ਬੀ.ਸੀ. ਦੇ ਪ੍ਰੀਮੀਅਰ ਨੇ ਪਾਈਪਲਾਈਨ ਨੂੰ ਲੈ ਕੇ ਵਿਚਾਰ ਨਾ ਬਦਲਣ ਦਾ ਸੁਣਾਇਆ ਫੈਸਲਾ

ਪ੍ਰੀਮੀਅਰ ਡੇਵਿਡ ਈਬੀ ਨੇ ਕਿਹਾ ਹੈ ਕਿ ਉਹ ਬੀਸੀ ਵਿਚੋਂ ਨਵੀਂ ਤੇਲ ਪਾਈਪਲਾਈਨ ਨਹੀਂ ਲੰਘਣ ਦੇਣਗੇ। ਈਬੀ ਨੇ ਕਿਹਾ ਕਿ ਉਨ੍ਹਾਂ ਦਾ ਇਸ ਸਬੰਧੀ ਵਿਚਾਰ ਨਹੀਂ ਬਦਲਣ ਵਾਲਾ, ਇਸ ਟਿੱਪਣੀ ਨਾਲ ਉਨ੍ਹਾਂ ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਦੇ ਉਸ ਸੁਝਾਅ ਨੂੰ ਖਾਰਜ ਕਰ ਦਿੱਤਾ, ਜਿਸ ਵਿਚ ਫੋਰਡ ਨੇ ਕਿਹਾ ਸੀ ਕਿ ਈਬੀ ਨਵੀਂ ਤੇਲ ਪਾਈਪਲਾਈਨ ਲਈ ਆਪਣਾ ਵਿਚਾਰ ਬਦਲਣਗੇ।

ਈਬੀ ਨੇ ਕਿਹਾ ਕਿ ਪਹਿਲਾਂ ਹੀ ਟ੍ਰਾਂਸ ਮਾਊਂਟੇਨ ਪਾਈਪਲਾਈਨ ਬੀਸੀ ਵਿਚੋਂ ਹੋ ਕੇ ਲੰਘ ਰਹੀ ਹੈ ਅਤੇ ਸੂਬਾ ਦੂਜੀ ਪਾਈਪਲਾਈਨ ਲਈ ਆਪਣੇ ਉੱਤਰੀ ਤੱਟ 'ਤੇ ਤੇਲ ਟੈਂਕਰ ਦੀ ਪਾਬੰਦੀ ਹਟਾਉਣ ਦੇ ਪੱਖ ਵਿਚ ਨਹੀਂ ਹੈ। ਫੋਰਡ ਨੇ ਸੋਮਵਾਰ ਪ੍ਰੀਮੀਅਰ ਦੀ ਪ੍ਰਧਾਨ ਮੰਤਰੀ ਮਾਰਕ ਨਾਲ ਬੈਠਕ ਲਈ ਜਾਂਦੇ ਸਮੇਂ ਕਿਹਾ ਸੀ ਕਿ ਉਨ੍ਹਾਂ ਨੂੰ ਵਿਸ਼ਵਾਸ ਹੈ ਕਿ ਈਬੀ ਅਤੇ ਕਾਰਨੀ ਦੂਜੀ ਪਾਈਪਲਾਈਨ ਦੇ ਸਬੰਧ ਵਿਚ ਚੀਜ਼ਾਂ ਨੂੰ ਸੁਲਝਾ ਲੈਣਗੇ।

ਦੱਸ ਦੇਈਏ ਕਿ ਈਬੀ- ਏਸ਼ੀਆ ਦੇ ਟਰੇਡ ਮਿਸ਼ਨ 'ਤੇ ਹਨ ਤੇ ਉਨ੍ਹਾਂ ਜਾਪਾਨ ਦੌਰੇ ਤੋਂ ਇਹ ਬਿਆਨ ਜਾਰੀ ਕੀਤਾ, ਉਨ੍ਹਾਂ ਇਹ ਵੀ ਦੱਸਿਆ ਕਿ ਜਾਪਾਨ ਦੀਆਂ ਕੰਪਨੀਆਂ ਨੇ ਸੂਬੇ ਦੇ ਐਲਐਨਜੀ ਅਤੇ ਹੋਰ ਮਹੱਤਵਪੂਰਨ ਖਣਿਜਾਂ ਵਿਚ ਦਿਲਚਸਪੀ ਦਿਖਾਈ ਹੈ।