15.39C Vancouver 15.39C VancouverMay 30, 2025 6:06 PM - Connect Newsroom
ਪ੍ਰੀਮੀਅਰ ਡੇਵਿਡ ਈਬੀ ਵਲੋਂ 1 ਜੂਨ ਤੋਂ ਸ਼ੁਰੂ ਕੀਤੇ ਜਾਣ ਵਾਲੇ ਏਸ਼ੀਆ ਦੇ 10 ਦਿਨਾਂ ਦੌਰੇ ਨੂੰ ਮਾਹਰਾਂ ਨੇ ਬਹੁਤ ਮਹੱਤਵਪੂਰਨ ਕਰਾਰ ਦਿੱਤਾ ਹੈ। ਯੂਨੀਵਰਸਿਟੀ ਆਫ਼ ਬੀ.ਸੀ. ਦੇ ਲਿਊ ਇੰਸਟੀਚਿਊਟ ਫਾਰ ਗਲੋਬਲ ਇਸ਼ੂਜ਼ ਦੇ ਡਾਇਰੈਕਟਰ ਤੇ ਪ੍ਰੋਫੈਸਰ ਕ੍ਰਿਸਟਨ ਹੋਪਵੈੱਲ ਨੇ ਸਾਡੀ ਭੂਗੋਲਿਕ ਸਥਿਤੀ ਕਾਰਨ ਹੁਣ ਤੱਕ ਸਾਡੇ ਬੀਸੀ ਅਤੇ ਕੈਨੇਡਾ ਦੀਆਂ ਕੰਪਨੀਆਂ ਲਈ ਏਸ਼ੀਆਈ ਬਾਜ਼ਾਰ ਦੀ ਤੁਲਨਾ ਵਿਚ ਅਮਰੀਕਾ ਨਾਲ ਵਪਾਰ ਕਰਨਾ ਬਹੁਤ ਸੌਖਾ ਰਿਹਾ ਹੈ ਤੇ ਸਾਡੇ ਵਪਾਰ ਦਾ ਲਗਭਗ 50 ਫੀਸਦੀ ਅਮਰੀਕਾ ਨੂੰ ਜਾਂਦਾ ਰਿਹਾ ਹੈ, ਜੋ ਸਾਡੇ ਲਈ ਇਸ ਵਕਤ ਸਭ ਤੋਂ ਵੱਡੀ ਕਮਜ਼ੋਰੀ ਹੈ।
ਉਨ੍ਹਾਂ ਕਿਹਾ ਕਿ ਈਬੀ ਦੇ ਏਸ਼ੀਆ ਟਰੇਡ ਮਿਸ਼ਨ ਨਾਲ ਸਾਨੂੰ ਹੋਰ ਬਜ਼ਾਰਾਂ ਵਿਚ ਪਹੁੰਚ ਮਿਲਣ ਦੀ ਉਮੀਦ ਹੈ, ਜਿਸ ਨਾਲ ਸੂਬਾ ਆਪਣੇ ਵਪਾਰ ਦੀ ਅਮਰੀਕਾ 'ਤੇ ਨਿਰਭਰਤਾ ਨੂੰ ਘਟਾ ਸਕੇਗਾ।
ਗੌਰਤਲਬ ਹੈ ਕਿ ਈਬੀ ਵਪਾਰ ਮਿਸ਼ਨ ਦੌਰਾਨ ਜਾਪਾਨ, ਦੱਖਣੀ ਕੋਰੀਆ ਅਤੇ ਮਲੇਸ਼ੀਆ ਦਾ ਦੌਰਾ ਕਰਨਗੇ, ਉਨ੍ਹਾਂ ਨਾਲ ਖੇਤੀਬਾੜੀ ਮੰਤਰੀ ਲਾਨਾ ਪੋਪਹੈਮ, ਏਸ਼ੀਆ-ਪ੍ਰਸ਼ਾਂਤ ਵਪਾਰ ਦੇ ਸੰਸਦੀ ਸਕੱਤਰ ਪਾਲ ਚੋਈ ਅਤੇ ਸੂਬੇ ਦੇ ਪ੍ਰਮੁੱਖ ਕਾਰੋਬਾਰੀ ਲੀਡਰਸ ਹੋਣਗੇ। ਗੌਰਤਲਬ ਹੈ ਕਿ ਜਾਪਾਨ ਮੌਜੂਦਾ ਸਮੇਂ ਬੀਸੀ ਦਾ ਤੀਜਾ ਅਤੇ ਦੱਖਣੀ ਕੋਰੀਆ ਚੌਥਾ ਵੱਡਾ ਵਪਾਰਕ ਭਾਈਵਾਲ ਹੈ। ਉਥੇ ਹੀ, ਮਲੇਸ਼ੀਆ ਨਾਲ ਬੀਸੀ ਇਸ ਸਮੇਂ ਕੋਈ ਬਹੁਤਾ ਵਪਾਰ ਨਹੀਂ ਕਰਦਾ ਹੈ।
