10.15C Vancouver 10.15C VancouverOct 22, 2025 2:00 PM - Connect Newsroom
ਕੈਨੇਡਾ ਦਾ ਘਾਟਾ ਇਸ ਫਿਸਕਲ ਸਾਲ ਵਿਚ $70 ਬਿਲੀਅਨ ਤੋਂ ਪਾਰ ਹੋਵੇਗਾ,ਡੇਸਜਾਰਡਿਨਜ਼ ਨੇ ਰਿਪੋਰਟ ਵਿਚ ਕਿਹਾ ਹੈ ਕਿ ਇਨਕਮ ਟੈਕਸ ਵਿਚ ਕਟੌਤੀ ਅਤੇ ਅਮਰੀਕਾ ਖਿਲਾਫ ਵਿਰੋਧੀ ਟੈਰਿਫ ਹਟਾਉਣ ਨਾਲ ਕੈਨੇਡਾ ਦੀ ਵਿੱਤੀ ਸਥਿਤੀ ਕਮਜ਼ੋਰ ਹੋਈ ਹੈ। 4 ਨਵੰਬਰ ਨੂੰ ਫੈਡਰਲ ਬਜਟ ਪੇਸ਼ ਹੋਣ ਤੋਂ ਪਹਿਲਾਂ ਜਾਰੀ ਇਸ ਨਵੀਂ ਰਿਪੋਰਟ ਵਿਚ ਡੇਸਜਾਰਡਿਨਜ਼ ਦੇ ਡਿਪਟੀ ਚੀਫ ਇਕਨਾਮਿਸਟ ਰੈਂਡਲ ਬਾਰਟਲੇਟ ਨੇ ਕਿਹਾ ਕਿ ਇਸ ਫਿਸਕਲ ਸਾਲ ਲਈ ਕੈਨੇਡਾ ਦਾ ਘਾਟਾ $74.5 ਬਿਲੀਅਨ ਤੱਕ ਪਹੁੰਚ ਸਕਦਾ ਹੈ।
ਇਹ ਅਨੁਮਾਨ ਸੰਸਦੀ ਬਜਟ ਅਧਿਕਾਰੀ ਦੇ ਹਾਲੀਆ ਅੰਦਾਜ਼ੇ ਨਾਲੋਂ ਲਗਭਗ 6 ਬਿਲੀਅਨ ਵੱਧ ਹੈ,ਨਾਲ ਹੀ ਮੰਦੀ ਤੇ ਸਰਬਵਿਆਪੀ ਮਹਾਂਮਾਰੀ ਦੇ ਸਮੇਂ ਨੂੰ ਛੱਡ ਕੇ ਕੈਨੇਡਾ ਪਹਿਲੀ ਵਾਰ ਇੰਨਾ ਵੱਡਾ ਘਾਟਾ ਦੇਖੇਗਾ। ਬਾਰਟਲੇਟ ਨੇ ਕਿਹਾ ਕਿ ਡਿਫੈਂਸ ਅਤੇ ਇਨਫਰਾਸਟਕਚਰ 'ਤੇ ਚੰਗੀ ਦਿਸ਼ਾ ਵਿਚ ਵੱਡਾ ਖ਼ਰਚ ਜਿੱਥੇ ਇਸ ਸਾਲ ਸਰਕਾਰ ਦਾ ਘਾਟਾ ਵਧਾਏਗਾ,ਉਥੇ ਹੀ ਇਨਕਮ ਟੈਕਸ ਘਟਾਉਣ ਅਤੇ ਜਵਾਬੀ ਟੈਰਿਫਸ ਹਟਾਉਣ ਦੇ ਫ਼ੈਸਲੇ ਛੋਟੇ ਸਮੇਂ ਵਿਚ ਆਰਥਿਕ ਵਿਕਾਸ ਨੂੰ ਸਹਾਰਾ ਦੇ ਸਕਦੇ ਹਨ ਪਰ ਉਸ ਕਾਰਨ ਹੋਣ ਵਾਲੀ ਆਮਦਨੀ ਦੀ ਘਾਟ ਆਰਥਿਕ ਲਾਭ ਤੋਂ ਵੱਧ ਹੋਵੇਗੀ।
ਬਾਰਟਲੇਟ ਨੇ ਚਿਤਾਵਨੀ ਦਿੱਤੀ ਕਿ ਕੈਨੇਡਾ ਨੂੰ ਆਪਣੀ ਮਜ਼ਬੂਤ ਗਲੋਬਲ ਕ੍ਰੈਡਿਟ ਰੇਟਿੰਗ ਨੂੰ ਹਲਕੇ ਵਿਚ ਨਹੀਂ ਲੈਣਾ ਚਾਹੀਦਾ ਕਿਉਂਕਿ ਅਮਰੀਕੀ ਵਪਾਰ ਅਨਿਸ਼ਚਿਤਤਾ ਤੋਂ ਅਰਥਵਿਵਸਥਾ ਨੂੰ ਲਗਾਤਾਰ ਜੋਖਮ ਔਟਵਾ ਦੀ ਕਰਜ਼ੇ ਦੀ ਸਥਿਤੀ 'ਤੇ ਹੋਰ ਦਬਾਅ ਪਾ ਸਕਦਾ ਹੈ।
