11.51C Vancouver 11.51C VancouverMar 12, 2021 6:44 AM -
ਅੱਜ ਸ਼ੁੱਕਰਵਾਰ ਨੂੰ ਦਿੱਲੀ ਦੀ ਅਦਾਲਤ ਨੇ ਦਿੱਲੀ ਪੁਲਿਸ ਨੂੰ ਵਾਤਾਵਰਨ ਕਾਰਕੁੰਨ ਸ਼ੁਭਮ ਕਰ ਚੌਧਰੀ ਨਾਲ 15 ਮਾਰਚ ਤੱਕ ਕਿਸੇ ਵੀ ਤਰਾਂ ਦੀ ਜ਼ਬਰਨ ਕਾਰਵਾਈ ਨਾ ਕਰਨ ਦੀ ਹਦਾਇਤ ਦਿੱਤੀ ਹੈ।
ਪਟਿਆਲਾ ਹਾਊਸ ਕੋਰਟ ਦੇ ਐਡੀਸ਼ਨਲ ਸੈਸ਼ਨ ਜੱਜ ਧਰਮੇਂਦਰ ਰਾਣਾ ਨੇ ਚੌਧਰੀ ਦੀ ਐਂਟੀਸੀਪੇਟ੍ਰੀ ਜ਼ਮਾਨਤ ਦੀ ਅਰਜ਼ੀ 'ਤੇ ਸੁਣਵਾਈ 15 ਮਾਰਚ ਤੱਕ ਲਈ ਮੁਲਤਵੀ ਕਰ ਦਿੱਤੀ ਹੈ।
ਪਬਲਿਕ ਪ੍ਰੋਸੀਕਿਊਟਰ ਇਰਫ਼ਾਨ ਅਹਿਮਦ ਨੇ ਅਦਾਲਤ ਨੂੰ ਦੱਸਿਆ ਕਿ ਚੌਧਰੀ ਦੇ ਨਾਲ ਦੇ ਕਥਿਤ ਸਹਿ-ਦੋਸ਼ੀਆਂ ਸ਼ਾਂਤਨੂ ਮੁਲੁਕ ਅਤੇ ਨਿਕਿਤਾ ਜੈਕਬ ਦੀ ਐਂਟੀਸੀਪੇਟ੍ਰੀ ਜ਼ਮਾਨਤ ਦੀ ਅਰਜ਼ੀ 'ਤੇ ਵੀ ਸੁਣਵਾਈ ਦੀ ਤਰੀਕ 15 ਮਾਰਚ ਦੀ ਹੀ ਤੈਅ ਹੈ।
ਉਹਨਾਂ ਦੋਵਾਂ ਨੂੰ ਵੀ ਦਿੱਲੀ ਅਦਾਲਤ ਵੱਲੋਂ 15 ਮਾਰਚ ਤੱਕ ਗ੍ਰਿਫ਼ਤਾਰੀ ਤੋਂ ਅੰਤਰਿਮ ਸੁਰੱਖਿਆ ਮੁਹਈਆ ਕਰਾਈ ਗਈ ਹੈ।
ਚੌਧਰੀ ਦੇ ਮਾਮਲੇ 'ਚ ਪੇਸ਼ ਹੋਏ ਵਕੀਲ ਸੌਤਿਕ ਬੈਨਰਜੀ ਵੱਲੋਂ ਅਦਾਲਤ ਤੋਂ ਉਦੋਂ ਤੱਕ ਲਈ ਚੌਧਰੀ ਦੀ ਅੰਤਰਿਮ ਸੁਰੱਖਿਆ ਵਧਾਉਣ ਦੀ ਬੇਨਤੀ ਕੀਤੀ ਗਈ।
ਉਨ੍ਹਾਂ ਅਦਾਲਤ ਨੂੰ ਦੱਸਿਆ ਕਿ ਬੌਮਬੇ ਹਾਈ ਕੋਰਟ ਵੱਲੋਂ ਦਿੱਤੀ ਗਈ ਅੰਤਰਿਮ ਸੁਰੱਖਿਆ ਅੱਜ ਖ਼ਤਮ ਹੋ ਰਹੀ ਹੈ।
ਸਰਕਾਰੀ ਵਕੀਲ ਵੱਲੋਂ ਚੌਧਰੀ ਦੀ ਗ੍ਰਿਫ਼ਤਾਰੀ ਤੋਂ ਬਚਨ ਲਈ ਅੰਤਰਿਮ ਸੁਰੱਖਿਆ ਲੈਣ ਲਈ ਕੀਤੀ ਗਈ ਅਪੀਲ ਦਾ ਵਿਰੋਧ ਨਹੀਂ ਕੀਤਾ ਗਿਆ।
ਦੱਸਣਯੋਗ ਹੈ ਕਿ ਵਾਤਾਵਰਨ ਕਾਰਕੁੰਨ ਸ਼ੁਭਮ ਕਰ ਚੌਧਰੀ ਵੱਲੋਂ ਕਿਸਾਨੀ ਸੰਘਰਸ਼ ਨਾਲ ਜੁੜੇ 'ਟੂਲਕਿੱਟ' ਦਸਤਾਵੇਜ਼ ਮਾਮਲੇ 'ਚ ਪੇਸ਼ਗੀ ਜ਼ਮਾਨਤ ਲਈ ਦਿੱਲੀ ਅਦਾਲਤ 'ਚ ਪਹੁੰਚ ਕੀਤੀ ਗਈ ਸੀ।
ਇਸ ਤੋਂ ਪਹਿਲਾ ਉਸਨੂੰ ਬੌਮਬੇ ਹਾਈ ਕੋਰਟ ਦੀ ਗੋਆ ਬੈਂਚ ਵੱਲੋਂ ਟ੍ਰਾਂਸਿਟ ਜ਼ਮਾਨਤ ਦਿੱਤੀ ਗਈ ਸੀ।
ਬੰਬੇ ਹਾਈ ਕੋਰਟ ਦੀ ਗੋਆ ਬੈਂਚ ਨੇ ਉਸਨੂੰ 12 ਮਾਰਚ ਤੱਕ ਗ੍ਰਿਫ਼ਤਾਰੀ ਤੋਂ ਸੁਰੱਖਿਆ ਮੁਹਈਆ ਕਰਾਈ ਸੀ, ਤਾਂ ਕਿ ਉਹ ਦਿੱਲੀ ਦੀ ਅਦਾਲਤ ਤੱਕ ਪਹੁੰਚ ਕਰ ਸਕੇ, ਜਿੱਥੇ ਉਸ ਖ਼ਿਲਾਫ਼ ਆਈਪੀਸੀ ਦੀ ਧਾਰਾ 124 ਏ (ਦੇਸ਼ਧ੍ਰੋਹ), 153 ਏ (ਦੁਸ਼ਮਣੀ ਫੈਲਾਉਣ) ਅਤੇ 120 ਬੀ (ਅਪਰਾਧਿਕ ਸਾਜ਼ਿਸ਼) ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ।
ਪਟਿਆਲਾ ਹਾਊਸ ਕੋਰਟ ਦੇ ਐਡੀਸ਼ਨਲ ਜੱਜ ਧਰਮੇਂਦਰ ਰਾਣਾ ਵੱਲੋਂ ਜ਼ਮਾਨਤ 'ਤੇ ਸੁਣਵਾਈ ਕੀਤੇ ਜਾਣ ਲਈ 12 ਮਾਰਚ ਤੈਅ ਕੀਤੀ ਗਈ ਸੀ।
ਜ਼ਿਕਰਯੋਗ ਹੈ ਕਿ ਇਸੇ ਅਦਾਲਤ ਵੱਲੋਂ ਪਹਿਲਾਂ ਸ਼ਾਂਤਨੂ ਮੁਲੁਕ ਅਤੇ ਨਿਕਿਤਾ ਜੈਕਬ ਨੂੰ ਵੀ ਇਸੇ ਮਾਮਲੇ 'ਚ 15 ਮਾਰਚ ਤੱਕ ਗ੍ਰਿਫ਼ਤਾਰੀ ਤੋਂ ਰਾਹਤ ਦਿੱਤੀ ਜਾ ਚੁੱਕੀ ਹੈ।
ਐਡੀਸ਼ਨਲ ਸੈਸ਼ਨ ਜੱਜ ਧਰਮੇਂਦਰ ਰਾਣਾ ਨੇ ਪਹਿਲਾਂ ਇਸੇ ਮਾਮਲੇ 'ਚ ਵਾਤਾਵਰਨ ਕਾਰਕੁੰਨ ਦਿਸ਼ਾ ਰਵੀ ਨੂੰ ਵੀ ਜ਼ਮਾਨਤ ਦਿੱਤੀ ਹੈ।
21 ਸਾਲਾਂ ਦੀ ਕਾਰਕੁੰਨ ਨੂੰ ਕਿਸਾਨਾਂ ਦੇ ਸੰਘਰਸ਼ ਦੌਰਾਨ 'ਟੂਲਕਿੱਟ' ਦਸਤਾਵੇਜ਼ ਨੂੰ ਬਣਾਉਣ ਅਤੇ ਉਸਨੂੰ ਫੈਲਾਉਣ ਲਈ ਬੈਂਗਲੁਰੂ ਤੋਂ ਗਿਰਫ਼ਤਾਰ ਕੀਤਾ ਗਿਆ ਸੀ।
ਉਹ 'ਟੂਲਕਿੱਟ' ਦੇ ਸੰਪਾਦਕਾਂ 'ਚੋਂ ਇੱਕ ਸੀ। ਦੱਸਣਯੋਗ ਹੈ ਕਿ 3 ਫਰਵਰੀ ਨੂੰ ਸਵੀਡਨ ਦੀ ਵਾਤਾਵਰਨ ਕਾਰਕੁੰਨ ਗ੍ਰੇਟਾ ਥਨਬਰਗ ਨੇ ਇਸ 'ਟੂਲਕਿੱਟ' ਨੂੰ ਟਵੀਟ ਕੀਤਾ ਸੀ, ਜਿਸਨੂੰ ਬਾਅਦ ਵਿਚ ਹਟਾਅ ਦਿੱਤਾ ਗਿਆ ਸੀ।
ਗ੍ਰੇਟਾ ਨੇ ਦਿੱਲੀ ਦੇ ਬਾਰਡਰਾਂ 'ਤੇ ਨਵੇਂ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਧਰਨਾ ਦੇ ਰਹੇ ਕਿਸਾਨਾਂ ਦਾ ਵੀ ਸਮਰਥਨ ਕੀਤਾ ਸੀ।
ਦਿੱਲੀ ਪੁਲਿਸ ਮੁਤਾਬਕ, ਸਵੀਡਨ ਦੀ ਵਾਤਾਵਰਨ ਕਾਰਕੁੰਨ ਵੱਲੋਂ ਸਾਂਝੀ ਕੀਤੀ ਗਈ 'ਟੂਲਕਿੱਟ' ਨੇ 26 ਜਨਵਰੀ 2021 ਨੂੰ ਟ੍ਰੈਕਟਰ ਪਰੇਡ ਦੌਰਾਨ ਹੋਈ ਹਿੰਸਾ 'ਚ ਅਹਿਮ ਰੋਲ ਅਦਾ ਕੀਤਾ, ਜਿਸ ਦੌਰਾਨ ਕਈ ਪੁਲਿਸ ਵਾਲੇ ਜ਼ਖਮੀ ਹੋਏ ਸਨ।
"ਟੂਲਕਿੱਟ ਬਣਾਉਣ 'ਚ ਸਿਰਫ਼ ਕੁਝ ਭਾਰਤੀਆਂ ਦਾ ਹੱਥ ਨਹੀਂ ਸੀ, ਬਲਕਿ ਕੁਝ ਖਾਲਿਸਤਾਨੀ ਜਥੇਬੰਦੀਆਂ ਨਾਲ ਮਿਲ ਕੇ ਇਹ ਬਣਾਈ ਗਈ ਸੀ,"ਦਿੱਲੀ ਪੁਲਿਸ ਨੇ ਕਿਹਾ।
ਦਿੱਲੀ ਪੁਲਿਸ ਦੇ ਖ਼ਾਸ ਸੈੱਲ ਨੇ ਟੂਲਕਿੱਟ ਬਣਾਉਣ ਅਤੇ ਉਸਨੂੰ ਫੈਲਾਉਣ ਖ਼ਿਲਾਫ਼ ਐੱਫਆਈਆਰ ਦਰਜ ਕੀਤੀ ਅਤੇ ਕਿਹਾ ਕਿ ਭਾਰਤ ਨੂੰ ਬਦਨਾਮ ਕਾਰਨ ਦੀ 'ਕੌਮਾਂਤਰੀ ਸਾਜ਼ਿਸ਼' ਦਾ ਪਰਦਾਫਾਸ਼ ਕਰਨ ਲਈ ਪੜਤਾਲ ਜਾਰੀ ਹੈ।
