22.2C Vancouver 22.2C VancouverOct 12, 2022 10:07 PM - The Canadian Press/Connect News
ਬੀ.ਸੀ. ਕੋਰੋਨਰਸ ਸਰਵਿਸ ਦਾ ਕਹਿਣਾ ਹੈ ਕਿ ਸ਼ੁਰੂਆਤੀ ਅੰਕੜੇ ਦਰਸ਼ਾਉਂਦੇ ਹਨ ਕਿ ਸਾਲ 2020 ਦੇ ਮੁਕਾਬਲੇ ਸਾਲ 2021 'ਚ ਸੂਬੇ 'ਚ ਬੇਘਰ ਲੋਕਾਂ ਦੀ ਮੌਤ ਦੇ ਮਾਮਲਿਆਂ ਨੇ ਵੱਡੀ ਛਾਲ ਲਗਾਈ।
ਕੋਰੋਨਰ ਆਫਿਸ ਦਾ ਕਹਿਣਾ ਹੈ ਕਿ ਬੀਤੇ ਸਾਲ ਬੇਘਰੀ ਨਾਲ ਜੂਝਦੇ 247 ਲੋਕਾਂ ਦੀ ਮੌਤ ਰਿਪੋਰਟ ਹੋਈ ਹੈ।
ਇਸ ਨੂੰ ਸਾਲ 2020 ਦੇ ਮੁਕਾਬਲੇ 75% ਦਾ ਵਾਧਾ ਦੱਸਿਆ ਗਿਆ ਹੈ।
ਚੀਫ਼ ਕੋਰੋਨਰ ਲੀਜ਼ਾ ਲਾਪੌਇਂਟ ਦਾ ਕਹਿਣਾ ਹੈ ਕਿ ਇਹ ਅੰਕੜਾ ਦਰਸ਼ਾਉਂਦਾ ਹੈ ਕਿ ਬੇਘਰ ਲੋਕ ਹਰ ਰੋਜ ਕਿਸ ਪ੍ਰਕਾਰ ਦੇ ਖਤਰੇ ਦਾ ਸਾਹਮਣਾ ਕਰਦੇ ਹਨ।
ਉਨ੍ਹਾਂ ਕਿਹਾ ਕਿ ਬੇਘਰ ਲੋਕਾਂ ਸਾਹਮਣੇ ਸ਼ਰੀਰਕ ਅਤੇ ਮਾਨਸਿਕ ਸਿਹਤ ਚਿੰਤਾਵਾਂ ਤਾਂ ਖੜੀਆਂ ਹੀ ਹਨ ਪਰ ਡਿਸੇਬਿਲਿਟੀ ਅਤੇ ਸਬਸਟੈਂਸ ਦੀ ਵਰਤੋਂ ਵੀ ਇੱਕ ਵੱਡੀ ਚੁਣੌਤੀ ਹੈ।
ਰਿਪੋਰਟ 'ਚ ਦੱਸਿਆ ਗਿਆ ਹੈ ਕਿ ਸਾਲ 2016 ਤੋਂ 2020 ਵਿਚਾਲੇ ਔਸਤ ਅਨੁਸਾਰ 153 ਬੇਘਰ ਲੋਕਾਂ ਦੀ ਮੌਤ ਰਿਪੋਰਟ ਹੋਈ ਸੀ।
ਇਸ 'ਚ ਮੌਤ ਦਾ ਵੱਡਾ ਕਾਰਨ ਜਹਿਰੀਲੇ ਗੈਰਕਨੂੰਨੀ ਡਰੱਗਸ ਮੰਨੇ ਜਾਂਦੇ ਹਨ।
ਅਟਾਰਨੀ ਜਨਰਲ ਅਤੇ ਰਿਹਾਇਸ਼ ਲਈ ਜਿੰਮੇਵਾਰ ਮੰਤਰੀ ਮੁਰ੍ਹੇ ਰੈਂਕਿਨ ਅਤੇ ਮਾਨਸਿਕ ਸਿਹਤ ਅਤੇ ਨਸ਼ਾਖੋਰੀ ਮੰਤਰੀ, ਸ਼ੀਲਾ ਮੈਲਕਮਸਨ ਨੇ 2012 ਤੋਂ 2021 ਵਿੱਚ ਬੀ.ਸੀ. ਵਿੱਚ ਬੇਘਰੀ ਦਾ ਅਨੁਭਵ ਕਰ ਰਹੇ ਵਿਅਕਤੀਆਂ ਦੀਆਂ ਮੌਤਾਂ ਬਾਰੇ ਸਾਂਝਾ ਬਿਆਨ ਜਾਰੀ ਕਰ ਆਖਿਆ ਹੈ ਕਿ "ਉਨ੍ਹਾਂ ਸਾਰੇ ਲੋਕਾਂ ਦੇ ਪਰਿਵਾਰਾਂ ਅਤੇ ਕਰੀਬੀਆਂ ਦੇ ਨਾਲ ਅਸੀਂ ਡੂੰਘਾ ਅਫਸੋਸ ਜਾਹਰ ਕਰਦੇ ਹਾਂ ਜਿਨ੍ਹਾਂ ਨੇ ਬੇਘਰ ਹੋਣ ਦਾ ਅਨੁਭਵ ਕਰਦੇ ਹੋਏ ਆਪਣੀ ਜਾਨ ਗੁਆ ਦਿੱਤੀ ਹੈ।
ਜਿਹੜੇ ਲੋਕ ਮਾਰੇ ਗਏ, ਉਹ ਸਾਡੇ ਗੁਆਂਢੀ, ਦੋਸਤ ਅਤੇ ਪਰਿਵਾਰਕ ਮੈਂਬਰ ਸਨ ਅਤੇ ਸਾਡੀ ਹਮਦਰਦੀ ਹਰ ਉਸ ਵਿਅਕਤੀ ਨਾਲ ਹੈ ਜੋ ਆਪਣੀ ਇਸ ਕਮੀ ਦਾ ਸੋਗ ਮਨਾ ਰਿਹਾ ਹੈ।
"ਜਾਨ ਗਵਾਉਣ ਵਾਲੇ ਲੋਕਾਂ ਵਿੱਚ ਕਈ ਨੌਜਵਾਨ ਮਰਦ ਸਨ। ਬੀਤੇ ਸਾਲ ਬੇਘਰ ਹੋਣ ਦਾ ਅਨੁਭਵ ਕਰ ਰਹੇ ਘਟੋ-ਘੱਟ 195 ਲੋਕਾਂ ਦੀ ਮੌਤ ਗੈਰ-ਕਾਨੂੰਨੀ ਨਸ਼ਿਆਂ ਦੀ ਜਹਿਰੀਲੀ ਸਪਲਾਈ ਕਾਰਨ ਹੋਈ ਹੈ।
