ਹਾਕੀ ਟੀਮ ਦੇ ਖਿਡਾਰੀਆਂ ਦੇ ਪਰਿਵਾਰ ਟੋਕੀਓ ਓਲੰਪਿਕਸ ਵਿੱਚ ਕਾਂਸੇ ਦਾ ਤਮਗ਼ਾ ਜਿੱਤਣ ਦਾ ਮਨਾ ਰਹੇ ਜਸ਼ਨ

ਭਾਰਤੀ ਹਾਕੀ ਖਿਡਾਰੀ ਮਨਪ੍ਰੀਤ ਸਿੰਘ ਅਤੇ ਮਨਦੀਪ ਸਿੰਘ ਦੇ ਪਰਿਵਾਰ ਵਾਲਿਆਂ ਨੇ ਅੱਜ ਵੀਰਵਾਰ ਨੂੰ, ਜਰਮਨੀ ਖ਼ਿਲਾਫ਼ ਜਿੱਤ ਦਰਜ ਕਰਕੇ, ਟੀਮ ਦੇ ਕਾਂਸੇ ਦਾ ਤਮਗ਼ਾ ਜਿੱਤਣ 'ਤੇ ਜਸ਼ਨ ਮਨਾਏ।
ਇਸ ਦੌਰਾਨ ਦੋਵਾਂ ਖਿਡਾਰੀਆਂ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਮਨਾਏ ਗਏ ਜਸ਼ਨ ਦਾ ਦ੍ਰਿਸ਼ ਅਤੇ ਉਨ੍ਹਾਂ ਦੀਆਂ ਡੁੱਲਦੀਆਂ ਭਾਵਨਾਵਾਂ ਸਾਫ਼ ਵੇਖੇ ਜਾ ਸਕਦੇ ਸਨ।

ਮਨਦੀਪ ਦੀ ਮਾਤਾ ਨੇ ਆਖਿਆ ਕਿ ਸਖ਼ਤ ਮਿਹਨਤ ਰੰਗ ਲਿਆਈ ਹੈ।

"ਇਹ ਇੱਕ ਸ਼ਾਨਦਾਰ ਪੇਸ਼ਕਾਰੀ ਸੀ। ਖਿਡਾਰੀ, ਮੈਦਾਨ ਵਿੱਚ ਵਾਕਿਆ ਹੀ ਜੀਅ-ਜਾਨ ਲਾ ਕੇ ਖੇਡੇ। ਸਾਨੂੰ ਤਮਗ਼ਾ ਮਿਲਿਆ ਅਤੇ ਸਖ਼ਤ ਘਾਲਣਾ ਰੰਗ ਲਿਆਈ। ਅੱਜ ਬਹੁਤ ਜਸ਼ਨ ਮਨਾਏ ਜਾਣਗੇ,"ਮਨਦੀਪ ਦੀ ਮਾਤਾ ਦਵਿੰਦਰ ਨੇ ਆਖਿਆ।

ਭਾਰਤ ਦੀ ਝੋਲੀ ਇੱਕ ਹੋਰ ਤਮਗ਼ਾ ਪੈਣ ਨਾਲ ਖਿਡਾਰੀਆਂ ਦੇ ਪਿਤਾ ਵੀ ਬਹੁਤ ਖੁਸ਼ ਸਨ।

"ਅੱਜ ਭਾਰਤ ਨੇ 41 ਸਾਲਾਂ ਬਾਅਦ ਹਾਕੀ 'ਚ ਕੋਈ ਤਮਗ਼ਾ ਜਿੱਤਿਆ ਹੈ। ਮੈਂ ਬਹੁਤ ਖੁਸ਼ ਹਾਂ। ਮੈਂ ਸ਼ਬਦਾਂ 'ਚ ਬਿਆਨ ਨਹੀਂ ਕਰ ਸਕਦਾ। ਮਨਦੀਪ ਅਤੇ ਸਾਰੀ ਭਾਰਤੀ ਟੀਮ ਬਹੁਤ ਵਧੀਆ ਖੇਡੀ ਹੈ। ਟੀਮ ਦਾ ਕਪਤਾਨ ਸਾਡੇ ਪਿੰਡ ਦਾ ਹੀ ਹੈ। ਅੱਜ ਉਨ੍ਹਾਂ ਨੇ ਪੰਜਾਬ ਅਤੇ ਭਾਰਤ ਨੂੰ ਮਾਣ ਮਹਿਸੂਸ ਕਰਾਇਆ ਹੈ। ਅੱਜ ਅਸੀਂ ਰੱਜ ਕੇ ਭੰਗੜਾ ਪਾਵਾਂਗੇ,"ਖਿਡਾਰੀ ਦੇ ਪਿਤਾ ਰਵਿੰਦਰ ਨੇ ਆਖਿਆ।

ਭਾਰਤੀ ਟੀਮ ਦੇ ਸਕਿੱਪਰ ਮਨਪ੍ਰੀਤ ਸਿੰਘ ਦੀ ਮਾਂ ਮਨਜੀਤ ਕੌਰ ਵੀ ਟੀਮ ਦੀ ਜਿੱਤ 'ਤੇ ਖੁਸ਼ ਸੀ।

"ਮੈਂ ਬਹੁਤ ਹੀ ਖੁਸ਼ ਹਾਂ। ਇਤਿਹਾਸ ਸਿਰਜਿਆ ਗਿਆ ਹੈ। ਇਹ ਮਾਣ ਵਾਲੀ ਗੱਲ ਹੈ ਕਿ 41 ਸਾਲਾਂ ਬਾਅਦ ਭਾਰਤ ਨੂੰ ਹਾਕੀ 'ਚ ਤਮਗ਼ਾ ਮਿਲਿਆ ਹੈ। ਮੈਂ ਸਵੇਰ ਤੋਂ ਹੀ ਅਰਦਾਸ ਕਰ ਰਹੀ ਸਾਂ। ਮੈਂ ਸਵੇਰੇ 2 ਵਜੇ ਤੋਂ ਹੀ ਜਾਗ ਰਹੀ ਹਾਂ। ਮੇਰੇ ਪੁੱਤਰ ਨੇ ਮੈਨੂੰ ਕਾਲ ਕਰਕੇ ਆਪਣੀ ਜਿੱਤ ਲਈ ਅਰਦਾਸ ਕਰਨ ਲਈ ਆਖਿਆ ਸੀ। ਉਸ ਲਈ ਇਹ ਮਾਣ ਵਾਲੀ ਗੱਲ ਹੈ। ਮੇਰੇ ਗੁਰੂ ਨੇ ਮੇਰੀ ਅਰਦਾਸ ਸੁਣੀ। ਮੇਰਾ ਪੁੱਤਰ ਬਹੁਤ ਹੀ ਘਬਰਾਇਆ ਹੋਇਆ ਸੀ ਕਿਉਂਕਿ ਉਸਦੇ ਮੋਢਿਆਂ 'ਤੇ ਬਹੁਤ ਵੱਡੀ ਜਿੰਮੇਵਾਰੀ ਸੀ। ਇਹ ਮੇਰੀ ਜ਼ਿੰਦਗੀ ਦਾ ਬਹੁਤ ਵੱਡਾ ਦਿਨ ਹੈ। ਮੈਂ ਆਪਣੇ ਗੁੜੁ ਅਜੇ ਸ਼ੁਕਰਾਨੇ ਦੀ ਅਰਦਾਸ ਕਰਾਂਗੀ,"ਮਨਜੀਤ ਕੌਰ ਨੇ ਆਖਿਆ।

ਦੱਸਣਯੋਗ ਹੈ ਕਿ ਭਾਰਤੀ ਹਾਕੀ ਟੀਮ ਨੇ ਵੀਰਵਾਰ ਨੂੰ, ਜਰਮਨੀ ਨੂੰ 5 -4 ਨਾਲ ਹਰਾਕੇ ਕੇ 41 ਸਾਲਾਂ ਦੇ ਲੰਮੇ ਇੰਤਜ਼ਾਰ ਤੋਂ ਬਾਅਦ, ਇਸ ਖੇਡ ਵਿੱਚ ਕਾਂਸੇ ਦਾ ਤਮਗ਼ਾ ਜਿੱਤਿਆ ਹੈ।

ਇਸ ਤੋਂ ਪਹਿਲਾਂ ਮੰਗਲਵਾਰ ਨੂੰ, ਭਾਰਤੀ ਟੀਮ ਸੈਮੀ ਫਾਈਨਲ 'ਚ ਬੈਲਜੀਅਮ ਤੋਂ 2-5 ਨਾਲ ਹਾਰੀ ਸੀ, ਜਿਸ ਤੋਂ ਬਾਅਦ ਟੀਮ ਜਰਮਨੀ ਨਾਲ ਕਾਂਸੇ ਦੇ ਤਮਗ਼ੇ ਲਈ ਦੌੜ ਵਿੱਚ ਸ਼ਾਮਲ ਹੋਈ।