ਡੈਨੀਅਲ ਸਮਿਥ ਨੇ ਐਲਬਰਟਾ ਦੀ ਅਗਲੀ ਪ੍ਰੀਮੀਅਰ ਬਣਨ ਲਈ UCP ਲੀਡਰਸ਼ਿਪ ਦੀ ਦੌੜ ਜਿੱਤੀ

ਡੈਨੀਅਲ ਸਮਿਥ ਐਲਬਰਟਾ ਦੀ ਨਵੀਂ ਪ੍ਰੀਮੀਅਰ ਹੋਣਗੇ। ਉਨ੍ਹਾਂ ਯੂਨਾਈਟਿਡ ਕੰਜ਼ਰਵੇਟਿਵ ਪਾਰਟੀ ਦੀ ਲੀਡਰਸ਼ਿਪ ਚੋਣ ਜਿੱਤ ਲਈ ਹੈ। ਵਾਈਲਡਰੋਜ਼ ਪਾਰਟੀ ਦੀ ਸਾਬਕਾ ਲੀਡਰ ਸਮਿਥ ਨੇ ਪ੍ਰੀਫੈਰਸ਼ਨਲ ਬੈਲਟ ਦੇ 6ਵੇਂ ਗੇੜ ਵਿਚ 54 ਫ਼ੀਸਦ ਵੋਟ ਹਾਸਲ ਕੀਤੇ ਹਨ। ਉਨ੍ਹਾਂ ਲੀਡਰਸ਼ਿਪ ਦੇ ਮੁਕਾਬਲੇ ਵਿਚ ਟ੍ਰੈਵਿਸ ਟੋਜ਼ ਅਤੇ ਪੰਜ ਹੋਰਾਂ ਨੂੰ ਮਾਤ ਦਿੱਤੀ ਹੈ। ਟ੍ਰੈਵਿਸ ਟੋਜ਼ ਇਸ ਮੁਕਾਬਲੇ ਵਿਚ ਦੂਜੇ ਨੰਬਰ 'ਤੇ ਆਏ ਹਨ। ਸਮਿਥ ਨੇ ਬੀਤੀ ਰਾਤ ਕੈਲਗਰੀ ਦੇ ਬੀ. ਐੱਮ. ਓ. ਸੈਂਟਰ ਵਿਖੇ ਭੀੜ ਨੂੰ ਸੰਬੋਧਨ ਦੌਰਾਨ ਕਿਹਾ, ''ਆਈ ਐਮ ਬੈਕ''।

ਸਮਿਥ ਨੇ ਕਿਹਾ ਕਿ ਸਮਾਂ ਆ ਗਿਆ ਹੈ ਕਿ ਐਲਬਰਟਾ ਹੁਣ ਮਜ਼ਬੂਤ ਅਤੇ ਯੂਨੀਫਾਈਡ ਕੈਨੇਡਾ ਦੇ ਨਿਰਮਾਣ ਵਿਚ ਇੱਕ ਸੀਨੀਅਰ ਪਾਰਟਨਰ ਵਜੋਂ ਆਪਣੀ ਥਾਂ ਸਥਾਪਿਤ ਕਰੇ ਅਤੇ ਐਲਬਰਟਾ ਹੁਣ ਔਟਵਾ ਤੋਂ ਸਮਰਥ ਅਤੇ ਸੁਤੰਤਰ ਹੋਣ ਦੀ ਇਜਾਜ਼ਤ ਨਹੀਂ ਮੰਗੇਗਾ।

ਗੌਰਤਲਬ ਹੈ ਕਿ ਜੇਸਨ ਕੈਨੀ ਵੱਲੋਂ ਅਸਤੀਫ਼ੇ ਦਾ ਐਲਾਨ ਕਰਨ ਮਗਰੋਂ ਪਾਰਟੀ ਵੱਲੋਂ ਲੀਡਰਸ਼ਿਪ ਰੇਸ ਲਈ ਵੋਟਿੰਗ ਕਰਾਈ ਗਈ ਸੀ। ਕੈਨੀ ਨੇ ਪਾਰਟੀ ਲੀਡਰਸ਼ਿਪ ਰੀਵਿਊ ਵਿਚ ਉਨ੍ਹਾਂ ਨੂੰ ਮਿਲੇ ਸਿਰਫ਼ 51 ਫ਼ੀਸਦੀ ਸਮਰਥਨ ਮਗਰੋਂ ਮਈ ਵਿਚ ਪ੍ਰੀਮੀਅਰ ਵਜੋਂ ਅਹੁਦਾ ਛੱਡਣ ਦਾ ਐਲਾਨ ਕੀਤਾ ਸੀ।