18.54C Vancouver 18.54C VancouverApr 29, 2026 1:49 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਵਿੱਤ ਮੰਤਰੀ ਫ੍ਰਾਂਸਵਾ ਫਿਲਿਪ ਸ਼ੈਂਪੇਨ ਨੇ ਬੀਤੇ ਦਿਨ ਸਦਨ ਵਿਚ ਸਾਲ 2026 ਦਾ ਸਪਰਿੰਗ ਮਿੰਨੀ ਬਜਟ ਪੇਸ਼ ਕੀਤਾ। ਇਸ ਵਿਚ ਸਰਕਾਰ ਨੇ ਦੇਸ਼ ਦੀ ਆਰਥਿਕਤਾ ਨੂੰ ਮਜ਼ਬੂਤ ਕਰਨ ਲਈ ਕਈ ਐਲਾਨ ਕੀਤੇ ਹਨ।
ਟੀਮ ਕੈਨੇਡਾ ਸਟਰੌਂਗ ਨਾਮ ਹੇਠ ਹੁਨਰਮੰਦ ਕਾਮਿਆਂ ਦੀ ਘਾਟ ਨੂੰ ਪੂਰਾ ਕਰਨ ਲਈ ਇੱਕ ਨਵੀਂ ਮੁਹਿੰਮ ਸ਼ੁਰੂ ਕੀਤੀ ਜਾ ਰਹੀ ਹੈ। ਇਸ ਤਹਿਤ ਫਿਸਕਲ ਸਾਲ 2030-31 ਤੱਕ 1,00,000 ਨਵੇਂ ਸਕਿੱਲਡ ਟਰੇਡ ਵਰਕਰਜ਼ ਨੂੰ ਟ੍ਰੇਨਿੰਗ ਦੇ ਕੇ ਉਨ੍ਹਾਂ ਨੂੰ ਰੁਜ਼ਗਾਰ ਦੇ ਕਾਬਲ ਬਣਾਉਣ ਦਾ ਟੀਚਾ ਮਿੱਥਿਆ ਗਿਆ ਹੈ।
ਇਹ ਕਦਮ ਹਾਊਸਿੰਗ ਨਿਰਮਾਣ ਵਧਾਉਣ ਅਤੇ ਨਵੇਂ ਤੇ ਚੱਲ ਰਹੇ ਇਨਫਰਾਸਟਕਚਰ ਤੇ ਵੱਡੇ ਸਰੋਤ ਪ੍ਰੋਜੈਕਟ ਵਿਚ ਸਕਿੱਲਡ ਲੇਬਰ ਫੋਰਸ ਦੀ ਕਮੀ ਨੂੰ ਦੂਰ ਕਰਨ ਦਾ ਹਿੱਸਾ ਹੈ। ਇਸ ਸਬੰਧ ਵਿਚ ਨੌਜਵਾਨਾਂ ਨੂੰ ਟ੍ਰੇਨ ਕਰਨ ਲਈ ਪੰਜ ਸਾਲਾਂ ਵਿਚ ਮਾਰਕ ਕਾਰਨੀ ਸਰਕਾਰ ਵਲੋਂ $6 ਬਿਲੀਅਨ ਖ਼ਰਚ ਕੀਤੇ ਜਾਣ ਦੀ ਤਜਵੀਜ਼ ਹੈ।
ਇਸ ਤੋਂ ਇਲਾਵਾ ਕੰਮ ਦੇ ਸਿਲਸਿਲੇ ਵਿਚ ਦੂਜੀ ਥਾਂ ਜਾਣ ਵਾਲੇ ਕਾਮਿਆਂ ਲਈ ਲੇਬਰ ਮੋਬਿਲਿਟੀ ਕਟੌਤੀ ਦੀ ਹੱਦ $4,000 ਤੋਂ ਵਧਾ ਕੇ $10,000 ਕਰਨ ਦਾ ਪ੍ਰਸਤਾਵ ਹੈ, ਨਾਲ ਹੀ ਕਟੌਤੀ ਕਲੇਮ ਕਰਨ ਲਈ ਡਿਸਟੈਂਸ ਰੂਲ ਵਿਚ ਵੀ ਨਰਮੀ ਦਿੱਤੀ ਗਈ ਹੈ। ਇਹ ਨਵੇਂ ਨਿਯਮ 2026 ਦੇ ਟੈਕਸ ਸਾਲ ਅਤੇ ਉਸ ਤੋਂ ਬਾਅਦ ਦੇ ਸਾਲਾਂ ਲਈ ਲਾਗੂ ਹੋਣਗੇ।
