ਕੈਨੇਡਾ ਸਰਕਾਰ ਵਲੋਂ ਏਆਈ ਚੈਟਬੋਟਸ ਲਈ ਬਣਾਏ ਜਾ ਸਕਦੇ ਹਨ ਨਵੇਂ ਨਿਯਮ: ਸ਼ੌਨ ਫਰੇਜ਼ਰ

ਕੈਨੇਡਾ ਸਰਕਾਰ ਵਲੋਂ ਏਆਈ ਚੈਟਬੋਟਸ ਲਈ ਨਵੇਂ ਨਿਯਮ ਬਣਾਏ ਜਾ ਸਕਦੇ ਹਨ। ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਮੰਤਰੀ ਈਵਾਨ ਸੋਲੋਮਨ ਅਤੇ ਨਿਆਂ ਮੰਤਰੀ ਸ਼ੌਨ ਫਰੇਜ਼ਰ ਨੇ ਇਸ ਦੇ ਸੰਕੇਤ ਦਿੱਤੇ ਹਨ। ਇਹ ਕਦਮ ਬੀ. ਸੀ. ਦੇ ਟੰਬਲਰ ਰਿਜ ਵਿਚ ਹੋਈ ਸਮੂਹਿਕ ਗੋਲੀਬਾਰੀ ਮਗਰੋਂ ਚੈਟ ਜੀਪੀਟੀ 'ਤੇ ਹਮਲਵਾਰ ਦੀ ਪੁਰਾਣੀਆਂ ਗਤੀਵਧੀਆਂ ਦਾ ਖੁਲਾਸਾ ਹੋਣ ਤੋਂ ਬਾਅਦ ਉਠਾਇਆ ਜਾ ਰਿਹਾ ਹੈ।

ਵਾਲ ਸਟ੍ਰੀਟ ਜਰਨਲ ਦੀ ਰਿਪੋਰਟ ਮੁਤਾਬਕ, ਟੰਬਲਰ ਰਿਜ ਦੇ ਸ਼ੂਟਰ ਜੈਸੀ ਵੈਨ ਦਾ ਓਪਨ ਏਆਈ ਅਕਾਊਂਟ ਹਿੰਸਕ ਪੋਸਟਾਂ ਕਾਰਨ ਸੱਤ ਮਹੀਨੇ ਪਹਿਲਾਂ ਹੀ ਬੰਦ ਕਰ ਦਿੱਤਾ ਗਿਆ ਸੀ ਪਰ ਓਪਨ ਏਆਈ ਨੇ ਪੁਲਿਸ ਨੂੰ ਇਸ ਬਾਰੇ ਕੋਈ ਸੂਚਨਾ ਨਹੀਂ ਦਿੱਤੀ। ਮੰਤਰੀ ਸੋਲੋਮਨ ਨੇ ਮੰਗਲਵਾਰ ਨੂੰ ਔਟਵਾ ਵਿਚ ਓਪਨ ਏਆਈ ਦੇ ਸੀਨੀਅਰ ਸੁਰੱਖਿਆ ਅਧਿਕਾਰੀ ਨਾਲ ਮੁਲਾਕਾਤ ਕਰਕੇ ਆਪਣੀ ਨਾਰਾਜ਼ਗੀ ਜ਼ਾਹਿਰ ਕੀਤੀ।

ਉਨ੍ਹਾਂ ਕਿਹਾ ਕਿ ਏਆਈ ਚੈਟਬੋਟਸ ਵਰਗੇ ਟੂਲਸ ਨੂੰ ਰੈਗੂਲੇਟ ਕਰਨ ਲਈ ਸਾਰੇ ਵਿਕਲਪ ਖੁੱਲ੍ਹੇ ਹਨ। ਉਥੇ ਹੀ, ਜਸਟਿਸ ਮਿਨਿਸਟਰ ਸ਼ੌਨ ਫਰੇਜ਼ਰ ਨੇ ਵੀ ਕਿਹਾ ਕਿ ਕੈਨੇਡੀਅਨ ਦੀ ਸੇਫਟੀ ਲਈ ਸਾਰੇ ਵਿਕਲਪ ਖੁੱਲ੍ਹੇ ਹਨ, ਉਨ੍ਹਾਂ ਕਿਹਾ ਕਿ ਓਪਨ ਏਆਈ ਦੇ ਅਧਿਕਾਰੀਆਂ ਨਾਲ ਮੀਟਿੰਗ ਦਾ ਮਕਸਦ ਇਹ ਪਤਾ ਲਗਾਉਣਾ ਸੀ ਕਿ ਕੰਪਨੀ ਅਤੇ ਸਰਕਾਰ ਕੀ ਕਦਮ ਉਠਾ ਸਕਦੀ ਹੈ ਅਤੇ ਏਆਈ ਕੰਪਨੀਆਂ ਨੂੰ ਕਾਨੂੰਨੀ ਤੌਰ 'ਤੇ ਅਜਿਹੀ ਜਾਣਕਾਰੀ ਸਾਂਝੀ ਕਰਨ ਲਈ ਕਿਵੇਂ ਪਾਬੰਦ ਕੀਤਾ ਜਾ ਸਕਦਾ ਹੈ।