11.37C Vancouver 11.37C VancouverMar 6, 2024 8:22 PM - The Canadian Press
ਕੈਨੇਡਾ ਦੀ ਮੁੱਖ ਵਿਰੋਧੀ ਪਾਰਟੀ ਕੰਜ਼ਰਵੇਟਿਵ ਵਲੋਂ ਅਰਾਈਵਕੈਨ ਐਪ ਘੋਟਾਲੇ ਦਾ ਮੁੱਦਾ ਬਣਾਏ ਜਾਣ ਮਗਰੋਂ ਟਰੂਡੋ ਸਰਕਾਰ ਨੇ ਇਸ ਐਪ ਲਈ ਜ਼ਿੰਮੇਵਾਰ ਕੰਪਨੀ ਜੀ.ਸੀ. ਸਟਾਟਜੀਸ ਦੇ ਫੈਡਰਲ ਸਰਕਾਰ ਦੇ ਕਿਸੇ ਵੀ ਇਕਰਾਰਨਾਮੇ ਲਈ ਬੋਲੀ ਲਗਾਉਣ ’ਤੇ ਪਾਬੰਦੀ ਲਗਾ ਦਿੱਤੀ ਹੈ।
ਨਵੰਬਰ 2023 ਵਿਚ ਜਨਤਕ ਸੇਵਾਵਾਂ ਅਤੇ ਖਰੀਦਦਾਰੀ ਡਿਪਾਰਟਮੈਂਟ ਨੇ ਜੀ.ਸੀ. ਸਟਾਟਜੀਸ ਨੂੰ ਉਸ ਦੇ ਖਰੀਦ ਪ੍ਰਕਿਰਿਆਵਾਂ ਵਿਚ ਹਿੱਸਾ ਲੈਣ ਤੋਂ ਸਸਪੈਂਡ ਕੀਤਾ ਸੀ। ਪੀ.ਐੱਸ.ਪੀ.ਸੀ. ਨੇ ਪੁਸ਼ਟੀ ਕੀਤੀ ਕਿ ਜਿਸ ਫਰਮ ਨੂੰ ਪਹਿਲਾ ਅਰਾਈਵਕੈਨ ਦਾ ਠੇਕਾ ਪ੍ਰਾਪਤ ਹੋਇਆ ਸੀ, ਉਸ ਨੂੰ 2015 ਤੋਂ ਲੈ ਕੇ 34 ਸਰਕਾਰੀ ਠੇਕੇ ਦਿੱਤੇ ਗਏ ਸਨ, ਜਿਨ੍ਹਾਂ ਦੀ ਕੁੱਲ ਕੀਮਤ $59.8 ਮਿਲੀਅਨ ਸੀ।
ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਇਲੀਵਰ ਅਰਾਈਵਕੈਨ ਐਪ ਘੋਟਾਲੇ ਦਾ ਮੁੱਦਾ ਕਈ ਵਾਰ ਹਾਊਸ ਆਫ਼ ਕਾਮਨ ਵਿਚ ਉਠਾ ਚੁੱਕੇ ਹਨ।
ਵਿਵਾਦਪੂਰਨ ਅਰਾਈਵਕੈਨ ਐਪ ਨਾਲ ਸੰਬੰਧਿਤ ਚੱਲ ਰਹੀਆਂ ਜਾਂਚਾਂ ਵੱਲ ਇਸ਼ਾਰਾ ਕਰਦੇ ਹੋਏ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਪਿਛਲੇ ਹਫ਼ਤੇ ਕਿਹਾ ਸੀ ਕਿ ਕੋਵਿਡ ਸਮੇਂ ਗਲਤ ਤਰੀਕੇ ਨਾਲ ਲਾਭ ਲੈਣ ਦੀ ਕੋਸ਼ਿਸ਼ ਕਰਨ ਵਾਲੇ ਕਿਸੇ ਵੀ ਅਧਿਕਾਰੀ ਨੂੰ ਬਖਸ਼ਿਆ ਨਹੀਂ ਜਾਵੇਗਾ।
