ਮਸਕ ਦੇ ਟਵੀਟ ’ਤੇ ਪੌਲੀਐਵ ਨੇ ਜਤਾਇਆ ਇਤਰਾਜ਼

ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨੇ ਐਲੋਨ ਮਸਕ ਵੱਲੋਂ ਕਿਊਬੈਕ, ਐਲਬਰਟਾ ਅਤੇ ਸਸਕੈਚਵਨ ਨੂੰ ਕੈਨੇਡਾ ਤੋਂ ਵੱਖ ਹੋਣ ਦੀ ਦਿੱਤੀ ਗਈ ਸਲਾਹ 'ਤੇ ਤਿੱਖਾ ਪ੍ਰਤੀਕਰਮ ਦਿੱਤਾ ਹੈ। ਸ਼ੁੱਕਰਵਾਰ ਨੂੰ ਓਨਟਾਰੀਓ ਦੇ ਬਰਲਿੰਗਟਨ ਵਿਚ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਪੱਤਰਕਾਰਾਂ ਦੇ ਸਵਾਲਾਂ ਦਾ ਜਵਾਬ ਦਿੰਦੇ ਹੋਏ ਪੌਲੀਐਵ ਨੇ ਕਿਹਾ ਕਿ ਕੈਨੇਡੀਅਨਜ਼ ਆਪਣੇ ਫੈਸਲੇ ਖੁਦ ਕਰਦੇ ਹਨ ਅਤੇ ਅਜਿਹੇ ਲੋਕਾਂ ਦੇ ਮੂਰਖਤਾਪੂਰਨ ਟਵੀਟ 'ਤੇ ਸਮਾਂ ਬਰਬਾਦ ਕਰਨ ਦੀ ਕੋਈ ਲੋੜ ਨਹੀਂ, ਜਿਨ੍ਹਾਂ ਦਾ ਕੈਨੇਡੀਅਨ ਨਾਲ ਕੋਈ ਵਾਸਤਾ ਨਹੀਂ ਹੈ।

ਉਨ੍ਹਾਂ ਕਿਹਾ ਕਿ ਅਜਿਹੇ ਫਾਲਤੂ ਟਵੀਟਸ 'ਤੇ ਧਿਆਨ ਦੇਣ ਦੀ ਬਜਾਏ ਸਾਡਾ ਫੋਕਸ ਗ੍ਰੋਸਰੀ ਦੀਆਂ ਕੀਮਤਾਂ, ਘਰਾਂ ਦੀ ਕਿੱਲਤ ਅਤੇ ਆਰਥਿਕਤਾ ਦੇ ਭਵਿੱਖ 'ਤੇ ਹੈ, ਜਿਨ੍ਹਾਂ ਅਸਲ ਚੁਣੌਤੀਆਂ ਦਾ ਕੈਨੇਡੀਅਨ ਸਾਹਮਣਾ ਕਰ ਰਹੇ ਹਨ। ਪੌਲੀਐਵ ਨੇ ਕਿਹਾ ਕਿ ਕਿਸੇ ਦੇ ਟਵੀਟ ਜਾਂ ਮੀਮਜ਼ ਨਾਲ ਕੈਨੇਡਾ ਨੂੰ ਕੋਈ ਫਰਕ ਨਹੀਂ ਪੈਂਦਾ; ਕੈਨੇਡਾ 'ਤੇ ਸਿਰਫ਼ ਕੈਨੇਡੀਅਨ ਲੋਕਾਂ ਵਲੋਂ ਲਏ ਗਏ ਫੈਸਲਿਆਂ ਦਾ ਹੀ ਅਸਰ ਹੁੰਦਾ ਹੈ।

ਜ਼ਿਕਰਯੋਗ ਹੈ ਕਿ ਐਲੋਨ ਮਸਕ ਨੇ ਵਿਵਾਦਿਤ ਪੋਸਟ ਬੁੱਧਵਾਰ ਨੂੰ X 'ਤੇ ਪਾਈ ਸੀ, ਉਨ੍ਹਾਂ ਨੂੰ ਇਹ ਟਿੱਪਣੀ ਕਰਨ ਦਾ ਮੌਕਾ ਕਿਊਬੈਕ ਵਿਚ ਜਿੱਤਣ ਵਾਲੀ ਵੱਖਵਾਦੀ ਪਾਰਟੀ ਦੇ ਲੀਡਰ ਪਾਲ ਸੇਂਟ-ਪੀਅਰੇ ਪਲੈਮੰਡਨ ਦੇ ਇੱਕ ਬਿਆਨ 'ਤੇ ਮਿਲਿਆ ਸੀ, ਜਿਸ ਵਿਚ ਪਲੈਮੰਡਨ ਨੇ ਕਿਹਾ ਸੀ ਕਿ ਉਨ੍ਹਾਂ ਦਾ ਕਿਊਬੈਕ ਦੀ ਆਜ਼ਾਦੀ ਦਾ ਸੁਪਨਾ ਇੱਕ ਦਿਨ ਸਾਕਾਰ ਜ਼ਰੂਰ ਹੋਵੇਗਾ।