ਪ੍ਰੀਮੀਅਰ ਸਮਿਥ ਨੇ ਟਰਾਂਸਜੈਂਡਰ ਕਾਨੂੰਨ ਨੂੰ ਲੈ ਕੇ ਹੋ ਰਹੀ ਆਲੋਚਨਾ ਦਾ ਕੀਤਾ ਵਿਰੋਧ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਟਰਾਂਸਜੈਂਡਰ ਕਾਨੂੰਨ ਨੂੰ ਲੈ ਕੇ ਹੋ ਰਹੀ ਆਲੋਚਨਾ ਦਾ ਵਿਰੋਧ ਕਰਦਿਆਂ ਕਿਹਾ ਕਿ ਲੋਕਾਂ ਨੂੰ ਇਸ ਸਬੰਧੀ ਵਧੇਰੇ ਜਾਣਕਾਰੀ ਹਾਸਲ ਕਰਨ ਦੀ ਲੋੜ ਹੈ। ਉਨ੍ਹਾਂ ਦੱਸਿਆ ਕਿ ਜੇਕਰ ਬੱਚੇ ਛੋਟੀ ਉਮਰ ਵਿਚ ਆਪਣਾ ਜੈਂਡਰ ਬਦਲਾਉਂਦੇ ਹਨ ਤਾਂ ਉਹ ਅੱਗੇ ਜਾ ਕੇ ਮਾਂ-ਬਾਪ ਨਹੀਂ ਬਣ ਪਾਉਂਦੇ। ਬਹੁਤੇ ਬੱਚੇ ਬਿਨਾਂ ਸੋਚੇ ਸਮਝੇ ਆਪਣੀ ਜ਼ਿੰਦਗੀ ਦਾ ਇੰਨਾ ਵੱਡਾ ਫੈਸਲਾ ਲੈਂਦੇ ਹਨ।

ਇਸ ਲਈ ਉਨ੍ਹਾਂ ਦੀ ਸਰਕਾਰ ਚਾਹੁੰਦੀ ਹੈ ਕਿ ਉਹ ਵੱਡੇ ਹੋਣ ਮਗਰੋਂ ਫੈਸਲਾ ਲੈਣ ਕਿ ਉਹ ਲੜਕਾ ਬਣ ਕੇ ਰਹਿਣਾ ਚਾਹੁੰਦੇ ਹਨ ਕਿ ਲੜਕੀ। ਇਸੇ ਲਈ ਸਰਕਾਰ ਨੇ ਪਿਛਲੇ ਸਾਲ ਡੌਕਟਰਜ਼ ਨੂੰ 18 ਸਾਲ ਤੋਂ ਘੱਟ ਉਮਰ ਵਾਲਿਆਂ ਨੂੰ ਜੈਂਡਰ ਬਦਲਣ ਲਈ ਪਿਊਬਲਟੀ ਬਲਾਕਰਸ ਦੀਆਂ ਦਵਾਈਆਂ ਦੇਣ ਤੋਂ ਰੋਕ ਲਾ ਦਿੱਤੀ ਸੀ।

ਟਰਾਂਸਜੈਂਡਰ ਭਾਈਚਾਰੇ ਸਣੇ ਕੁਝ ਡੌਕਟਰਜ਼ ਅਤੇ ਮੈਡੀਕਲ ਅਧਿਕਾਰੀਆਂ ਨੇ ਵੀ ਸਮਿਥ ਸਰਕਾਰ ਦਾ ਵਿਰੋਧ ਕੀਤਾ ਸੀ। ਪ੍ਰੀਮੀਅਰ ਨੇ ਹਾਲ ਹੀ ਵਿਚ notwithstanding clause ਦੀ ਵਰਤੋਂ ਕਰਨ ਦੀ ਇੱਛਾ ਪ੍ਰਗਟਾਈ ਹੈ, ਜਿਸ ਨਾਲ ਸਰਕਾਰ ਇਹ ਕਾਨੂੰਨ ਸੂਬੇ ਵਿਚ ਲਾਗੂ ਕਰ ਸਕਦੀ ਹੈ।