10.19C Vancouver 10.19C VancouverJul 14, 2021 9:20 AM -
22 ਜੁਲਾਈ ਨੂੰ ਪਾਰਲੀਮੈਂਟ ਦੇ ਬਾਹਰ ਕਿਸਾਨਾਂ ਵੱਲੋਂ ਵਿਰੋਧ ਪ੍ਰਦਰਸ਼ਨ ਕੀਤੇ ਜਾਣ ਦੀ ਯੋਜਨਾ ਦੇ ਤਹਿਤ, ਭਾਰਤੀ ਕਿਸਾਨ ਯੂਨੀਅਨ (ਬੀਕੇਯੂ) ਦੇ ਆਗੂ, ਰਾਕੇਸ਼ ਟਿਕੈਤ ਨੇ ਅੱਜ ਬੁੱਧਵਾਰ ਨੂੰ ਆਖਿਆ ਕਿ ਹਾਲਾਂਕਿ ਗਣਤੰਤਰ ਦਿਹਾੜੇ 'ਤੇ ਕੀਤੀ ਗਈ 'ਟਰੈਕਟਰ ਰੈਲੀ' ਦੌਰਾਨ ਲੋਕਾਂ ਨੇ ਲਾਲ ਕਿਲੇ 'ਤੇ ਹਿੰਸਾ ਦੇਖੀ ਹੈ, ਪਰ ਬਾਵਜੂਦ ਇਸਦੇ, ਇਹ ਪ੍ਰਦਰਸ਼ਨ 'ਸ਼ਾਂਤਮਈ' ਹੋਵੇਗਾ।
ਇਹ ਵਿਰੋਧ ਪ੍ਰਦਰਸ਼ਨ ਮੌਨਸੂਨ ਸੈਸ਼ਨ ਦੌਰਾਨ ਹੋਵੇਗਾ, ਜੋ 19 ਜੁਲਾਈ ਤੋਂ ਸ਼ੁਰੂ ਹੋ ਕੇ, 13 ਅਗਸਤ ਤੱਕ ਚੱਲੇਗਾ।
ਟਿਕੈਤ ਨੇ ਆਖਿਆ,"ਇਹ ਇੱਕ ਸ਼ਾਂਤਮਈ ਰੋਹ ਵਿਖਾਵਾ ਹੋਵੇਗਾ। ਅਸੀਂ ਸਿਰਫ਼ ਪਾਰਲੀਮੈਂਟ ਦੇ ਬਾਹਰ ਬੈਠਣਗੇ, ਅੰਦਰ ਇਸਦੀ ਕਾਰਵਾਈ ਚੱਲਦੀ ਰਹੇਗੀ।"
ਉਹਨਾਂ ਅੱਗੇ ਆਖਿਆ ਕਿ ਪਾਰਲੀਮੈਂਟ ਤੱਕ 200 ਲੋਕ, ਬੱਸ ਰਾਹੀਂ ਜਾਣਗੇ।
"ਅਸੀਂ ਬੱਸ ਦਾ ਕਿਰਾਇਆ ਦੇਵਾਂਗੇ,"ਬੀਕੇਯੂ ਆਗੂ ਨੇ ਅੱਗੇ ਆਖਿਆ। ਇਸ ਰੋਹ ਵਿਖਾਵੇ ਦੀ ਵਿਉਂਤ ਬਾਰੇ ਅੱਜ ਦੀ ਬੈਠਕ ਵਿੱਚ ਚਰਚਾ ਕੀਤੀ ਜਾਵੇਗੀ।
"ਅਸੀਂ ਅੱਜ ਬੈਠਕ ਕਰਕੇ ਰਣਨੀਤੀ ਤੈਅ ਕਰਾਂਗੇ,"ਉਨ੍ਹਾਂ ਆਖਿਆ।
ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ,26 ਜਨਵਰੀ ਨੂੰ ਕਿਸਾਨਾਂ ਵੱਲੋਂ ਕੱਢੀ ਗਈ ਟਰੈਕਟਰ ਰੈਲੀ ਦੌਰਾਨ ਵਿਖਾਵਾਕਾਰੀਆਂ ਵੱਲੋਂ ਨਵੀਂ ਦਿੱਲੀ ਵਿੱਚ ਵੜਨ ਲਈ ਬੈਰੀਕੇਡ ਤੋੜੇ ਗਏ ਸਨ ਅਤੇ ਪੁਲਿਸ ਨਾਲ ਵੀ ਕਈ ਥਾਵਾਂ 'ਤੇ ਝੜਪਾਂ ਹੋਈਆਂ ਸਨ।
ਵਿਖਾਵਾਕਾਰੀਆਂ ਵੱਲੋਂ ਮੁਗ਼ਲ ਕਾਲ ਦੇ ਮਸ਼ਹੂਰ ਸਮਾਰਕ ਲਾਲ ਕਿਲੇ 'ਚ ਵੜ ਕੇ ਇਸਦੀ ਫ਼ਸੀਲ ਤੋਂ ਆਪਣੇ ਝੰਡੇ ਲਹਿਰਾਏ ਗਏ ਸਨ।
ਜ਼ਿਕਰਯੋਗ ਹੈ ਕਿ ਵਿਖਾਵਾਕਾਰੀਆਂ ਵੱਲੋਂ ਬੀਤੇ ਸਾਲ 26 ਨਵੰਬਰ ਤੋਂ ਕੌਮੀ ਰਾਜਧਾਨੀ ਦੇ ਵੱਖੋ-ਵੱਖਰੇ ਬਾਰਡਰਾਂ 'ਤੇ ਤਿੰਨ ਨਵੇਂ ਖੇਤੀ ਕਾਨੂੰਨਾਂ-ਉਪਜ,ਵਪਾਰ ਅਤੇ ਵਣਜ ਬਿੱਲ(ਤਰੱਕੀ ਅਤੇ ਸਹੂਲਤ), 2020, ਕਿਸਾਨ (ਸਸ਼ਕਤੀਕਰਨ ਅਤੇ ਰੱਖਿਆ) ਸਮਰਥਨ ਮੁੱਲ ਸਮਝੌਤਾ ਅਤੇ ਖੇਤੀ ਸੇਵਾਵਾਂ ਬਿੱਲ,2020 ਅਤੇ ਜ਼ਰੂਰੀ ਵਸਤਾਂ(ਸੋਧ) ਬਿੱਲ,2020 , ਦਾ ਵਿਰੋਧ ਕੀਤਾ ਜਾ ਰਿਹਾ ਹੈ।
ਕਿਸਾਨ ਆਗੂਆਂ ਅਤੇ ਕੇਂਦਰ ਦਰਮਿਆਨ ਇਸ ਦੌਰਾਨ ਕਈ ਦੌਰ ਦੀ ਗੱਲਬਾਤ ਹੋ ਚੁੱਕੀ ਹੈ ਪਰ ਇਹ ਜਾਰੀ ਹੀ ਹੈ।
