ਅੱਤਵਾਦ ਦੇ ਦੋਸ਼ੀ ਵੱਲੋਂ ਜੇਲ ਵਿੱਚ ਕੈਦੀਆਂ ਵੱਲੋਂ ਜ਼ਬਰਦਸਤੀ 'ਜੈ ਸ਼੍ਰੀ ਰਾਮ' ਦੇ ਨਾਅਰੇ ਲਵਾਉਣ ਦੇ ਦਾਅਵੇ 'ਤੇ ਅਦਾਲਤ ਨੇ ਤਿਹਾੜ ਜੇਲ ਨੂੰ ਜਵਾਬ ਦੇਣ ਲਈ ਆਖਿਆ

ਦਿੱਲੀ ਦੀ ਇੱਕ ਖ਼ਾਸ ਐੱਨਆਈਏ ਅਦਾਲਤ ਨੇ, ਸ਼ੁੱਕਰਵਾਰ ਨੂੰ ਅੱਤਵਾਦ ਦੇ ਇਲਜ਼ਾਮ ਹੇਠ ਤਿਹਾੜ ਜੇਲ ਵਿੱਚ ਬੰਦ ਇੱਕ ਸ਼ਖਸ ਦੇ ਇਸ ਦਾਅਵੇ ਕਿ ਉਸਨੂੰ ਜੇਲ ਵਿੱਚ ਦੂਜੇ ਕੈਦੀਆਂ ਵੱਲੋਂ ਕੁੱਟਿਆ ਗਿਆ ਅਤੇ 'ਜੈ ਸ਼੍ਰੀ ਰਾਮ' ਦੇ ਨਾਅਰੇ ਲਾਉਣ ਲਈ ਜ਼ਬਰਦਸਤੀ ਕੀਤੀ ਗਈ 'ਤੇ ਤਿਹਾੜ ਜੇਲ ਦੇ ਅਧਿਕਾਰੀਆਂ ਨੂੰ ਜਵਾਬ ਦੇਣ ਲਈ ਆਖਿਆ ਹੈ ਅਤੇ ਸੁਪ੍ਰਿੰਟੈਂਡੈਂਟ ਨੂੰ ਇਸ ਮਾਮਲੇ ਵਿੱਚ ਸਹੀ ਦਿਸ਼ਾ ਵਿੱਚ ਕਾਰਵਾਈ ਕਰਨ ਲਈ ਹੁਕਮ ਦਿੱਤੇ ਹਨ।

ਖ਼ਾਸ ਐੱਨਆਈਏ ਜੱਜ ਪ੍ਰਵੀਨ ਸਿੰਘ ਨੇ ਤਿਹਾੜ ਜੇਲ ਦੇ ਜਵਾਬਦੇਹ ਅਧਿਕਾਰੀ ਤੋਂ ਇਨ੍ਹਾਂ ਇਲਜ਼ਾਮਾਂ 'ਤੇ ਜਵਾਬ ਦੇਣ ਅਤੇ 14 ਜੂਨ ਤੱਕ ਮਾਮਲੇ ਦਾ ਹੱਲ ਕੱਢਣ ਦੀ ਹਦਾਇਤ ਦਿੱਤੀ ਹੈ।

ਦੱਸਣਯੋਗ ਹੈ ਕਿ ਵਕੀਲ ਐੱਮਐੱਸ ਖ਼ਾਨ ਅਤੇ ਕੁਆਸਰ ਖ਼ਾਨ ਵੱਲੋਂ ਦਾਖ਼ਲ ਕੀਤੀ ਅਰਜ਼ੀ 'ਤੇ ਕੌਂਸਲ ਨੇ ਅਦਾਲਤ ਨੂੰ ਆਖਿਆ ਹੈ ਕਿ ਦੋਸ਼ੀ ਰਸ਼ੀਦ ਜ਼ਫ਼ਰ ਨੂੰ ਜੇਲ ਵਿੱਚ ਕੈਦੀਆਂ ਵੱਲੋਂ ਕੁੱਟਿਆ ਗਿਆ ਅਤੇ ਦੂਜੇ ਧਰਮ ਦੇ ਧਾਰਮਿਕ ਨਾਅਰੇ ਲਾਉਣ ਲਈ ਜ਼ਬਰਦਸਤੀ ਕੀਤੀ ਗਈ।

ਵਕੀਲਾਂ ਵੱਲੋਂ ਪਹਿਲਾਂ ਅਦਾਲਤ ਨੂੰ ਆਖਿਆ ਗਿਆ ਕਿ ਇਹ ਮਾਮਲਾ ਬੇਨਤੀਕਰਤਾ/ਦੋਸ਼ੀ ਜ਼ਫ਼ਰ ਵੱਲੋਂ ਤਿਹਾੜ ਜੇਲ ਤੋਂ ਆਪਣੇ ਪਿਤਾ ਨੂੰ ਟੈਲੀਫ਼ੋਨ ਕਰਕੇ ਦੱਸਿਆ ਗਿਆ।

ਜ਼ਫ਼ਰ ਦੇ ਵਕੀਲ ਨੇ ਆਖਿਆ ਕਿ ਉਹ ਕੇਂਦਰੀ ਤਿਹਾੜ ਜੇਲ ਵਿੱਚ ਹੈ ਅਤੇ ਇਸਲਈ ਉਹਨਾਂ ਨੇ ਅਦਾਲਤ ਨੂੰ ਨਿਆਂ ਲਈ ਬੜੇ ਹੀ ਆਦਰ ਸਾਹਿਤ ਬੇਨਤੀ ਕੀਤੀ ਹੈ ਕਿ ਇਸ ਮਾਮਲੇ ਨੂੰ ਸੁਲਝਾਉਣ ਲਈ ਜੇਲ ਦੇ ਸੁਪ੍ਰਿੰਟੈਂਡੈਂਟ ਨੂੰ ਹਦਾਇਤਾਂ ਦਿੱਤੀਆਂ ਜਾਣ।

ਗ਼ੌਰਤਲਬ ਹੈ ਕਿ ਜ਼ਫ਼ਰ ਨੂੰ ਸਾਲ 2018 ਵਿੱਚ ਐੱਨਆਈਏ ਵੱਲੋਂ ਦਿੱਲੀ ਪੁਲਿਸ ਦੇ ਖ਼ਾਸ ਸੈੱਲ ਦੇ ਸਹਿਯੋਗ ਅਤੇ ਉੱਤਰ ਪ੍ਰਦੇਸ਼ ਪੁਲਸ ਦੀ ਅੱਤਵਾਦ-ਰੋਕੂ ਦਸਤੇ ਵੱਲੋਂ ਦਿੱਲੀ ਦੇ ਜਾਫ਼ਰਾਬਾਦ, ਸੀਲਮਪੁਰ 'ਚ 6 ਥਾਈਂ ਅਤੇ ਉੱਤਰ ਪ੍ਰਦੇਸ਼ ਵਿੱਚ 11 ਥਾਵਾਂ 'ਤੇ ਛਾਪੇ ਮਾਰ ਕੇ ਗਿਰਫ਼ਤਾਰ ਕੀਤਾ ਗਿਆ ਸੀ।