ਕੈਨੇਡਾ ਵਿਚ ਆਟੋ ਮੋਬਾਈਲ ਚੋਰੀ ’ਤੇ ਗਰਮਾਈ ਰਾਜਨੀਤੀ, ਸੱਦੀ ਗਈ ਮੀਟਿੰਗ

ਕੈਨੇਡਾ ਵਿਚ ਆਟੋ ਮੋਬਾਈਲ ਚੋਰੀ ’ਤੇ ਗਰਮਾਈ ਰਾਜਨੀਤੀ ਵਿਚਕਾਰ ਅੱਜ ਇਸ ਮੁੱਦੇ ’ਤੇ ਓਟਾਵਾ ਵਿਚ ਨੈਸ਼ਨਲ ਮੀਟਿੰਗ ਹੋ ਰਹੀ ਹੈ, ਜਿਸ ਵਿਚ ਸਰਕਾਰ ਦੇ ਵੱਖ-ਵੱਖ ਵਿਭਾਗਾਂ ਦੇ ਅਧਿਕਾਰੀ, ਪੁਲਿਸ ਅਧਿਕਾਰੀ ਅਤੇ ਆਟੋ ਉਦਯੋਗ ਦੇ ਲੀਡਰਸ ਸ਼ਾਮਲ ਹਨ।

ਇਹ ਮੀਟਿੰਗ ਉਸ ਸਮੇਂ ਸੱਦੀ ਗਈ ਹੈ ਜਦੋਂ ਕੰਜ਼ਰਵੇਟਿਵ ਵਲੋਂ ਲਗਾਤਾਰ ਇਸ ਮੁੱਦੇ ’ਤੇ ਲਿਬਰਲਸ ਨੂੰ ਘੇਰਿਆ ਜਾ ਰਿਹਾ ਸੀ, ਫੈਡਰਲ ਸਰਕਾਰ ਦਾ ਖੁਦ ਦਾ ਕਹਿਣਾ ਹੈ ਕਿ ਕੈਨੇਡਾ ਵਿਚ ਹਰ ਸਾਲ ਅੰਦਾਜ਼ਨ 90,000 ਕਾਰਾਂ ਚੋਰੀ ਹੁੰਦੀਆਂ ਹਨ, ਜਿਸ ਦੇ ਨਤੀਜੇ ਵਜੋਂ ਕੈਨੇਡੀਅਨ ਬੀਮਾ ਪਾਲਿਸੀ ਧਾਰਕ ਤੇ ਟੈਕਸਦਾਤਾ ਨੂੰ ਲਗਭਗ $1 ਬਿਲੀਅਨ ਦਾ ਨੁਕਸਾਨ ਹੁੰਦਾ ਹੈ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਕਿਹਾ ਹੈ ਕਿ ਸਰਕਾਰ ਆਟੋ ਚੋਰੀ ਵਿਚ ਸ਼ਾਮਲ ਮੁਲਜ਼ਮਾਂ ’ਤੇ ਜੁਰਮਾਨਾ ਵਧਾਉਣ ਜਾ ਰਹੀ ਹੈ।

ਦੱਸ ਦੇਈਏ ਕਿ ਕੈਨੇਡਾ ਤੋਂ ਚੋਰੀ ਹੋਏ ਵਾਹਨਾਂ ਨੂੰ ਅਫ਼ਰੀਕਾ ਅਤੇ ਮਿਡਲ ਈਸਟ ਭੇਜਿਆ ਜਾਂਦਾ ਹੈ। ਬੁੱਧਵਾਰ ਜਨਤਕ ਸੁਰੱਖਿਆ ਮੰਤਰੀ ਡੋਮਿਨਿਕ ਲੇਬਲੈਂਕ ਨੇ ਚੋਰੀ ਹੋਏ ਵਾਹਨਾਂ ਦੇ ਨਿਰਯਾਤ ਨਾਲ ਨਜਿੱਠਣ ਵਿਚ ਮਦਦ ਲਈ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਲਈ $28 ਮਿਲੀਅਨ ਦੀ ਨਵੀਂ ਫੰਡਿੰਗ ਵੀ ਐਲਾਨੀ ਹੈ।

ਗੌਰਤਲਬ ਹੈ ਕਿ ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਨੇ ਹਾਊਸ ਆਫ ਕਾਮਨਜ਼ ਵਿਚ ਆਟੋ ਮੋਬਾਈਲ ਚੋਰੀ ਅਤੇ ਇਸ ਨਾਲ ਜੁੜੇ ਵਧੇ ਕ੍ਰਾਈਮ ਲਈ ਟਰੂਡੋ ਸਰਕਾਰ ਨੂੰ ਜ਼ਿੰਮੇਵਾਰ ਠਹਿਰਾਉਂਦਿਆਂ ਇਹ ਮੁੱਦਾ ਉਠਾਇਆ ਸੀ ਕਿ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਕੋਲ ਕੰਟੇਨਰ ਨੂੰ ਸਰਚ ਕਰਨ ਲਈ ਸਰੋਤਾਂ ਦੀ ਘਾਟ ਹੈ।