ਟਰੰਪ ਦੇ ਪ੍ਰਸਤਾਵਿਤ ਟੈਰਿਫ ਦੀ ਡੇਵਿਡ ਈਬੀ ਨੇ ਕੀਤੀ ਆਲੋਚਨਾ

ਬੀ.ਸੀ. ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਟਰੰਪ ਦੇ ਪ੍ਰਸਤਾਵਿਤ ਟੈਰਿਫ ਦੀ ਆਲੋਚਨਾ ਕੀਤੀ ਹੈ ਅਤੇ ਟਰੂਡੋ ਸਰਕਾਰ ਨੂੰ ਸਖ਼ਤ ਪ੍ਰਤੀਕਿਰਿਆ ਦੇਣ ਲਈ ਕਿਹਾ ਹੈ। ਈਬੀ ਨੇ ਕਿਹਾ ਕਿ ਟੈਰਿਫ ਨਾਲ ਨਾ ਸਿਰਫ ਕੈਨੇਡਾ ਦਾ ਨੁਕਸਾਨ ਹੋਵੇਗਾ ਸਗੋਂ ਅਮਰੀਕਾ ਨੂੰ ਵੀ ਇਸ ਦਾ ਖਮਿਆਜ਼ਾ ਭੁਗਤਣਾ ਪਵੇਗਾ।

ਉਨ੍ਹਾਂ ਕਿਹਾ ਕਿ ਟਰੰਪ ਦੇ ਇਸ ਕਦਮ ਨਾਲ ਕੈਨੇਡਾ ਅਤੇ ਅਮਰੀਕਾ ਦੋਵੇਂ ਬਰਾਬਰ ਤੌਰ ’ਤੇ ਪ੍ਰਭਾਵਿਤ ਹੋਣਗੇ। ਦੱਸਣਯੋਗ ਹੈ ਕਿ ਅਮਰੀਕਾ ਬੀਸੀ ਲਈ ਸਭ ਤੋਂ ਵੱਡਾ ਬਾਜ਼ਾਰ ਹੈ, ਸੂਬੇ ਦੇ ਕੁੱਲ ਨਿਰਯਾਤ ਵਿਚ ਲਗਭਗ 54 ਫੀਸਦੀ ਹਿੱਸੇਦਾਰੀ ਅਮਰੀਕਾ ਦੇ ਬਾਜ਼ਾਰ ਦੀ ਹੈ।

ਸੂਬਾਈ ਸਰਕਾਰ ਦੇ ਅੰਕੜਿਆਂ ਅਨੁਸਾਰ, 2023 ਵਿਚ ਸੂਬੇ ਦਾ ਅਮਰੀਕਾ ਨੂੰ ਨਿਰਯਾਤ $30 ਬਿਲੀਅਨ ਤੋਂ ਵੱਧ ਦਾ ਰਿਹਾ ਹੈ, ਸੂਬਾ ਪ੍ਰਮੁੱਖ ਤੌਰ ’ਤੇ ਅਮਰੀਕਾ ਨੂੰ ਲੱਕੜ ਦੇ ਉਤਪਾਦ, ਖੇਤੀਬਾੜੀ ਉਤਪਾਦ, ਊਰਜਾ ਉਤਪਾਦ ਅਤੇ ਕੁਦਰਤੀ ਗੈਸ ਸਪਲਾਈ ਕਰਦਾ ਹੈ।