ਸਟੀਵਨ ਮੈਕਕਿਨਨ ਵਲੋਂ ਹਾਊਸ ਔਫ ਕੌਮਨਜ਼ ਵਿਚ ਇਤਿਹਾਸਕ ਕੈਨੇਡੀਅਨ ਸਪੇਸ ਲਾਂਚ ਐਕਟ ਕੀਤਾ ਗਿਆ ਪੇਸ਼

ਕੈਨੇਡਾ ਦੇ ਟਰਾਂਸਪੋਰਟ ਮੰਤਰੀ ਸਟੀਵਨ ਮੈਕਕਿਨਨ ਨੇ ਦੇਸ਼ ਨੂੰ ਪੁਲਾੜ ਖੇਤਰ ਵਿਚ ਆਤਮਨਿਰਭਰ ਬਣਾਉਣ ਲਈ ਅੱਜ ਹਾਊਸ ਔਫ ਕੌਮਨਜ਼ ਵਿਚ ਇਤਿਹਾਸਕ ਕੈਨੇਡੀਅਨ ਸਪੇਸ ਲਾਂਚ ਐਕਟ ਪੇਸ਼ ਕੀਤਾ ਹੈ। ਮੈਕਕਿਨਨ ਦੇ ਐਲਾਨ ਮੁਤਾਬਕ, ਇਹ ਨਵਾਂ ਕਾਨੂੰਨ ਸਰਕਾਰ ਨੂੰ ਆਪਣੀ ਧਰਤੀ ਤੋਂ ਪੁਲਾੜ ਵਿਚ ਰਾਕੇਟ ਅਤੇ ਸੈਟੇਲਾਈਟ ਲੌਂਚ ਕਰਨ ਅਤੇ ਉਨ੍ਹਾਂ ਦੀ ਸੁਰੱਖਿਅਤ ਵਾਪਸੀ ਦੀਆਂ ਗਤੀਵਿਧੀਆਂ ਨੂੰ ਰੈਗੂਲੇਟ ਕਰਨ ਲਈ ਅਧਿਕਾਰ ਦੇਵੇਗਾ।

ਮੌਜੂਦਾ ਸਮੇਂ ਕੈਨੇਡਾ G7 ਵਿਚ ਇਕਲੌਤਾ ਅਜਿਹਾ ਮੁਲਕ ਹੈ ਜਿਸ ਕੋਲ ਆਪਣੀ ਖ਼ੁਦ ਦੀ ਸਪੇਸ ਲਾਂਚ ਸਮਰੱਥਾ ਨਹੀਂ ਹੈ ਅਤੇ ਅਮਰੀਕਾ ਵਰਗੇ ਦੂਜੇ ਦੇਸ਼ਾਂ 'ਤੇ ਨਿਰਭਰ ਰਹਿਣਾ ਪੈਂਦਾ ਹੈ।

ਮੈਕਕਿਨਨ ਨੇ ਇੱਕ ਬ੍ਰੀਫਿੰਗ ਦੌਰਾਨ ਸਪੱਸ਼ਟ ਕੀਤਾ ਕਿ ਕੈਨੇਡੀਅਨ ਧਰਤੀ ਤੋਂ ਹੋਣ ਵਾਲੀ ਨਵੀਂ ਲੌਂਚਿੰਗ ਮਿਲਟਰੀ ਅਤੇ ਸਿਵਲੀਅਨ ਦੋਵਾਂ ਉਦੇਸ਼ਾਂ ਲਈ ਵਰਤੀ ਜਾ ਸਕੇਗੀ ਅਤੇ ਇਸ ਕਦਮ ਨਾਲ ਦੇਸ਼ ਵਿਚ ਅਰਬਾਂ ਡਾਲਰਾਂ ਦੇ ਨਿਵੇਸ਼ ਦੇ ਨਾਲ-ਨਾਲ ਹਜ਼ਾਰਾਂ ਨਵੇਂ ਰੁਜ਼ਗਾਰ ਵੀ ਪੈਦਾ ਹੋਣਗੇ। ਇਸ ਦਿਸ਼ਾ ਵਿਚ ਸਰਕਾਰ ਨੋਵਾ ਸਕੋਸ਼ੀਆ ਵਿਚ ਲੌਂਚ ਪੈਡ ਬਣਾਉਣ ਲਈ ਪਹਿਲਾਂ ਹੀ $200 ਮਿਲੀਅਨ ਦੇ ਨਿਵੇਸ਼ ਦਾ ਐਲਾਨ ਕਰ ਚੁੱਕੀ ਹੈ।