ਜੀਨ ਕਾਸਟੇਕਸ ਦੀ ਥਾਂ 61 ਸਾਲਾ ਬੋਰਨ ਫਰਾਂਸ ਦੀ ਨਵੀਂ ਪ੍ਰਧਾਨ ਮੰਤਰੀ ਨਿਯੁਕਤ

ਸੋਮਵਾਰ ਨੂੰ ਫਰਾਂਸ ਦੀ ਨਵੀਂ ਪ੍ਰਧਾਨ ਮੰਤਰੀ ਵਜੋਂ ਐਲਿਸਾਬੇਥ ਬੋਰਨ ਨੂੰ ਨਿਯੁਕਤ ਕੀਤਾ ਗਿਆ ਅਤੇ ਦੇਸ਼ ਵਿਚ ਇਸ ਅਹੁਦੇ 'ਤੇ ਪਹੁੰਚਣ ਵਾਲੀ ਉਹ ਦੂਜੀ ਔਰਤ ਹੈ। 61 ਸਾਲਾ ਬੋਰਨ, ਜੀਨ ਕਾਸਟੇਕਸ ਦੀ ਥਾਂ ਲੈਣਗੇ, ਜਿਨ੍ਹਾਂ ਦੇ ਪਿਛਲੇ ਮਹੀਨੇ ਇਮੈਨੁਅਲ ਮੈਕਰੋਨ ਦੇ ਮੁੜ ਰਾਸ਼ਟਰਪਤੀ ਚੁਣੇ ਜਾਣ ਤੋਂ ਬਾਅਦ ਅਸਤੀਫਾ ਦੇਣ ਦੀ ਉਮੀਦ ਸੀ।

ਮੈਕਰੋਨ ਅਤੇ ਬੋਰਨ ਆਉਣ ਵਾਲੇ ਦਿਨਾਂ ਵਿਚ ਪੂਰੀ ਸਰਕਾਰ ਦਾ ਗਠਨ ਕਰਨਗੇ। ਬੋਰਨ, ਐਡੀਥ ਕ੍ਰੇਸਨ ਤੋਂ ਬਾਅਦ ਇਹ ਅਹੁਦਾ ਸੰਭਾਲਣ ਵਾਲੀ ਦੂਜੀ ਔਰਤ ਹੈ। ਕ੍ਰੇਸਨ 1991-1992 ਵਿਚ ਸੋਸ਼ਲਿਸਟ ਪ੍ਰੇਜ਼ੀਡੈਂਟ ਫ੍ਰਾਂਕੋਇਸ ਮਿਟਰੈਂਡ ਦੇ ਹੁੰਦੇ ਪ੍ਰਧਾਨ ਮੰਤਰੀ ਸਨ।

ਐਲਿਸਾਬੇਥ ਬੋਰਨ ਨੇ 2020 ਤੋਂ ਮੈਕਰੋਨ ਦੀ ਪਿਛਲੀ ਸਰਕਾਰ ਵਿਚ ਲੇਬਰ ਮੰਤਰੀ ਦੇ ਤੌਰ 'ਤੇ ਕੰਮ ਕੀਤਾ ਹੈ। ਇਸ ਤੋਂ ਪਹਿਲਾਂ ਉਹ ਟਰਾਂਸਪੋਰਟ ਮੰਤਰੀ ਸੀ ਅਤੇ ਫਿਰ ਮੈਕਰੋਨ ਸਰਕਾਰ ਵਿਚ ਉਹ ਈਕੋਲੋਜੀਕਲ ਟ੍ਰਾਂਜੀਸ਼ਨ ਮੰਤਰੀ ਵੀ ਬਣੇ ਸਨ। ਗੌਰਤਲਬ ਹੈ ਕਿ ਸੋਮਵਾਰ ਨੂੰ ਫਰਾਂਸ ਦੇ ਪ੍ਰਧਾਨ ਮੰਤਰੀ ਜੀਨ ਕਾਸਟੇਕਸ ਨੇ ਅਸਤੀਫਾ ਦੇ ਦਿੱਤਾ ਸੀ।