੀ ਪਲਾਂ ਵਿਚ ਅੱਗ ਫੈਲ ਗਈ ਅਤੇ ਪਾਰਕਿੰਗ ਲਾਟ ਵੱਲ ਕੱਚ ਟੁੱਟ ਕੇ ਡਿਗਣ ਲੱਗ ਗਏ। ਮੰਨਿਆ ਜਾ ਰਿਹਾ ਹੈ ਕਿ ਯੂਨਿਟ ਅੰਦਰ ਧਮਾਕਾ ਹੋਇਆ ਹੋਵੇਗਾ। ਇਸ ਕਾਰਨ ਬਹੁਤ ਸਾਰੇ ਕਾਰੋਬਾਰ ਪ੍ਰਭਾਵਿਤ ਹੋਏ ਪਰ ਕਿਸੇ ਦੇ ਵੀ ਜ਼ਖਮੀ ਹੋਣ ਤੋਂ ਬਚਾਅ ਰਿਹਾ।

ਇਕ ਕਾਰੋਬਾਰ ਦੇ ਮਾਲਕ ਨੇ ਦੱਸਿਆ ਕਿ ਉਸ ਦਾ ਇਕ ਕਰਮਚਾਰੀ ਅੰਦਰ ਸੀ ਪਰ ਉਸ ਨੂੰ ਸਮੇਂ ਸਿਰ ਬਾਹਰ ਕੱਢ ਲਿਆ ਗਿਆ। ਸਟ੍ਰਿਪ ਮਾਲ ਵਿਚ ਕਾਫੀ ਸ਼ਾਪ, ਆਪਟੋਮੈਟਰੀ ਕਲੀਨਿਕ, ਹੇਅਰ ਸੈਲੂਨ ਅਤੇ ਰੀਅਲਟਰ ਦਾ ਦਫ਼ਤਰ ਹਨ। ਜਾਂਚ ਅਧਿਕਾਰੀਆਂ ਵਲੋਂ ਅੱਗ ਲੱਗਣ ਦੇ ਕਾਰਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।