ਡਾਕਟਰਾਂ ਨੇ ਐਲਬਰਟਾ ਦੇ ਪ੍ਰੀਮੀਅਰ ਨੂੰ ਮਰੀਜ਼ਾਂ ਦੇ ਹਾਲਾਤ ਦੇਖਣ ਦੀ ਦਿੱਤੀ ਚੁਣੌਤੀ

ਐਲਬਰਟਾ ਦੇ ਡਾਕਟਰ ਐਸੋਸੀਏਸ਼ਨ ਦੇ ਐਮਰਜੈਂਸੀ ਮੈਡੀਸਨ ਦੇ ਮੁਖੀ ਡਾ.ਵਾਰੇਨ ਥਿਰਸਕ ਨੇ ਪ੍ਰੀਮੀਅਰ ਡੈਨੀਅਲ ਸਮਿਥ ਨੂੰ ਆਪਣੇ ਨਾਲ ਹਸਪਤਾਲ ਦੀ ਸ਼ਿਫਟ 'ਤੇ ਆਉਣ ਦੀ ਚਣੌਤੀ ਦਿੱਤੀ ਹੈ। ਉਨ੍ਹਾਂ ਨੇ ਇਹ ਚੁਣੌਤੀ ਹਾਲਵੇਅ ਵਿੱਚ ਘੰਟਿਆਂ ਤੱਕ ਆਪਣੀ ਵਾਰੀ ਦੀ ਉਡੀਕ ਕਰਨ ਵਾਲੇ ਮਰੀਜ਼ਾਂ ਦੀ ਮਜਬੂਰੀ ਅਤੇ ਨਿਰਾਸ਼ਾ ਨੂੰ ਸਾਹਮਣੇ ਆ ਕੇ ਦੇਖਣ ਲਈ ਦਿੱਤੀ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜਦੋਂ ਤੱਕ ਤੁਸੀਂ ਇਸ ਦਾ ਅਨੁਭਵ ਨਹੀਂ ਕਰਦੇ ਤੁਸੀਂ ਉਨ੍ਹਾਂ ਦੀ ਸਥਿਤੀ ਨੂੰ ਨਹੀਂ ਸਮਝ ਸਕਦੇ।

ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਜੇ ਖੁਦ ਪ੍ਰੀਮੀਅਰ ਨੂੰ ਕੋਈ ਸਿਹਤ ਐਮਰਜੈਂਸੀ ਹੁੰਦੀ ਹੈ ਤਾਂ ਕੀ ਉਹ ਮੇਰੇ ਵੇਟਿੰਗ ਰੂਮ ਵਿੱਚ ਬੈਠ ਕੇ 13 ਘੰਟੇ ਉਡੀਕ ਕਰਨਗੇ? ਜ਼ਿਕਰਯੋਗ ਹੈ ਕਿ ਡਾ.ਥਿਰਸਕ ਨੇ ਇਹ ਚੁਣੌਤੀ ਮੈਡੀਕਲ ਐਸੋਸੀਏਸ਼ਨ ਵੱਲੋਂ ਜਾਰੀ ਕੀਤੀ ਮਰੀਜ਼ਾਂ ਦੇ ਤਜ਼ਰਬਿਆਂ ਵਾਲੀ ਇੱਕ ਰਿਪੋਰਟ ਦੇ ਮੱਦੇਨਜ਼ਰ ਦਿੱਤੀ ਹੈ। ਡਾ.ਥਿਰਸਕ ਨੇ ਆਪਣੇ ਇੱਕ ਨਿੱਜੀ ਤਜਰਬੇ ਨੂੰ ਸਾਂਝਾ ਕਰਦੇ ਹੋਏ ਦੱਸਿਆ ਕਿ ਇੱਕ ਦਿਨ ਸਵੇਰੇ 6 ਵਜੇ ਉਹ ਆਪਣੀ ਸ਼ਿਫਟ ‘ਤੇ ਪਹੁੰਚੇ ਤਾਂ ਹਾਲਵੇਅ ਮਰੀਜ਼ਾਂ ਨਾਲ ਭਰਿਆ ਹੋਇਆ ਸੀ। ਇਨ੍ਹਾਂ ਵਿੱਚ ਕਈ ਮਰੀਜ਼ 14 ਘੰਟੇ ਤੋਂ ਉਡੀਕ ਕਰ ਰਹੇ ਸਨ।

ਇਨ੍ਹਾਂ ਵਿੱਚ ਇੱਕ ਮਰੀਜ਼ ਦੀ ਕਮਰ ਟੁੱਟੀ ਹੋਣ ਦੇ ਬਾਵਜੂਦ ਚਾਰ ਘੰਟੇ ਤੋਂ ਉਡੀਕ ਕਰ ਰਿਹਾ ਸੀ ਜਦੋਂ ਕਿ ਉਸ ਨੂੰ ਐਮਰਜੈਸੀ ਵਿੱਚ ਓਪਰੇਸ਼ਨ ਦੀ ਲੋੜ ਸੀ। ਉਨ੍ਹਾਂ ਕਿਹਾ ਕਿ ਮਰੀਜ਼ਾਂ ਦੀ ਐਸੀ ਹਾਲਤ ਨੂੰ ਦੇਖਣਾ ਬਹੁਤ ਦੁਖਦ ਹੈ। ਉਨ੍ਹਾਂ ਮੁਤਾਬਕ ਹਸਪਤਾਲਾਂ ਵਿੱਚ ਲਗਾਤਾਰ ਉਡੀਕ ਸਮੇਂ ਵਿੱਚ ਵਾਧਾ ਹੁੰਦਾ ਜਾ ਰਿਹਾ ਹੈ। ਕਈ ਮਰੀਜ਼ ਲੰਮੀ ਉਡੀਕ ਬਾਅਦ ਬਿਨਾਂ ਇਲਾਜ ਹਾਲਵੇਅ ਛੱਡ ਕੇ ਜਾਂਦੇ ਵੀ ਦੇਖੇ ਜਾ ਸਕਦੇ ਹਨ। ਅਜਿਹੀ ਸਥਿਤੀ ਵਿੱਚ ਉਨ੍ਹਾਂ ਦੀ ਸਿਹਤ ਹੋਰ ਵਿਗੜ ਸਕਦੀ ਹੈ। ਸਰਕਾਰ ਨੂੰ ਇਸ ਮਾਮਲੇ ‘ਤੇ ਵਿਚਾਰ ਕਰਨ ਦੀ ਲੋੜ ਹੈ। ਮਰੀਜ਼ਾਂ ਦੇ ਉਡੀਕ ਸਮੇਂ ਨੂੰ ਘਟਾਉਣ ਵੱਲ ਲੋੜੀਂਦੇ ਕਦਮ ਚੁੱਕਣ ਦੀ ਜ਼ਰੂਰਤ ਹੈ।