ਕਿਸਾਨਾਂ ਨੂੰ ਦਿੱਲੀ 'ਚ ਦਾਖਲ ਹੋਣਾ ਪੈ ਸਕਦੈ ਅਤੇ ਮੁੜ ਤੋੜਨੇ ਪੈ ਸਕਦੇ ਹਨ ਬੈਰੀਕੇਡ: ਭਾਰਤ ਬੰਦ ਤੋਂ ਪਹਿਲਾਂ ਰਾਕੇਸ਼ ਟਿਕੈਤ ਨੇ ਕਿਹਾ

ਭਾਰਤ ਬੰਦ ਦੇ ਸੱਦੇ ਤੋਂ ਪਹਿਲਾਂ ਭਾਰਤੀ ਕਿਸਾਨ ਯੂਨੀਅਨ (ਬੀਕੇਯੂ) ਦੇ ਪ੍ਰਧਾਨ ਰਾਕੇਸ਼ ਟਿਕੈਤ ਨੇ ਮੰਗਲਵਾਰ ਨੂੰ ਆਖਿਆ ਕਿ ਕੇਂਦਰ ਦੇ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਕਿਸਾਨਾਂ ਦੇ ਧਰਨੇ 'ਚ ਫੁੱਟ ਨਹੀਂ ਪਾਈ ਜਾ ਸਕਦੀ ਅਤੇ ਉਹਨਾਂ ਨੂੰ ਕੌਮੀ ਰਜਧਾਨੀ 'ਚ ਦਾਖਲ ਹੋਣ ਲਈ ਮੁੜ ਬੈਰੀਕੇਡ ਤੋੜਨੇ ਪੈ ਸਕਦੇ ਹਨ|

ਟਿਕੈਤ ਨੇ ਜੈਪੁਰ 'ਚ ਕਿਸਾਨਾਂ ਦੇ ਇਕੱਠ ਨੂੰ ਸੰਬੋਧਨ ਕਰਦਿਆਂ ਆਖਿਆ,"ਉਨ੍ਹਾਂ (ਕੇਂਦਰ) ਨੇ ਸਾਨੂੰ ਜ਼ਾਤ ਅਤੇ ਧਰਮ ਦੇ ਅਧਾਰ 'ਤੇ ਵੰਡਣ ਦੀ ਪੂਰੀ ਕੋਸ਼ਿਸ਼ ਕੀਤੀ ਪਰ ਨਾਕਾਮਯਾਬ ਰਹੇ| ਜਦੋਂ ਆਖਿਆ ਜਾਵੇ, ਤੁਹਾਨੂੰ ਦਿੱਲੀ ਜਾਣ ਦੀ ਲੋੜ ਪਵੇਗੀ ਅਤੇ ਬੈਰੀਕੇਡ ਵੀ ਤੋੜਨੇ ਪੈ ਸਕਦੇ ਹਨ|"

ਅੱਗੇ ਕੇਂਦਰ ਸਰਕਾਰ 'ਤੇ ਨਿਸ਼ਾਨਾ ਸਾਧਦਿਆਂ ਉਨ੍ਹਾਂ ਆਖਿਆ,"ਪੀਐੱਮ ਮੋਦੀ ਕਹਿੰਦੇ ਹਨ ਕਿ ਕਿਸਾਨ ਆਪਣੀਆਂ ਫ਼ਸਲਾਂ ਕੀਤੇ ਵੀ ਵੇਚ ਸਕਦੇ ਹਨ| ਅਸੀਂ ਸੂਬੇ ਦੀਆਂ ਅਸੈਮਬਲੀਆਂ, ਕਲੇਕਟਰਾਂ ਦੇ ਦਫ਼ਤਰ ਅਤੇ ਪਾਰਲੀਮੈਂਟ 'ਚ ਵੇਚ ਕੇ ਇਹ ਸਾਬਤ ਕਰ ਦੇਵਾਂਗੇ| ਪਾਰਲੀਮੈਂਟ ਤੋਂ ਬਿਹਤਰ ਹੋਰ ਕੋਈ ਮੰਡੀ ਨਹੀਂ ਹੋ ਸਕਦੀ|"

ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਐਤਵਾਰ ਨੂੰ ਦਿੱਲੀ ਦੇ ਬਾਰਡਰਾਂ ਦੇ ਧਰਨੇ 'ਤੇ ਵੀ ਟਿਕੈਤ ਨੇ ਇਹ ਸਲਾਹ ਦਿੱਤੀ ਸੀ ਕਿ ਕਰਨਾਟਕ ਦੇ ਕਿਸਾਨਾਂ ਨੂੰ ਵੀ ਦਿੱਲੀ ਦੇ ਧਰਨੇ ਦੇ ਬਰਾਬਰ ਹੀ ਵੱਡਾ ਵਿਰੋਧ ਪ੍ਰਦਰਸ਼ਨ ਕਰਨਾ ਚਾਹੀਦਾ ਹੈ ਅਤੇ ਬੈਂਗਲੁਰੂ ਦਾ ਸਾਰੇ ਪਾਸਿਓਂ 'ਘੇਰਾਓ' ਕਰਨਾ ਚਾਹੀਦਾ ਹੈ|

"ਇਹ ਲੜਾਈ ਲੰਮੀ ਚੱਲੇਗੀ| ਸਾਨੂੰ ਅਜਿਹੇ ਪ੍ਰਦਰਸ਼ਨ ਉਦੋਂ ਤੱਕ ਹਰ ਸ਼ਹਿਰ 'ਚ ਸ਼ੁਰੂ ਕਰਨੇ ਚਾਹੀਦੇ ਹਨ, ਜਦੋਂ ਤੱਕ ਕਿ ਤਿੰਨੇ ਕਾਲੇ ਕਾਨੂੰਨ ਵਾਪਸ ਨਾ ਲਏ ਜਾਣ ਅਤੇ ਐੱਮਐੱਸਪੀ ਨਾ ਲਿਆਂਦੀ ਜਾਵੇ| ਤੁਹਾਨੂੰ ਕਰਨਾਟਕ 'ਚ ਵੀ ਵਿਰੋਧ ਪ੍ਰਦਰਸ਼ਨ ਕਰਨ ਦੀ ਲੋੜ ਹੈ,"ਬੀਕੇਯੂ ਦੇ ਨੇਤਾ ਨੇ ਸ਼ਿਵਮੋਗਾ 'ਚ ਕਿਸਾਨਾਂ ਦੀ ਬੈਠਕ ਨੂੰ ਸੰਬੋਧਨ ਕਰਦਿਆਂ ਆਖਿਆ|

ਗ਼ੌਰਤਲਬ ਹੈ ਕਿ ਬੀਤੇ ਸਾਲ ਨਵੰਬਰ ਤੋਂ ਕਿਸਾਨ ਦਿੱਲੀ ਦੇ ਵੱਖੋ-ਵੱਖ ਬਾਰਡਰਾਂ 'ਤੇ ਭਾਰਤ ਸਰਕਾਰ ਵਲੋਂ ਪਾਸ ਕੀਤੇ ਤਿੰਨ ਨਵੇਂ ਖੇਤੀ ਬਿੱਲਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 ਦਾ ਵਿਰੋਧ ਕਰ ਰਹੇ ਹਨ।