ਕੈਨੇਡਾ ’ਚ ਘਰ ਖਰੀਦਣ ਵਾਲਿਆਂ ਨੂੰ ਵੱਡਾ ਝਟਕਾ, ਵਿਦੇਸ਼ੀਆਂ ਲਈ ਟਰੂਡੋ ਸਰਕਾਰ ਨੇ ਕੀਤਾ ਵੱਡਾ ਐਲਾਨ

ਕੈਨੇਡਾ ਸਰਕਾਰ ਨੇ ਵਿਦੇਸ਼ੀ ਘਰ ਖਰੀਦਣ ’ਤੇ ਲਗਾਈ ਗਈ ਰੋਕ ਦੋ ਸਾਲਾਂ ਲਈ ਵਧਾ ਦਿੱਤੀ ਹੈ। ਇਹ ਪਾਬੰਦੀ 1 ਜਨਵਰੀ 2025 ਨੂੰ ਸਮਾਪਤ ਹੋਣ ਵਾਲੀ ਸੀ ਪਰ ਗੈਰ-ਕੈਨੇਡੀਅਨ ਹੁਣ 1 ਜਨਵਰੀ 2027 ਤੱਕ ਕੈਨੇਡਾ ਵਿਚ ਘਰ ਨਹੀਂ ਖਰੀਦ ਸਕਣਗੇ। ਵਿੱਤ ਮੰਤਰੀ

ਕ੍ਰਿਸਟੀਆ ਫੀਲੈਂਡ ਨੇ ਇੱਕ ਰਿਲੀਜ਼ ਵਿਚ ਇਸ ਦੀ ਘੋਸ਼ਣਾ ਕੀਤੀ। ਉਨ੍ਹਾਂ ਇਸ ਰੋਕ ਨੂੰ ਵਧਾਉਣ ਪਿੱਛੇ ਕੈਨੇਡਾ ਭਰ ਦੇ ਸ਼ਹਿਰਾਂ ਵਿਚ ਰਿਹਾਇਸ਼ ਦੀ ਸਮਰੱਥਾ ਦੀ ਚਿੰਤਾ ਦੱਸੀ ਹੈ। ਸਰਕਾਰ ਨੇ ਇਹ ਨਿਯਮ 2022 ਵਿਚ ਪੇਸ਼ ਕੀਤੇ ਸਨ, ਜੋ ਵਿਦੇਸ਼ੀ ਨਾਗਰਿਕ ਅਤੇ ਵਪਾਰਕ ਉਦਯੋਗ ਦੇ ਕੈਨੇਡਾ ਵਿਚ ਰਿਹਾਇਸ਼ੀ ਜਾਇਦਾਦ ਖਰੀਦਣ ’ਤੇ ਰੋਕ ਲਗਾਉਂਦੇ ਹਨ।

ਹਾਲਾਂਕਿ, ਇਸ ਵਿਚ ਕੁਝ ਇੰਟਰਨੈਸ਼ਨਲ ਸਟੂਡੈਂਟਸ, ਸ਼ਰਨਾਰਥੀ ਦਾਅਵੇਦਾਰਾਂ ਅਤੇ ਅਸਥਾਈ ਕਰਮਚਾਰੀ ਨੂੰ ਛੋਟ ਹੈ। ਵਿੱਤ ਮੰਤਰੀ ਨੇ ਸਟੇਟਮੈਂਟ ਵਿਚ ਕਿਹਾ ਕਿ ਵਿਦੇਸ਼ੀ ਖਰੀਦਦਾਰ ’ਤੇ ਬੈਨ ਵਧਾਏ ਜਾਣ ਨਾਲ ਕੈਨੇਡੀਅਨ ਪਰਿਵਾਰਾਂ ਲਈ ਘਰਾਂ ਦੀ ਉਪਲਬਧਤਾ ਯਕੀਨੀ ਬਣਾਉਣ ਵਿਚ ਮਦਦ ਮਿਲੇਗੀ। ਉਥੇ ਹੀ, ਮਾਹਿਰ ਇਸ ਬੈਨ ’ਤੇ ਸਵਾਲ ਉਠਾ ਚੁੱਕੇ ਹਨ।

ਬੀ. ਸੀ. ਦੀ ਰੀਅਲ ਅਸਟੇਟ ਐਸੋਸੀਏਸ਼ਨ ਦੇ ਮੁੱਖ ਅਰਥ ਸ਼ਾਸਤਰੀ ਬ੍ਰੈਂਡਨ ਓਗਮੰਡਸਨ ਦਾ ਕਹਿਣਾ ਸੀ ਕਿ ਇਹ ਬੈਨ ਕਿਸੇ ਹਾਊਸਿੰਗ ਪਾਲਿਸੀ ਦੀ ਬਜਾਏ ਵਧੇਰੇ ਸਿਆਸੀ ਲੱਗਦਾ ਹੈ ਕਿਉਂਕਿ ਹਾਊਸਿੰਗ ਮਾਰਕੀਟ ਵਿਚ ਵਿਦੇਸ਼ੀ ਖਰੀਦਦਾਰ ਦੀ ਹਿੱਸੇਦਾਰੀ ਬਹੁਤ ਘੱਟ ਰਹੀ ਹੈ। 2021 ਦੌਰਾਨ ਬੀ. ਸੀ. ਵਿਚ ਘਰਾਂ ਦੀ ਵਿਕਰੀ ਵਿਚ ਸਿਰਫ 1.1 ਫੀਸਦੀ ਦੇ ਆਸਪਾਸ ਵਿਦੇਸ਼ੀ ਖਰੀਦਦਾਰ ਸਨ।