ਕੈਲਗਰੀ ਦੀ ਓ ਕਲੇਅਰ ਮਾਰਕੀਟ ਨੂੰ ਗ੍ਰੀਨ ਲਾਈਨ ਲਈ ਢਾਹੁਣਾ ਸ਼ੁਰੂ

ਕੈਲਗਰੀ ਦੀ ਮਸ਼ਹੂਰ ਓ ਕਲੇਅਰ ਮਾਰਕੀਟ ਨੂੰ ਗ੍ਰੀਨ ਲਾਈਨ ਪ੍ਰੋਜੈਕਟ ਲਈ ਅੱਜ ਢਾਹੁਣ ਦਾ ਕੰਮ ਸ਼ੁਰੂ ਹੋਣ ਜਾ ਰਿਹਾ ਹੈ। ਇਸ ਮਾਰਕਿਟ ਨਾਲ ਲੋਕਾਂ ਦੀ ਕਾਫੀ ਯਾਦਾਂ ਜੁੜੀਆਂ ਹਨ। ਪਿਛਲੇ ਸਾਲ ਸਿਟੀ ਨੇ ਰੇਲਵੇ ਲਾਈਨ ਕੱਢਣ ਲਈ ਇਸ ਨੂੰ ਆਪਣੇ ਹੱਥਾਂ ਵਿਚ ਲੈ ਲਿਆ ਸੀ।

ਸੂਬਾ ਸਰਕਾਰ ਵਲੋਂ ਓ ਕਲੇਅਰ ਵਿਚ ਸਟੇਸ਼ਨ ਬਣਾਉਣ ਦਾ ਪ੍ਰੋਜੈਕਟ ਨਹੀਂ ਹੈ ਪਰ ਸਿਟੀ ਇਸ ਇਲਾਕੇ ਨੂੰ ਢਾਹੁਣ ਜਾ ਰਹੀ ਹੈ। ਪਿਛਲੇ ਹਫਤੇ ਕੌਂਸਲ ਨੇ ਸੂਬੇ ਦੇ ਇਸ ਪ੍ਰੋਜੈਕਟ ਲਈ ਹਾਮੀ ਭਰੀ ਹੈ ਅਤੇ ਲੋਕਾਂ ਦਾ ਸਵਾਲ ਹੈ ਕਿ ਜੇਕਰ ਇੱਥੇ ਸਟੇਸ਼ਨ ਨਹੀਂ ਬਣੇਗਾ ਤਾਂ ਇਸ ਨੂੰ ਢਾਹੁਣ ਦੀ ਕੀ ਜ਼ਰੂਰਤ ਹੈ। ਹਾਲਾਂਕਿ ਸਿਟੀ ਦਾ ਕਹਿਣਾ ਹੈ ਕਿ ਇਸ ਇਲਾਕੇ ਨੂੰ ਬਰਾਬਰ ਕਰਕੇ ਮੁੜ ਵਰਤੋਂ ਵਿਚ ਲਿਆਂਦਾ ਜਾਵੇਗਾ।

ਦੱਸ ਦਈਏ ਕਿ ਇਹ ਮਾਰਕਿਟ 1993 ਵਿਚ ਖੁੱਲ੍ਹੀ ਸੀ। ਸਿਟੀ ਦੀ ਸਿਫਾਰਿਸ਼ ਹੈ ਕਿ ਸਾਊਥਈਸਟ ਕੈਲਗਰੀ ਦੇ 160 Avenue ਵਿਚ ਨਵੇਂ ਕੈਲਗਰੀ ਇਵੈਂਟ ਸੈਂਟਰ ਵੱਲ ਰੇਲਵੇ ਲਾਈਨ ਵਧਾਈ ਜਾਵੇ ਜੋ ਡਾਊਨਟਾਊਨ ਤੋਂ ਹੁੰਦੀ ਹੋਈ 10 Avenue ਅਤੇ 2 Street SW ਵੱਲ ਜਾਵੇ। ਬੀਤੇ ਦਿਨ ਸਿਟੀ ਦੀ ਮੇਅਰ ਨੇ ਸੂਬੇ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੂੰ ਗ੍ਰੀਨ ਲਾਈਨ ਪ੍ਰੋਜੈਕਟ 'ਤੇ ਝਾਤੀ ਮਾਰਨ ਲਈ ਕੈਲਗਰੀ ਆਉਣ ਦਾ ਸੱਦਾ ਦਿੱਤਾ ਹੈ।