ਡੇਸਜਾਰਡਿਨਜ਼ ਡੇਟਾ ਲੀਕ ਮਾਮਲੇ ਦਾ ਮੁੱਖ ਸ਼ੱਕੀ ਸਪੇਨ ਵਿਚ ਗ੍ਰਿਫਤਾਰ, ਹਵਾਲਗੀ ਕਾਰਵਾਈ ਜਾਰੀ

ਕੈਨੇਡਾ ਦੀ ਕਿਊਬੈਕ ਬੇਸਡ ਵਿੱਤੀ ਸੇਵਾ ਸੰਸਥਾ ਡੇਸਜਾਰਡਿਨਜ਼ ਦੇ 9.7 ਮਿਲੀਅਨ ਮੈਂਬਰਾਂ ਦਾ ਨਿੱਜੀ ਡੇਟਾ ਲੀਕ ਹੋਣ ਦੇ ਮਾਮਲੇ ਵਿਚ ਲੋੜੀਂਦੇ ਮੁੱਖ ਮੁਲਜ਼ਮ ਨੂੰ ਸਪੇਨ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਕਿਊਬੈਕ ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ 40 ਸਾਲਾ ਜੁਆਨ ਪਾਬਲੋ ਸੇਰਾਨੋ ਨੂੰ ਇੰਟਰਪੋਲ ਦੀ ਮਦਦ ਨਾਲ ਹਿਰਾਸਤ ਵਿਚ ਲਿਆ ਗਿਆ।

ਮੁਲਜ਼ਮ ਇਸ ਵੇਲੇ ਸਪੇਨ ਵਿਚ ਹਿਰਾਸਤ ਵਿਚ ਹੈ ਅਤੇ ਉਸ ਨੂੰ ਕੈਨੇਡਾ ਵਾਪਸ ਲਿਆਉਣ ਲਈ ਹਵਾਲਗੀ ਦੀ ਕਾਰਵਾਈ ਚੱਲ ਰਹੀ ਹੈ। ਉਹ ਜੂਨ 2024 ਤੋਂ ਪੁਲਿਸ ਦੀ ਗ੍ਰਿਫ਼ਤ ਤੋਂ ਬਾਹਰ ਸੀ ਅਤੇ ਕਿਊਬੈਕ ਦੇ ਸਭ ਤੋਂ ਵੱਧ ਲੋੜੀਂਦੇ ਭਗੌੜਿਆਂ ਦੀ ਸੂਚੀ ਵਿਚ ਸ਼ਾਮਲ ਸੀ। ਪੁਲਿਸ ਅਨੁਸਾਰ, ਸੇਰਾਨੋ ਨੇ ਡੇਸਜਾਰਡਿਨਜ਼ ਦੇ ਇੱਕ ਸਾਬਕਾ ਕਰਮਚਾਰੀ ਤੋਂ ਚੋਰੀ ਕੀਤਾ ਹੋਇਆ ਡੇਟਾ ਖਰੀਦਿਆ ਸੀ ਅਤੇ ਫਿਰ ਉਸ ਦੀ ਵਰਤੋਂ ਕਈ ਤਰ੍ਹਾਂ ਦੇ ਫਰੌਡ ਕਰਨ ਲਈ ਕੀਤੀ ਸੀ। ਸਾਬਕਾ ਕਰਮਚਾਰੀ ਦੀ ਪਛਾਣ ਬੋਲੈਂਜਰ-ਡੋਰਵਾਲ ਵਜੋਂ ਹੋਈ ਸੀ।

ਉਹ ਡਾਟਾ ਚੋਰੀ ਵੇਲੇ ਡੇਸਜਾਰਡਿਨਜ਼ ਦੀ ਮਾਰਕੀਟਿੰਗ ਟੀਮ ਵਿਚ ਕੰਮ ਕਰਦਾ ਸੀ। ਦੋਸ਼ ਹੈ ਕਿ ਉਸ ਨੇ ਆਪਣੇ ਸਿਰ ਚੜ੍ਹੇ ਕਰਜ਼ੇ ਉਤਾਰਨ ਲਈ ਡੇਟਾ ਚੋਰੀ ਕੀਤਾ ਅਤੇ ਅੱਗੇ ਵੇਚ ਦਿੱਤਾ। ਬੋਲੈਂਜਰ-ਡੋਰਵਾਲ ਨੂੰ ਕਈ ਦੋਸ਼ਾਂ ਨਾਲ ਗ੍ਰਿਫਤਾਰ ਕੀਤਾ ਗਿਆ ਸੀ।