ਡੇਵਿਡ ਈਬੀ ਨੇ ਸਰੀ ਤੋਂ ਦੋ ਐੱਮ.ਐੱਲ.ਏ. ਨੂੰ ਐਨ.ਡੀ.ਪੀ. ਸਰਕਾਰ ਦੇ ਮੰਤਰੀ ਮੰਡਲ ਵਿਚ ਕੀਤਾ ਸ਼ਾਮਲ

ਪ੍ਰੀਮੀਅਰ ਡੇਵਿਡ ਈਬੀ ਨੇ ਸਰੀ ਤੋਂ ਦੋ ਐੱਮ.ਐੱਲ.ਏ. ਨੂੰ ਐਨ.ਡੀ.ਪੀ. ਸਰਕਾਰ ਦੇ ਮੰਤਰੀ ਮੰਡਲ ਵਿਚ ਸ਼ਾਮਲ ਕੀਤਾ ਹੈ। ਸਰੀ-ਗਿਲਡਫੋਰਡ ਤੋਂ ਵਿਧਾਇਕ ਗੈਰੀ ਬੇਗ ਨੂੰ ਜਨਤਕ ਸੁਰੱਖਿਆ ਮੰਤਰੀ ਬਣਾਇਆ ਗਿਆ ਹੈ, ਪਿਛਲੀ ਸਰਕਾਰ ਵਿਚ ਇਹ ਮੰਤਰਾਲਾ ਮਾਈਕ ਫਾਰਨਵਰਥ ਕੋਲ ਸੀ।

ਗੈਰੀ ਬੇਗ ਉਹੀ ਵਿਧਾਇਕ ਹਨ ਜਿਨ੍ਹਾਂ ਦੀ ਬਦੌਲਤ ਐਨਡੀਪੀ ਪੂਰਣ ਬਹੁਮਤ ਵਾਲੀ ਸਰਕਾਰ

ਬਣਾਉਣ ਵਿਚ ਕਾਮਯਾਬ ਹੋਈ। ਦਰਅਸਲ ਸਰੀ ਗਿਲਡਫੋਰਡ ਸੀਟ ’ਤੇ ਵੋਟਾਂ ਦੀ ਦੁਬਾਰਾ ਗਿਣਤੀ ਵਿਚ ਕੰਜ਼ਰਵੇਟਿਵ ਉਮੀਦਵਾਰ ਹੋਨਵੀਰ ਸਿੰਘ ਦੀ ਜਿੱਤ ਹਾਰ ਵਿਚ ਪਲਟ ਗਈ ਸੀ ਅਤੇ ਮਹਿਜ 22 ਵੋਟਾਂ ਦੇ ਫਰਕ ਨਾਲ ਇਹ ਸੀਟ ਗੈਰੀ ਬੇਗ ਦੀ ਝੋਲੀ ਪੈ ਗਈ ਸੀ।

ਉਥੇ ਹੀ, ਸਰੀ ਤੋਂ ਦੂਜੇ ਮੰਤਰੀ ਸਰੀ-ਫਲੀਟਵੁੱਡ ਤੋਂ ਵਿਧਾਇਕ ਜਗਰੂਪ ਬਰਾੜ ਬਣਾਏ ਗਏ ਹਨ, ਪ੍ਰੀਮੀਅਰ ਡੇਵਿਡ ਈਬੀ ਨੇ ਉਨ੍ਹਾਂ ਨੂੰ ਮਾਈਨਿੰਗ ਅਤੇ ਨਾਜ਼ੁਕ ਖਣਿਜ ਮੰਤਰਾਲਾ ਦੀ ਜ਼ਿੰਮੇਵਾਰੀ ਸੌਂਪੀ ਹੈ। ਉਥੇ ਹੀ ਸਰੀ ਪੁਲਿਸਿੰਗ ਤਬਦੀਲੀ ਵਿਚ ਭੂਮਿਕਾ ਨਿਭਾਉਣ ਵਾਲੇ ਮਾਈਕ ਫਾਰਨਵਰਥ ਹੁਣ ਆਵਾਜਾਈ ਤੇ ਟ੍ਰਾਂਜਿਟ ਮਿਨਿਸਟਰੀ ਦੇਖਣਗੇ। ਗੌਰਤਲਬ ਹੈ ਕਿ ਸਰੀ ਤੋਂ ਐਨ.ਡੀ.ਪੀ. ਦੇ 4 ਅਤੇ ਕੰਜ਼ਰਵੇਟਿਵ ਦੇ 6 ਵਿਧਾਇਕ ਹਨ।