17.97C Vancouver 17.97C VancouverApr 26, 2021 10:18 AM -
ਅਮਰੀਕਾ ਤੋਂ ਕੋਵਿਡ-19 ਨਾਲ ਸਬੰਧਤ ਸਿਹਤ ਸੰਕਟ ਵਿਚ ਘਿਰੇ ਭਾਰਤ ਲਈ ਗਲੋਬਲ ਪੱਧਰ 'ਤੇ ਮਿਲ ਰਹੇ ਸਹਿਯੋਗ ਦੇ ਤਹਿਤ ਅੱਜ ਸੋਮਵਾਰ ਨੂੰ 318 ਆਕਸੀਜਨ ਕੰਸਨਟ੍ਰੇਟਰ ਦਿੱਲੀ ਹਵਾਈ ਅੱਡੇ 'ਤੇ ਪੁੱਜੇ।
ਕੇਂਦਰੀ ਮੰਤਰੀ ਹਰਦੀਪ ਸਿੰਘ ਪੂਰੀ ਨੇ ਟਵੀਟ ਕਰਦਿਆਂ ਆਖਿਆ,"ਭਾਰਤ ਇਸ ਮਹਾਮਾਰੀ ਨਾਲ ਲੜਨ ਦੀਆਂ ਕੋਸ਼ਿਸ਼ਾਂ ਨੂੰ ਹੋਰ ਮਜ਼ਬੂਤ ਕਰ ਰਿਹਾ ਹੈ। @airindiainflight ਜੇਐੱਫਕੇ ਏਅਰਪੋਰਟ ਤੋਂ 318 ਫਿਲਿਪਸ ਆਕਸੀਜਨ ਕੰਸਨਟ੍ਰੇਟਰ @DelhiAirport ਕੋਈ ਸ਼ੱਕ ਨਾ ਰਹਿਣ ਦੇਈਏ। ਅਸੀਂ ਹਵਾ ਦਾ ਰੁੱਖ ਮੋੜ ਦੇਵਾਂਗੇ।"
ਦੱਸਣਯੋਗ ਹੈ ਕਿ ਭਾਰਤ ਨੂੰ ਸਿੰਗਾਪੁਰ ਤੋਂ 500 ਬਾਈਲੈਵਲ ਪੋਜ਼ੀਟਿਵ ਏਅਰਵੇ ਪ੍ਰੈਸ਼ਰ, 250 ਆਕਸੀਜਨ ਕੰਸਨਟ੍ਰੇਟਰ ਅਤੇ ਹੋਰ ਮੈਡੀਕਲ ਸਪਲਾਈ ਮੁਹਈਆ ਕਰਾਈ ਗਈ ਹੈ, ਜੋ ਬੀਤੀ ਰਾਤ ਏਅਰ ਇੰਡੀਆ ਫਲਾਈਟ ਰਾਹੀਂ ਮੁੰਬਈ ਪੁੱਜੇ।
ਇਸ ਤੋਂ ਪਹਿਲਾਂ ਐਤਵਾਰ ਨੂੰ, ਅਮਰੀਕਾ ਵੀ ਭਾਰਤ ਨੂੰ ਟੀਕੇ ਬਣਾਉਣ ਲਈ ਲੋੜੀਂਦੇ ਜ਼ਰੂਰੀ ਕੱਚਾ ਮਾਲ ਭੇਜਣ ਲਈ ਰਾਜ਼ੀ ਹੋਇਆ ਸੀ।
ਦੱਸਣਯੋਗ ਹੈ ਕਿ ਯੂਐੱਸ ਦੇ ਕੌਮੀ ਸੁਰੱਖਿਆ ਸਲਾਹਕਾਰ ਜੇਕ ਸੁਲੀਵਾਨ ਨੇ ਭਾਰਤ ਦੇ ਆਪਣੇ ਹਮਰੁਤਬਾ ਅਜੀਤ ਡੋਵਾਲ ਨੂੰ ਫੋਨ ਕਰਕੇ ਭਾਰਤ ਦੀ ਸੀਰਮ ਇੰਸਟੀਚਿਊਟ ਨੂੰ ਕੋਵਿਡ-19 ਦੇ ਟੀਕੇ ਦਾ ਉਤਪਾਦਨ ਵਧਾਉਣ ਲਈ ਲੋੜੀਂਦੇ ਸਰੋਤ ਅਤੇ ਹੋਰ ਸਪਲਾਈ ਭੇਜਣ ਦੀ ਪੇਸ਼ਕਸ਼ ਕੀਤੀ।
ਗ਼ੌਰਤਲਬ ਹੈ ਕਿ ਇਸ ਵੇਲੇ ਭਾਰਤ ਕੋਵਿਡ-19 ਦੀ ਦੂਜੀ ਲਹਿਰ ਦੀ ਮਾਰ ਅਧੀਨ ਹੈ।
ਪੂਰੇ ਮੁਲਕ ਵਿੱਚ ਕੋਰੋਨਾ ਵਾਇਰਸ ਦੇ 3 .52 ਲੱਖ ਤਾਜ਼ੇ ਮਾਮਲੇ ਹਨ ਅਤੇ ਬੀਤੇ 24 ਘੰਟਿਆਂ ਵਿੱਚ 2 ,812 ਮੌਤਾਂ ਹੋਈਆਂ ਹਨ, ਜੋ ਕਿ ਇਸ ਮਹਾਮਾਰੀ ਦੇ ਸ਼ੁਰੂ ਹੋਣ ਤੋਂ ਹੁਣ ਤੱਕ ਦਾ ਇੱਕ ਦਿਨ ਦਾ ਸਭ ਤੋਂ ਵੱਧ ਰਜਿਸਟਰ ਕੀਤਾ ਗਿਆ ਅੰਕੜਾ ਹੈ।
