ਡੇਵਿਡ ਇਬੀ: ਬੀ.ਸੀ. ਲਿਬਰਲਸ ਸੂਬਾ ਪੱਧਰੀ ਕਮਿਸ਼ਨ ਸਾਹਮਣੇ ਰੱਖਣ, ਮਨੀ ਲਾਂਡਰਿੰਗ ਨਾਲ ਜੁੜੇ ਦਸਤਾਵੇਜ਼

ਬੀ.ਸੀ. ਵਿੱਚ ਮਨੀ ਲਾਂਡਰਿੰਗ (money laundering) ਦੀ ਸਮੱਸਿਆ ਦੀ ਜਾਂਚ ਲਈ ਬਣਾਏ ਗਏ ਕੁਲਨ ਕਮਿਸ਼ਨ ਆਫ ਇਨਕੁਆਇਰੀ (Cullen commission of Inquiry) ਨੇ ਆਪਣੀ ਜਨਤਕ ਸੁਣਵਾਈ ਅੱਜ ਤੋਂ ਸ਼ੁਰੂ ਕਰ ਦਿੱਤੀ ਹੈ।

ਵਿਕਟੋਰੀਆ ਵਿੱਚ ਇਸ ਸਬੰਧੀ ਗੱਲ ਕਰਦਿਆਂ ਅਟਾਰਨੀ ਜਨਰਲ ਡੇਵਿਡ ਇਬੀ (Attorney General David Eby) ਨੇ ਕਿਹਾ ਕਿ ਬ੍ਰਿਟਿਸ਼ ਕੋਲੰਬੀਆ ਦੇ ਲੋਕਾਂ ਦਾ ਹੱਕ ਹੈ ਕਿ ਉਨ੍ਹਾਂ ਨੂੰ ਦੱਸਿਆ ਜਾਵੇ ਕਿ ਮਨੀ ਲਾਂਡਰਿੰਗ ਦੀ ਸਮੱਸਿਆ ਕਿਸ ਤਰ੍ਹਾਂ ਇੰਨੀ ਵੱਧ ਗਈ ਅਤੇ ਗ੍ਰਿਫਤਾਰੀਆਂ ਕਿਉਂ ਨਹੀਂ ਹੋਈਆਂ।

ਡੇਵਿਡ ਇਬੀ (David Eby) ਨੇ ਕਿਹਾ ਕਿ ਇਸ ਦੀ ਕਾਫੀ ਸੰਭਾਵਨਾ ਹੈ ਕਿ ਪਿਛਲੀ ਸਰਕਾਰ ਦੇ ਵਿੱਤ ਮੰਤਰੀ ਮਾਇਕ ਡੀਜੌਂਗ (Finance Minister Mike De Jong) ਕੋਲ ਇਸ ਸਮੱਸਿਆ ਬਾਰੇ ਬਹੁਤ ਸਾਰੀ ਨਿੱਜੀ ਜਾਣਕਾਰੀ ਸੀ, ਅਤੇ ਉਨ੍ਹਾਂ ਨੇ ਜਾਂ ਤਾਂ ਇਸ ਜਾਣਕਾਰੀ ਨੂੰ ਗੁਪਤ ਰੱਖਿਆ ਜਾਂ ਫਿਰ ਉਹ ਆਪਣੇ ਕੰਮ ਵਿੱਚ ਮਾੜੇ ਸਨ।

ਡੇਵਿਡ ਇਬੀ (David Eby) ਨੇ ਕਿਹਾ ਕਿ ਬੀ.ਸੀ. ਲਿਬਰਲਸ ਦੇ ਲੀਡਰ ਐਂਡਰਿਊ ਵਿਲਕਿੰਸਨ (Andrew Wilkinson) ਅਤੇ ਮਾਈਕ ਡੀਜੌਂਗ (Mike de Jong) ਦੀ ਜ਼ਿੰਮੇਵਾਰੀ ਹੈ ਕਿ ਉਹ ਆਪਣੀ ਸਰਕਾਰ ਦੀ ਕੈਬਨਿਟ ਦੀਆਂ ਮਨੀ ਲਾਂਡਰਿੰਗ (money laundering) ਦੇ ਨਾਲ ਸੰਬੰਧਿਤ ਦਸਤਾਵੇਜ਼ਾਂ ਨੂੰ ਮੁਕੰਮਲ ਰੂਪ ਵਿੱਚ ਕਮਿਸ਼ਨ ਸਾਹਮਣੇ ਪੇਸ਼ ਕਰਨ।

ਡੇਵਿਡ ਇਬੀ (David Eby) ਨੇ ਦੱਸਿਆ ਕਿ ਮਨੀ ਲਾਂਡਰਿੰਗ ਦੇ ਕਾਰਨ ਬੀ.ਸੀ. ਵਿੱਚ ਓਵਰਡੋਜ ਨਾਲ ਜੁੜੀਆਂ ਮੌਤਾਂ ਵਿੱਚ ਵਾਧਾ ਹੋਇਆ ਅਤੇ ਪ੍ਰਾਪਰਟੀ ਲੋਕਾਂ ਦੀ ਪਹੁੰਚ ਤੋਂ ਬਾਹਰ ਹੋ ਗਈ।

ਜ਼ਿਕਰਯੋਗ ਹੈ ਕਿ ਕੁਲਨ ਕਮਿਸ਼ਨ (Cullen Commission) ਦੇ ਕੋਲ ਦੋਸ਼ੀ ਸਾਬਤ ਕਰਨ ਜਾਂ ਜ਼ਿੰਮੇਵਾਰੀ ਤੈਅ ਕਰਨ ਦੀ ਤਾਕਤ ਨਹੀਂ ਹੈ, ਪਰ ਇਹ ਕਮਿਸ਼ਨ ਮਈ 2021 ਵਿੱਚ ਆਪਣੀ ਅੰਤਿਮ ਰਿਪੋਰਟ ਵਿੱਚ ਮਨੀ ਲਾਂਡਰਿੰਗ ਸਮੱਸਿਆ ਸੰਬੰਧੀ ਸਿਫਾਰਿਸ਼ਾਂ ਦੇਵੇਗਾ।