ਐਲਬਰਟਨ ਬੌਕਸਰ ਦੇ ਮੌਤ ਮਾਮਲੇ ਸਬੰਧੀ ਅਦਾਲਤ ਨੇ ਜਾਰੀ ਕੀਤੀਆਂ ਸਿਫਾਰਿਸ਼ਾਂ

ਐਡਮਿੰਟਨ ਦੇ ਮੁੱਕੇਬਾਜ਼ ਟਿਮ ਹੇਗ ਦੀ ਮੌਤ ਸਬੰਧੀ ਫੈਸਲਾ ਸੁਣਾਉਂਦਿਆਂ ਅਦਾਲਤ ਨੇ ਕਈ ਸਿਫਾਰਿਸ਼ਾਂ ਜਾਰੀ ਕੀਤੀਆਂ ਹਨ ਤਾਂ ਕਿ ਅੱਗੇ ਤੋਂ ਅਜਿਹਾ ਕਿਸੇ ਹੋਰ ਨਾਲ ਨਾ ਹੋਵੇ। 34 ਸਾਲਾ ਟਿਮੋਥੀ ਹੇਗ ਪਹਿਲਾਂ ਕਿੰਡਰਗਾਰਟਨ ਅਧਿਆਪਕ ਸੀ ਅਤੇ ਉਹ ਐਡਮਿੰਟਨ ਕੰਬੇਟਿਵ ਸਪੋਰਟਸ ਕਮਿਸ਼ਨ ਦੇ ਲਾਈਸੈਂਸ ਤਹਿਤ ਜੂਨ 2017 ਵਿਚ ਬੌਕਸਿੰਗ ਕਰ ਰਿਹਾ ਸੀ। ਉਸ ਨਾਲ ਮੁਕਾਬਲਾ ਕਰਨ ਵਾਲੇ ਐਡਮ ਬ੍ਰੈਡਵੁੱਡ ਨੇ ਦੂਜੇ ਰਾਊਂਡ ਦੌਰਾਨ ਉਸ ਦੇ ਸਿਰ ਵਿਚ ਸੱਟ ਮਾਰੀ ਜਿਸ ਕਾਰਨ ਉਹ ਬੇਹੋਸ਼ ਹੋ ਗਿਆ। ਉਸ ਨੂੰ ਹਸਪਤਾਲ ਲੈ ਜਾਇਆ ਗਿਆ, ਜਿੱਥੇ ਉਸ ਦੇ ਦਿਮਾਗ ਦਾ ਓਪਰੇਸ਼ਨ ਕੀਤਾ ਗਿਆ ਪਰ ਦੋ ਦਿਨਾਂ ਬਾਅਦ ਉਸ ਨੇ ਦਮ ਤੋੜ ਦਿੱਤਾ।

ਔਫੀਸਰਜ਼ ਨੇ ਦੱਸਿਆ ਕਿ ਜਾਂਚ ਦਾ ਉਦੇਸ਼ ਮੌਤ ਦੇ ਕਾਰਨ ਲੱਭਣਾ ਹੀ ਨਹੀਂ ਸਗੋਂ ਇਹ ਸੁਨਿਸ਼ਚਿਤ ਕਰਨਾ ਵੀ ਸੀ ਕਿ ਮੁੜ ਅਜਿਹੀ ਘਟਨਾ ਨਾ ਵਾਪਰੇ। ਪਿਛਲੇ ਮਹੀਨੇ ਸੂਬੇ ਦੀ ਅਦਾਲਤ ਨੇ ਇਸ ਤਰ੍ਹਾਂ ਦੀਆਂ 14 ਸਿਫਾਰਿਸ਼ਾਂ ਜਾਰੀ ਕੀਤੀਆਂ।

ਅਦਾਲਤ ਦਾ ਕਹਿਣਾ ਹੈ ਕਿ ਜੇਕਰ ਕਿਸੇ ਐਥਲੀਟ ਦੇ ਸਿਰ ’ਤੇ ਗੰਭੀਰ ਸੱਟ ਲੱਗਦੀ ਹੈ ਤਾਂ ਅਗਲੇ ਮੈਚ ਲਈ ਉਸ ਨੂੰ ਮੈਡੀਕਲੀ ਫਿੱਟ ਹੋਣ ਦੀ ਐਮ.ਆਰ.ਆਈ. ਜਾਂ ਸਿਟੀ ਸਕੈਨ ਦੀ ਰਿਪੋਰਟ ਜਮ੍ਹਾ ਕਰਵਾਉਣੀ ਚਾਹੀਦੀ ਹੈ। ਹਰ ਬੌਕਸਰ ਨੂੰ ਛੇ ਮਹੀਨਿਆਂ ਬਾਅਦ ਸਿਟੀ ਸਕੈਨ ਕਰਵਾਉਣੀ ਪਵੇਗੀ।

ਜਾਣਕਾਰੀ ਮੁਤਾਬਕ ਹੇਗ ਨੂੰ ਲੜਨ ਲਈ $3,000 ਮਿਲਦੇ ਸਨ ਅਤੇ ਜੇਕਰ ਉਹ ਜਿੱਤ ਜਾਂਦਾ ਤਾਂ ਵਾਧੂ $500 ਵੀ ਮਿਲਣੇ ਸਨ। ਉਸ ਦੇ ਕੋਚ ਅਤੇ ਹੋਰਾਂ ਨੇ ਦੱਸਿਆ ਕਿ ਉਹ ਰਿੰਗ ਵਿਚ ਜਾਣਾ ਚਾਹੁੰਦਾ ਸੀ। ਪੋਸਟਮਾਰਟਮ ਵਿਚ ਪਤਾ ਲੱਗਾ ਕਿ ਉਸ ਦੀ ਮੌਤ ਦਿਮਾਗ ਦੇ ਸਦਮੇ ਕਾਰਨ ਹੋਈ। ਐਡਮਿੰਟਨ ਸਿਟੀ ਅਦਾਲਤ ਵਲੋਂ ਦਿੱਤੀਆਂ ਗਈਆਂ ਸਿਫਾਰਿਸ਼ਾਂ ’ਤੇ ਰੀਵਿਊ ਕਰੇਗੀ ਅਤੇ ਮਾਰਚ ਤੱਕ ਇਸ ਦਾ ਜਵਾਬ ਦੇਵੇਗੀ।