16.15C Vancouver 16.15C VancouverAug 5, 2022 6:55 PM - ANI
ਦਿੱਲੀ ਵਿਚ ਪਿਛਲੇ 24 ਘੰਟਿਆਂ ਵਿਚ ਕੋਰੋਨਾ ਮਾਮਲਿਆਂ ਵਿਚ ਵੱਡਾ ਉਛਾਲ ਦੇਖਣ ਨੂੰ ਮਿਲਿਆ ਹੈ, ਰਾਸ਼ਟਰੀ ਰਾਜਧਾਨੀ ਨੇ ਇਸ ਦੌਰਾਨ 2,419 ਨਵੇਂ ਮਾਮਲੇ ਦਰਜ ਕੀਤੇ ਹਨ। ਸਿਹਤ ਵਿਭਾਗ ਵੱਲੋਂ ਸ਼ੁੱਕਰਵਾਰ ਜਾਰੀ ਬੁਲੇਟਿਨ ਅਨੁਸਾਰ, ਸ਼ਹਿਰ ਵਿਚ ਪਾਜ਼ੇਟਿਵ ਰੇਟ ਲਗਭਗ 13 ਫ਼ੀਸਦੀ ਰਿਕਾਰਡ ਕੀਤਾ ਗਿਆ ਹੈ।
ਦਿੱਲੀ ਵਿਚ ਕੋਰੋਨਾ ਦੇ ਮਾਮਲਿਆਂ ਵਿਚ ਇਹ ਪਿਛਲੇ ਛੇ ਮਹੀਨਿਆਂ ਵਿਚ ਵੱਡਾ ਵਾਧਾ ਹੈ ਅਤੇ ਪਾਜ਼ੇਟਿਵ ਰੇਟ ਸਾਢੇ ਛੇ ਮਹੀਨਿਆਂ ਵਿਚ ਸਭ ਤੋਂ ਵੱਧ ਹੈ।
ਇਸ ਤੋਂ ਪਹਿਲਾਂ ਸ਼ਹਿਰ ਵਿਚ ਇਸ ਸਾਲ ਦੇ ਸ਼ੁਰੂ ਵਿਚ 3 ਫਰਵਰੀ ਨੂੰ 2,668 ਮਾਮਲੇ ਸਾਹਮਣੇ ਆਏ ਸਨ, ਜਦੋਂ ਕਿ 23 ਜਨਵਰੀ ਨੂੰ ਪਾਜ਼ੇਟਿਵ ਰੇਟ 13.32 ਫ਼ੀਸਦੀ ਸੀ।
ਉੱਥੇ ਹੀ, ਪਿਛਲੇ ਦਿਨ ਯਾਨੀ ਵੀਰਵਾਰ ਨੂੰ ਦਿੱਲੀ ਨੇ 2,202 ਨਵੇਂ ਮਾਮਲੇ ਦਰਜ ਕੀਤੇ ਸਨ, ਇਸ ਦੌਰਾਨ ਪਾਜ਼ੇਟਿਵ ਰੇਟ 11.84 ਫ਼ੀਸਦੀ ਸੀ। ਰਾਸ਼ਟਰੀ ਰਾਜਧਾਨੀ ਵਿਚ ਇਸ ਸਮੇਂ 6,876 ਮਾਮਲੇ ਸਰਗਰਮ ਹਨ। ਪਿਛਲੇ 24 ਘੰਟਿਆਂ ਵਿਚ ਲਗਭਗ 1,716 ਕੋਵਿਡ ਮਰੀਜ਼ ਸੰਕਰਮਣ ਤੋਂ ਠੀਕ ਹੋਏ ਹਨ, ਜਿਸ ਨਾਲ ਸ਼ਹਿਰ ਵਿਚ ਠੀਕ ਹੋਣ ਵਾਲਿਆਂ ਦੀ ਕੁੱਲ ਗਿਣਤੀ 19,31,590 ਹੋ ਗਈ ਹੈ।
ਇਸ ਦੌਰਾਨ ਦੋ ਮਰੀਜ਼ਾਂ ਦੀ ਵਾਇਰਸ ਨਾਲ ਮੌਤ ਹੋ ਗਈ, ਜਿਸ ਨਾਲ ਸ਼ਹਿਰ ਵਿਚ ਕੋਵਿਡ-19 ਨਾਲ ਮਰਨ ਵਾਲਿਆਂ ਦੀ ਗਿਣਤੀ 26,327 'ਤੇ ਪਹੁੰਚ ਗਈ ਹੈ।
