ਫੀਫਾ ਵਰਲਡ ਕੱਪ ਦੀ ਮੇਜ਼ਬਾਨੀ ਮਿਲਦੀ ਤਾਂ ਐਡਮਿੰਟਨ ਨੂੰ ਹੁੰਦਾ ਵੱਡਾ ਆਰਥਿਕ ਨੁਕਸਾਨ- ਮਾਹਿਰ

ਫੀਫਾ ਵਰਲਡ ਕੱਪ ਦੀ ਮੇਜ਼ਬਾਨੀ ਨਾ ਮਿਲਣ 'ਤੇ ਐਡਮਿੰਟਨ ਨੂੰ ਖ਼ੁਸ਼ ਹੋਣਾ ਚਾਹੀਦਾ ਹੈ। ਇਕਨੋਮਿਕਸ ਦੇ ਇੱਕ ਪ੍ਰੋਫੈਸਰ ਨੇ ਇਹ ਗੱਲ ਆਖੀ।

ਪ੍ਰੋਫੈਸਰ ਦਾ ਕਹਿਣਾ ਹੈ ਕਿ ਐਡਮਿੰਟਨ ਨੂੰ ਖ਼ੁਸ਼ੀ ਹੋਣੀ ਚਾਹੀਦੀ ਹੈ ਕਿ ਉਸ ਨੂੰ 2026 ਦੇ ਫੀਫਾ ਵਰਲਡ ਕੱਪ ਦੇ ਆਯੋਜਨ ਲਈ ਨਹੀਂ ਚੁਣਿਆ ਗਿਆ। ਕੋਨਕੋਰਡੀਆ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਮੋਸ਼ੇ ਲੈਂਡਰ ਨੇ ਕਿਹਾ ਕਿ ਇਸ ਦਾ ਆਯੋਜਨ ਆਰਥਿਕ ਲਾਭਾਂ ਨਾਲੋਂ ਕਿਤੇ ਮਹਿੰਗਾ ਪੈਣਾ ਸੀ।

ਗੌਰਤਲਬ ਹੈ ਕਿ ਫੀਫਾ ਨੇ ਵੀਰਵਾਰ ਨੂੰ ਐਲਾਨ ਕੀਤਾ ਕਿ 48-ਟੀਮਾਂ ਦੇ ਟੂਰਨਾਮੈਂਟ ਵੈਨਕੂਵਰ ਤੇ ਟੋਰਾਂਟੋ ਸਣੇ ਉੱਤਰੀ ਅਮਰੀਕਾ ਦੇ 16 ਸ਼ਹਿਰਾਂ ਵਿਚ ਖੇਡੇ ਜਾਣਗੇ। ਇਨ੍ਹਾਂ ਵਿਚੋਂ 11 ਸ਼ਹਿਰ ਇਕੱਲੇ ਅਮਰੀਕਾ ਦੇ ਹਨ, ਜਦੋਂ ਕਿ 3 ਮੈਕਸੀਕੋ ਦੇ ਹਨ, ਜਿੱਥੇ ਟੂਰਨਾਮੈਂਟ ਹੋਣੇ ਹਨ।

ਦੱਸ ਦੇਈਏ ਕਿ ਇਸ ਸਾਲ ਦੇ ਸ਼ੁਰੂ ਵਿਚ ਐਲਬਰਟਾ ਸਰਕਾਰ ਨੇ ਐਡਮਿੰਟਨ ਵਿਚ 5 ਖੇਡਾਂ ਖੇਡੀਆਂ ਜਾਣ ਦੀ ਸ਼ਰਤ ਨਾਲ 110 ਮਿਲੀਅਨ ਡਾਲਰ ਦਾ ਫੰਡ ਦੇਣ ਦਾ ਐਲਾਨ ਕੀਤਾ ਸੀ। ਪ੍ਰੋਫੈਸਰ ਲੈਂਡਰ ਨੇ ਕਿਹਾ ਕਿ ਉਨ੍ਹਾਂ ਦਾ ਮੰਨਣਾ ਹੈ ਕਿ ਇਸੇ ਸ਼ਰਤ ਕਾਰਨ ਐਡਮਿੰਟਨ ਨੂੰ ਨਹੀਂ ਚੁਣਿਆ ਗਿਆ।