ਟੇਲਰ ਸਵਿਫਟ ਦੇ ਟੂਰ ਨਾਲ ਵੈਨਕੂਵਰ ਦੀ ਆਰਥਿਕਤਾ ਨੂੰ ਲਾਭ ਦੀ ਉਮੀਦ

ਵੈਨਕੂਵਰ ਵਿਚ ਟੇਲਰ ਸਵਿਫਟ ਦੇ ਇਰਾਸ ਟੂਰ ਨਾਲ ਰਿਹਾਇਸ਼, ਭੋਜਨ ਅਤੇ ਆਵਾਜਾਈ ਦੀ ਮੰਗ ਵਧਣ ਨਾਲ ਸ਼ਹਿਰ ਦੀ ਆਰਥਿਕਤਾ ਨੂੰ $157 ਮਿਲੀਅਨ ਦਾ ਫਾਇਦਾ ਹੋਣ ਦੀ ਉਮੀਦ ਹੈ। ਟੂਰਿਜ਼ਮ ਸੰਸਥਾ ਡੈਸਟੀਨੇਸ਼ਨ ਵੈਨਕੂਵਰ ਨੇ ਇਹ ਅਨੁਮਾਨ ਲਗਾਇਆ ਹੈ।

ਟੇਲਰ ਸਵਿਫਟ ਦੇ 6 ਤੋਂ 8 ਦਸੰਬਰ ਤੱਕ ਬੀ.ਸੀ ਪਲੇਸ ਵਿਚ ਹੋਣ ਵਾਲੇ ਤਿੰਨ ਸ਼ੋਅ ਵਿਚ 150,000 ਤੋਂ ਵੱਧ ਪ੍ਰਸ਼ੰਸਕਾਂ ਦੇ ਪਹੁੰਚਣ ਦੀ ਉਮੀਦ ਹੈ ਅਤੇ ਉੱਥੇ ਹੀ, ਇਸ ਦੇ ਮੱਦੇਨਜ਼ਰ ਸ਼ਹਿਰ ਭਰ ਵਿਚ 82,000 ਤੋਂ ਵੱਧ ਕਮਰੇ ਬੁੱਕ ਹੋਏ ਹਨ।

ਡੈਸਟੀਨੇਸ਼ਨ ਵੈਨਕੂਵਰ ਦਾ ਕਹਿਣਾ ਹੈ ਕਿ ਇਸ ਨਾਲ ਨਾ ਸਿਰਫ ਸਿਟੀ ਨੂੰ ਫਾਇਦਾ ਹੋਵੇਗਾ ਸਗੋਂ ਸੂਬਾ ਅਤੇ ਫੈਡਰਲ ਸਰਕਾਰ ਨੂੰ ਮਿਲਾ ਕੇ ਤਿੰਨਾਂ ਪੱਧਰਾਂ ਦੀ ਸਰਕਾਰ ਦੇ ਖਜ਼ਾਨੇ ਵਿਚ ਟੈਕਸ ਦੇ ਰੂਪ ਵਿਚ $27 ਮਿਲੀਅਨ ਆਉਣ ਦੀ ਉਮੀਦ ਹੈ।

ਮੇਅਰ ਕੇਨ ਸਿਮ ਨੇ ਕਿਹਾ ਕਿ ਉਹ ਇਸ ਗੱਲ ਤੋਂ ਖੁਸ਼ ਹਨ ਕਿ ਟੇਲਰ ਸਵਿਫਟ ਨੇ ਆਪਣੇ ਆਖਰੀ ਸਟਾਪ ਵਿਚ ਵੈਨਕੂਵਰ ਨੂੰ ਚੁਣਿਆ ਹੈ। ਉਥੇ ਹੀ, ਮਿਊਜ਼ਿਕ ਸੁਪਰਸਟਾਰ ਕੈਟੀ ਪੇਰੀ ਨੇ 8 ਸਾਲਾਂ ਵਿਚ ਆਪਣੇ ਪਹਿਲੇ ਕੈਨੇਡੀਅਨ ਟੂਰ ਦੀ ਘੋਸ਼ਣਾ ਕੀਤੀ ਹੈ, ਉਹ ਅਗਲੇ ਸਾਲ ਗਰਮੀਆਂ ਵਿਚ ਵੈਨਕੂਵਰ, ਐਡਮਿਨਟਨ ਸਮੇਤ ਕਈ ਸ਼ਹਿਰਾਂ ਵਿਚ ਸ਼ੋਅ ਕਰਨ ਵਾਲੀ ਹਨ।