ਪਰਿਵਾਰ ਅਤੇ ਦੋਸਤਾਂ ਵੱਲੋਂ ਨੀਰਜ ਦੇ ਜੱਦੀ ਪਿੰਡ ਪਰਤਣ ਦਾ ਇੰਤਜ਼ਾਰ, ਕੀਤੀ ਸ਼ਾਨਦਾਰ ਜਸ਼ਨ ਦੀ ਤਿਆਰੀ

ਓਲੰਪਿਕਸ ਵਿੱਚ ਸੋਨ ਤਮਗ਼ਾ ਜਿੱਤਣ ਵਾਲੇ ਨੀਰਜ ਚੋਪੜਾ ਦੇ ਅੱਜ ਮੰਗਲਵਾਰ ਨੂੰ ਪਾਨੀਪਤ ਦੇ ਸਮਾਲਖਾ ਵਿੱਚ ਆਪਣੇ ਘਰ ਲਈ ਰਵਾਨਾ ਹੋਣ 'ਤੇ, ਪਰਿਵਾਰ ਵੱਲੋਂ ਤਕਰੀਬਨ 30 ਹਜ਼ਾਰ ਲੋਕਾਂ ਦੇ ਇਕੱਠ ਵਾਲੇ ਵੱਡੇ ਜਸ਼ਨ ਦਾ ਪ੍ਰਬੰਧ ਕੀਤਾ ਗਿਆ ਹੈ।

ਟੋਕੀਓ ਓਲੰਪਿਕਸ ਵਿੱਚ ਮੈਡਲ ਜਿੱਤਣ ਤੋਂ ਬਾਅਦ, ਨੀਰਜ ਪਹਿਲੀ ਵਾਰੀ ਆਪਣੇ ਜੱਦੀ ਸ਼ਹਿਰ ਜਾਣਗੇ।

ਇਸ ਸ਼ਾਨਦਾਰ ਜਸ਼ਨ ਵਿੱਚ ਸਾਰਾ ਪਿੰਡ ਅਤੇ ਦੂਰ ਦੇ ਰਿਸ਼ਤੇਦਾਰ ਵੀ ਸੱਦੇ ਗਏ ਹਨ।

"ਉਸਦਾ ਸ਼ਾਨਦਾਰ ਸਵਾਗਤ ਕੀਤਾ ਜਾਵੇਗਾ, ਮੈਂ ਉਸ ਲਈ 'ਚੂਰਮਾ' ਬਣਾ ਕੇ ਰੱਖਿਆ ਹੈ। ਅਸੀਂ ਉਸਦਾ ਸੋਨ ਤਮਗ਼ਾ ਮੰਦਿਰ ਵਿੱਚ ਰਖਾਂਗੇ, ਕਿਉਂਕਿ ਰੱਬ ਦੀ ਮਿਹਰ ਸਦਕਾ ਹੀ ਉਹ ਏਨੀ ਉਚਾਈ 'ਤੇ ਪੁੱਜਾ ਹੈ। ਮੈਂ ਉਸਦੇ ਪੁੱਜਣ ਦਾ ਇੰਤਜ਼ਾਰ ਕਰ ਰਹੀ ਹਾਂ,"ਨੀਰਜ ਦੀ ਮਾਂ ਸਰੋਜ ਦੇਵੀ ਨੇ ਆਖਿਆ।

ਨੀਰਜ ਦੇ ਇੱਕ ਦੂਰ ਦੇ ਰਿਸ਼ਤੇਦਾਰ ਨੇ ਆਖਿਆ:"ਅਸੀਂ ਸਾਰੀਆਂ ਤਿਆਰੀਆਂ ਕਰ ਲਈਆਂ ਹਨ। ਸਵਾਗਤ ਸ਼ਾਨਦਾਰ ਤਰੀਕੇ ਕੀਤਾ ਜਾਵੇਗਾ ਅਤੇ ਸਾਰੇ ਰਿਸ਼ਤੇਦਾਰ ਤੇ ਸਾਰੇ ਪਿੰਡ ਨੂੰ ਸੱਦਾ ਦਿੱਤਾ ਗਿਆ ਹੈ। ਸੋਨ ਤਮਗ਼ੇ ਨੂੰ ਮੰਦਿਰ 'ਚ ਰੱਖ ਕੇ ਕੁਝ ਰੀਤੀ-ਰਿਵਾਜ਼ ਕੀਤੇ ਜਾਣਗੇ। ਤਕਰੀਬਨ 25 ਤੋਂ 30 ਹਜ਼ਾਰ ਲੋਕਾਂ ਲਈ ਖਾਣਾ ਤਿਆਰ ਕੀਤਾ ਗਿਆ ਹੈ, ਜਿਸਨੂੰ ਤਕਰੀਬਨ 150 ਲੋਕਾਂ ਵੱਲੋਂ ਤਿਆਰ ਕੀਤਾ ਗਿਆ ਹੈ। ਜਿਸ ਦਿਨ ਦਾ ਉਹ ਤਮਗ਼ਾ ਜਿੱਤਿਆ ਹੈ, ਸਾਰੇ ਪਿੰਡ 'ਚ ਹੀ ਜਸ਼ਨ ਵਰਗਾ ਮਾਹੌਲ ਹੈ।"

ਨੀਰਜ ਨੇ ਟੋਕੀਓ ਓਲੰਪਿਕਸ ਵਿੱਚ ਮੁਲਕ ਲਈ ਟਰੈਕ ਅਤੇ ਫੀਲਡ ਵਿੱਚ ਤਮਗ਼ਾ ਜਿੱਤ ਕੇ ਪਹਿਲਾਂ ਐਥਲੀਟ ਬਣ ਕੇ ਇਤਿਹਾਸ ਬਣਾਇਆ ਹੈ।

ਖੇਡਾਂ ਵਿੱਚ ਸੋਨ ਤਮਗ਼ਾ ਹਾਸਲ ਕਰਨ ਲਈ ਉਸਨੇ 87.58 ਮੀਟਰ ਦੀ ਦੂਰੀ ਤੱਕ ਨੇਜ਼ਾ ਸੁੱਟਿਆ ਸੀ।

ਗ਼ੌਰਤਲਬ ਹੈ ਕਿ ਨੀਰਜ ਦੇ ਓਲੰਪਿਕਸ ਵਿੱਚ ਇਸ ਇਤਿਹਾਸਿਕ ਨੇਜ਼ਾ ਸੁੱਟਣ ਨੂੰ ਸੰਸਾਰ ਦੇ ਐਥਲੀਟਾਂ ਵੱਲੋਂ, ਟੋਕੀਓ ਓਲੰਪਿਕਸ ਵਿੱਚ ਐਥਲੈਟਿਕਸ (ਟਰੈਕ ਐਂਡ ਫੀਲਡ) ਦੇ 10 ਜਾਦੂਮਈ ਪਲਾਂ ਵਿੱਚੋਂ ਇੱਕ ਕਰਾਰ ਦਿੱਤਾ ਗਿਆ ਹੈ।

ਵਤਨ ਵਾਪਸੀ 'ਤੇ ਉਸਨੂੰ ਭਾਰਤ ਸਰਕਾਰ, ਖੇਡ ਮਹਿਕਮੇ, ਭਾਰਤ ਦੀ ਐਥਲੈਟਿਕਸ ਫੈਡਰੇਸ਼ਨ ਅਤੇ ਭਾਰਤੀ ਫ਼ੌਜ ਵੱਲੋਂ ਸਨਮਾਨਿਤ ਕੀਤਾ ਜਾ ਚੁੱਕਾ ਹੈ।