ਕੰਜ਼ਰਵੇਟਿਵ ਐਮ.ਪੀ. ਮੈਟ ਜੇਨੇਰੋਕਸ ਨੇ ਆਪਣੇ ਅਹੁਦੇ ਤੋਂ ਦਿੱਤਾ ਅਸਤੀਫਾ

ਕੰਜ਼ਰਵੇਟਿਵ ਐਮ.ਪੀ. ਮੈਟ ਜੇਨੇਰੋਕਸ ਨੇ ਐਲਾਨ ਕੀਤਾ ਹੈ ਕਿ ਉਹ ਆਪਣੇ ਅਹੁਦੇ ਤੋਂ ਅਸਤੀਫ਼ਾ ਦੇ ਰਹੇ ਹਨ। ਉਨ੍ਹਾਂ ਦਾ ਅਸਤੀਫਾ 2026 ਦੇ ਸਪਰਿੰਗ ਵਿਚ ਪ੍ਰਭਾਵੀ ਹੋਣ ਦੀ ਉਮੀਦ ਹੈ।ਜੇਨੇਰੋਕਸ ਨੇ ਇਸ ਪਿੱਛੇ ਪਰਿਵਾਰ ਨੂੰ ਸਮਾਂ ਦੇਣ ਦੀ ਇੱਛਾ ਦਾ ਕਾਰਨ ਦੱਸਿਆ ਹੈ। ਇਹ ਐਲਾਨ ਉਨ੍ਹਾਂ ਅਫਵਾਹਾਂ ਤੋਂ ਬਾਅਦ ਆਇਆ ਹੈ ਕਿ ਉਹ ਲਿਬਰਲ ਜੁਆਇੰਨ ਕਰ ਸਕਦੇ ਹਨ ਪਰ ਜੇਨੇਰੋਕਸ ਅਤੇ ਪਾਰਟੀ ਅਧਿਕਾਰੀ ਨੇ ਇਸ ਨੂੰ ਇਨਕਾਰ ਕੀਤਾ ਹੈ ਕਿ ਉਨ੍ਹਾਂ 'ਤੇ ਪਾਰਟੀ ਅੰਦਰ ਕੋਈ ਦਬਾਅ ਸੀ, ਉਨ੍ਹਾਂ ਕਿਹਾ ਕਿ ਇਹ ਉਨ੍ਹਾਂ ਦਾ ਨਿੱਜੀ ਫੈਸਲਾ ਸੀ।

ਉਨ੍ਹਾਂ ਦੇ ਅਸਤੀਫੇ ਦੇ ਅਧਿਕਾਰਤ ਤੌਰ 'ਤੇ ਪ੍ਰਭਾਵੀ ਹੋਣ ਮਗਰੋਂ ਐਡਮਿੰਟਨ ਰਿਵਰਬੈਂਡ ਰਾਈਡਿੰਗ ਵਿਚ ਉਪ-ਚੋਣ ਹੋਵੇਗੀ, ਜਿਥੋਂ ਉਹ ਪਹਿਲੀ ਵਾਰ 2015 ਵਿਚ ਐਮ.ਪੀ.ਬਣੇ ਸਨ। ਭਾਵੇਂ ਕੰਜ਼ਰਵੇਟਿਵ ਸੰਭਾਵਿਤ ਤੌਰ 'ਤੇ ਐਡਮਿੰਟਨ ਦੀ ਜ਼ਿਮਨੀ ਚੋਣ ਵਿਚ ਉਨ੍ਹਾਂ ਦੀ ਰਾਈਡਿੰਗ ਮੁੜ ਹਾਸਲ ਕਰ ਲੈਣਗੇ ਪਰ ਜੇਨੇਰੋਕਸ ਦਾ ਪਾਰਟੀ ਵਿਚੋਂ ਬਾਹਰ ਜਾਣਾ ਪੋਲੀਐਵ ਲਈ ਇੱਕ ਸੰਵੇਦਨਸ਼ੀਲ ਸਮੇਂ 'ਤੇ ਆਇਆ ਹੈ, ਜੋ ਜਨਵਰੀ ਵਿਚ ਲੀਡਰਸ਼ਿਪ ਰਿਵਿਊ ਦਾ ਸਾਹਮਣਾ ਕਰਨ ਵਾਲੇ ਹਨ ਅਤੇ ਹਾਲ ਹੀ ਵਿਚ ਪਾਰਟੀ ਦੇ ਸੰਸਦ ਮੈਂਬਰ ਕ੍ਰਿਸ ਡੀ'ਐਂਟਰਮੋਂਟ ਲਿਬਰਲ ਕਾਕਸ ਵਿਚ ਸ਼ਾਮਲ ਹੋਏ ਹਨ।