ਕਿਸਾਨ ਸੰਘਰਸ਼ ਮਾਮਲਾ: 'ਟੂਲਕਿੱਟ' ਬਾਰੇ ਗੂਗਲ ਤੋਂ ਜਾਣਕਾਰੀ ਲਵੇਗੀ ਦਿੱਲੀ ਪੁਲਿਸ

ਦਿੱਲੀ ਪੁਲਿਸ ਵੱਲੋਂ ਗੂਗਲ ਨੂੰ ਉਸ ਆਈ ਪੀ ਐਡਰੈੱਸ ਦੀ ਥਾਂ ਪਤਾ ਕਰਨ ਲਈ ਕਿਹਾ ਜਾਣ ਵਾਲਾ ਹੈ, ਜਿਥੋਂ ਸੋਸ਼ਲ ਮੀਡੀਆ 'ਤੇ ਪਾਈ ਗਈ 'ਟੂਲਕਿੱਟ' ਬਣਾਈ ਗਈ ਸੀ|

ਪੁਲਿਸ ਸੂਤਰਾਂ ਮੁਤਾਬਕ, ਇਹ ਜਾਂਚ ਗੂਗਲ ਡੌਕਸ 'ਤੇ ਸਾਂਝੀ ਕਰਨ ਵਾਲੇ 'ਟੂਲਕਿੱਟ' ਦੇ ਲਿਖਾਰੀਆਂ ਨੂੰ ਪਛਾਨਣ ਲਈ ਕੀਤੀ ਜਾ ਰਹੀ ਹੈ|

ਦਿੱਲੀ ਪੁਲਿਸ ਦੇ ਸੂਤਰਾਂ ਮੁਤਾਬਕ,"ਦਿੱਲੀ ਪੁਲਿਸ ਗੂਗਲ ਨੂੰ ਇੱਕ ਚਿੱਠੀ ਲਿਖ ਕੇ ਉਸ ਆਈ ਪੀ ਐਡਰੈੱਸ ਦਾ ਪਤਾ ਲਾਉਣ ਜਾ ਰਹੀ ਹੈ, ਜਿਥੇ ਉਹ ਦਸਤਾਵੇਜ਼ ਬਣਾਏ ਗਏ ਅਤੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਤੇ ਪਾਏ ਗਏ| ਇਸ ਜ਼ਰੀਏ ਟੂਲਕਿੱਟ ਦੇ ਲਿਖਣ ਵਾਲੇ ਦਾ ਪਤਾ ਲਾਇਆ ਜਾ ਰਿਹਾ ਹੈ, ਜਿਸ ਵੱਲੋਂ ਇਹ ਗੂਗਲ ਡੌਕਸ 'ਤੇ ਸਾਂਝੀ ਕੀਤੀ ਗਈ|"

ਦਿੱਲੀ ਪੁਲਿਸ ਦੇ ਖਾਸ ਕਮਿਸ਼ਨਰ ਪ੍ਰਵੀਨ ਰੰਜਨ ਨੇ ਇੱਕ ਪਤਰਕਾਰ ਮਿਲਣੀ ਦੌਰਾਨ ਕਿਹਾ ਕਿ ਉਹਨਾਂ ਵੱਲੋਂ 'ਟੂਲਕਿੱਟ' ਬਣਾਉਣ ਵਾਲਿਆਂ ਖ਼ਿਲਾਫ਼ ਐੱਫ ਆਈ ਆਰ ਦਰਜ ਕੀਤੀ ਗਈ ਹੈ , ਜੋ ਕਿ ਅਣਪਛਾਤਿਆਂ ਖ਼ਿਲਾਫ਼ ਹੈ|

ਉਨ੍ਹਾਂ ਆਖਿਆ,"ਅਸੀਂ ਐੱਫ ਆਈ ਆਰ 'ਚ ਕਿਸੇ ਦਾ ਨਾਮ ਨਹੀਂ ਲਿਖਿਆ| ਇਹ ਸਿਰਫ਼ 'ਟੂਲਕਿੱਟ' ਬਣਾਉਣ ਵਾਲਿਆਂ ਖ਼ਿਲਾਫ਼ ਕੀਤੀ ਗਈ ਹੈ, ਜੋ ਜਾਂਚ ਕੀਤੇ ਜਾਣ ਦਾ ਵਿਸ਼ਾ ਹੈ| ਦਿੱਲੀ ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰੇਗੀ|"

ਰੰਜਨ ਨੇ ਕਿਹਾ ਕਿ ਦਿੱਲੀ ਦੇ ਬਾਰਡਰਾਂ 'ਤੇ ਕਿਸਾਨਾਂ ਵੱਲੋਂ ਕੀਤਾ ਜਾ ਰਿਹਾ ਰੋਹ ਵਿਖਾਵਾ ਬੜੇ ਦਿਨਾਂ ਤੋਂ ਚੱਲ ਰਿਹਾ ਹੈ, ਜਿਸ ਕਰਕੇ ਦਿੱਲੀ ਪੁਲਿਸ ਵੱਲੋਂ ਬਹੁਤ ਸਾਰੇ ਸੋਸ਼ਲ ਮੀਡੀਆ ਖਾਤਿਆਂ 'ਤੇ ਨਜ਼ਰ ਰਾਖੀ ਜਾ ਰਹੀ ਹੈ|

ਉਨ੍ਹਾਂ ਅੱਗੇ ਕਿਹਾ,"ਅਸੀਂ ਅਜਿਹੇ 300 ਸੋਸ਼ਲ ਮੀਡੀਆ ਖਾਤੇ ਪਛਾਣੇ ਹਨ, ਜੋ ਭਾਰਤ ਸਰਕਾਰ ਖ਼ਿਲਾਫ਼ ਆਪਣੀ ਅਸੰਤੁਸ਼ਟੀ ਅਤੇ ਨਿਰਾਸ਼ਾ ਜ਼ਾਹਿਰ ਕਰ ਰਹੇ ਹਨ| 'ਟੂਲਕਿੱਟ' ਖਾਤਾ ਇਕ ਖਾਲਿਸਤਾਨੀ ਸਮੂਹ ਵੱਲੋਂ ਚਲਾਇਆ ਜਾ ਰਿਹਾ ਹੈ| ਉਹਨਾਂ ਵੱਲੋਂ ਗਣਤੰਤਰ ਦਿਹਾੜੇ ਵਾਲੇ ਵਾਕਿਆ ਤੋਂ ਬਾਅਦ ਡਿਜੀਟਲ ਹੜਤਾਲ ਕੀਤੇ ਜਾਣ ਦਾ ਫ਼ੈਸਲਾ ਕੀਤਾ ਗਿਆ ਸੀ|"

ਅੱਗੇ ਰੰਜਨ ਨੇ ਆਖਿਆ,"ਅਸੀਂ ਪੂਰੀ ਵਿਓਂਤ ਦੇ ਦਸਤਾਵੇਜ਼ ਹਾਸਲ ਕਰ ਲਏ ਹਨ| ਸਾਨੂ ਪਤਾ ਲੱਗ ਚੁੱਕਾ ਹੈ ਕਿ ਇਹ ਇੱਕ ਨਕਲ ਕੀਤੀ ਗਈ ਵਿਓਂਤ ਹੈ| ਹੁਣ ਲਈ, ਅਸੀਂ ਉਸ ਖਾਤੇ ਦੇ ਬਣਾਉਣ ਵਾਲਿਆਂ ਖ਼ਿਲਾਫ਼ ਮਾਮਲਾ ਦਰਜ ਕਰ ਲਿਆ ਹੈ| ਇਹ ਮਾਮਲਾ ਸਾਈਬਰ ਸੈੱਲ ਦੇ ਸਪੁਰਦ ਕਰ ਦਿੱਤਾ ਗਿਆ ਹੈ, ਜਿਸਦੀ ਜਾਂਚ ਜਾਰੀ ਹੈ|"

ਗ਼ੌਰਤਲਬ ਹੈ ਕਿ ਵਾਤਾਵਰਨ ਕਾਰਕੁੰਨ ਗ੍ਰੇਟ ਥਰਨਬਰਗ ਨੇ ਬੁੱਧਵਾਰ ਨੂੰ ਇਹ 'ਟੂਲਕਿੱਟ' ਟਵੀਟ ਕੀਤੀ ਸੀ, ਜੋ ਉਸਨੇ ਬਾਅਦ ਵਿਚ ਡੀਲੀਟ ਕਰ ਦਿੱਤੀ ਸੀ|

ਉਸ ਵੱਲੋਂ ਦਿੱਲੀ ਦੇ ਬਾਰਡਰਾਂ 'ਤੇ ਨਵੇਂ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਧਰਨਾ ਦੇ ਰਹੇ ਕਿਸਾਨਾਂ ਦੀਆਂ ਜਥੇਬੰਦੀਆਂ ਦਾ ਸਮਰਥਨ ਕਰਦਿਆਂ ਲਿਖਿਆ ਸੀ,"ਅਸੀਂ ਭਾਰਤ 'ਚ ਹੋ ਰਹੇ ਕਿਸਾਨਾਂ ਦੇ ਵਿਰੋਧ ਪ੍ਰਦਰਸ਼ਨ 'ਚ ਉਹਨਾਂ ਦੇ ਨਾਲ ਖੜੇ ਹਾਂ|"

ਜਿਸ ਤੋਂ ਬਾਅਦ ਭਾਰਤ ਦੇ ਬਾਹਰੀ ਮਾਮਲਿਆਂ ਦੇ ਮਹਿਕਮੇ ਵੱਲੋਂ ਕਿਹਾ ਗਿਆ ਹੈ ਕਿ ਕਿਸਾਨਾਂ ਵੱਲੋਂ ਖੇਤੀ ਕਾਨੂੰਨਾਂ ਖ਼ਿਲਾਫ਼ ਕੀਤੇ ਜਾ ਰਹੇ ਰੋਹ ਵਿਖਾਵੇ ਨੂੰ ਭਾਰਤ ਦੀ ਨੈਤਿਕਤਾ ਅਤੇ ਸਿਆਸਤ, ਅਤੇ ਸਰਕਾਰੀ ਕੋਸ਼ਿਸ਼ਾਂ ਅਤੇ ਕਿਸਾਨ ਜਥੇਬੰਦੀਆਂ ਵਿਚਾਲੇ ਇਸਦੇ ਹੱਲ ਲਈ ਗਤੀਸ਼ੀਲਤਾ ਦੇ ਸੰਦਰਭ 'ਚ ਵੇਖਿਆ ਜਾਣਾ ਚਾਹੀਦਾ ਹੈ|

ਇਹ ਕਿਹਾ ਗਿਆ ਹੈ ਕਿ ਸੋਸ਼ਲ ਮੀਡੀਆ ਦੇ ਹੈਸ਼ਟੈਗ ਅਤੇ ਕਮੈਂਟ ਜੋ ਸਨਸਨੀਖ਼ੇਜ਼ ਹੋਣ ਦੀ ਚਾਹ ਨਾਲ ਕੀਤੇ ਜਾਂਦੇ ਹਨ, ਖ਼ਾਸਕਰ ਜਦੋਂ ਉਹ ਕਿਸੇ ਸੇਲਿਬ੍ਰਿਟੀ ਵੱਲੋਂ ਜਾਂ ਉਸਨੂੰ ਕੀਤੇ ਜਾਂਦੇ ਹਨ ਜਾਂ ਹੋਰਾਂ ਵੱਲੋਂ, ਉਹ 'ਨਾ ਤਾਂ ਸਹੀ ਹੁੰਦੇ ਹਨ ਅਤੇ ਨਾ ਹੀ ਜ਼ਿੰਮੇਵਾਰਾਨਾ '|