ਓਨਟਾਰੀਓ ਦੇ ਡਰਹਮ ਹਲਕੇ ਵਿਚ ਅੱਜ ਮੈਂਬਰ ਪਾਰਲੀਮੈਂਟ ਸੀਟ ਲਈ ਹੋ ਰਹੀ ਹੈ ਜ਼ਿਮਨੀ ਚੋਣ

ਓਨਟਾਰੀਓ ਦੇ ਡਰਹਮ ਹਲਕੇ ਵਿਚ ਅੱਜ ਮੈਂਬਰ ਪਾਰਲੀਮੈਂਟ ਸੀਟ ਲਈ ਜ਼ਿਮਨੀ ਚੋਣ ਹੋ ਰਹੀ ਹੈ। ਇਹ ਸੀਟ ਕੰਜ਼ਰਵੇਟਿਵ ਦੇ ਸਾਬਕਾ ਪ੍ਰਧਾਨ ਏਰਿਨ ਓ-ਟੂਲ ਵਲੋਂ ਖਾਲੀ ਕੀਤੀ ਗਈ ਸੀ।

ਡਾਊਨਟਾਊਨ ਟੋਰਾਂਟੋ ਤੋਂ ਕਰੀਬ ਇੱਕ ਘੰਟੇ ਦੀ ਦੂਰੀ ’ਤੇ ਸਥਿਤ ਡਰਹਮ ਹਲਕਾ ਕੰਜ਼ਰੇਵਿਟਵ ਦਾ ਮਜਬੂਤ ਗੜ੍ਹ ਮੰਨਿਆ ਜਾਂਦਾ ਹੈ।

2004 ਵਿਚ ਸਟੀਫਨ ਹਾਰਪਰ ਵਲੋਂ ਪਾਰਟੀ ਦੀ ਵਾਗਡੋਰ ਸੰਭਾਲਣ ਤੋਂ ਬਾਅਦ ਲਗਾਤਾਰ ਕੰਜ਼ਰੇਵਿਟਵ ਹੀ ਇਹ ਸੀਟ ਜਿੱਤਦੇ ਆਏ ਹਨ। ਓ-ਟੂਲ ਨੇ ਪਿਛਲੇ ਸਪਰਿੰਗ ਵਿਚ ਇਹ ਸੀਟ ਛੱਡ ਦਿੱਤੀ ਸੀ।

ਉਹ ਪਹਿਲੀ ਵਾਰ 2012 ਵਿਚ ਮੈਂਬਰ ਪਾਰਲੀਮੈਂਟ ਚੁਣੇ ਗਏ ਸਨ ਅਤੇ ਅਗਸਤ 2020 ਤੋਂ ਫਰਵਰੀ 2022 ਤੱਕ ਵਿਰੋਧੀ ਧਿਰ ਦੇ ਨੇਤਾ ਸਨ। ਕੰਜ਼ਰੇਵਿਟਵ ਨੇ ਇਸ ਸੀਟ ਤੋਂ ਜਮੀਲ ਜਿਵਾਨੀ ਨੂੰ ਉਤਾਰਿਆ ਹੈ ਜੋ ਕਿ ਇੱਕ ਵਕੀਲ ਅਤੇ ਟਿੱਪਣੀਕਾਰ ਹਨ। ਉਥੇ ਹੀ ਲਿਬਰਲਸ ਵਲੋਂ ਰਾਬਰਟ ਰੌਕ ਉਮੀਦਵਾਰ ਹਨ ਜੋ ਕਿ ਡਰਹਮ ਹਲਕੇ ਦੀ ਨਗਰਪਾਲਿਕਾ ਦੇ ਕੌਂਸਲਰ ਹਨ।

ਖਾਸ ਗੱਲ ਇਹ ਹੈ ਕਿ ਰੌਕ ਨੇ ਸ਼ੁਰੂ ਵਿਚ ਕੰਜ਼ਰਵੇਟਿਵ ਵਲੋਂ ਇਲੈਕਸ਼ਨ ਲੜਨ ਦੀ ਮੰਗ ਕੀਤੀ ਸੀ ਪਰ ਓਧਰੋਂ ਕੋਈ ਰਿਸਪੌਂਸ ਨਾ ਮਿਲਣ ’ਤੇ ਲਿਬਰਲਸ ਵਲੋਂ ਲੜਨ ਦਾ ਫੈਸਲਾ ਕੀਤਾ। ਕੰਜ਼ਰਵੇਟਿਵ ਦੀ ਨਜ਼ਰ ਇਸ ਜ਼ਿਮਨੀ ਚੋਣ ਵਿਚ ਵੋਟ ਸ਼ੇਅਰ ’ਤੇ ਹੈ। ਓ-ਟੂਲ ਨੇ 2021 ਵਿਚ 46.39 ਫੀਸਦੀ ਵੋਟਸ ਨਾਲ ਇਹ ਸੀਟ ਜਿੱਤੀ ਸੀ।