ਬੀ.ਸੀ. 'ਚ ਕੋਵਿਡ-19 (ਕੋਰੋਨਾਵਾਇਰਸ) ਦੇ 5ਵੇਂ ਮਾਮਲੇ ਦੀ ਪੁਸ਼ਟੀ

ਬੀ.ਸੀ. ਸੂਬੇ ਵਿੱਚ ਕੋਵਿਡ-19 ਦਾ ਨਵਾਂ ਮਾਮਲਾ ਉਜਾਗਰ ਹੋਇਆ ਹੈ। ਇਸਦੇ ਨਾਲ ਹੀ ਸੂਬੇ ਵਿੱਚ ਕੋਵਿਡ-19 ਨਾਲ ਜੁੜੇ ਮਾਮਲਿਆਂ ਦੀ ਗਿਣਤੀ 5 ਤਕ ਪਹੁੰਚ ਗਈ ਹੈ। ਕੋਰੋਨਾਵਾਇਰਸ ਜਿਸਨੂੰ ਕਿ ਹੁਣ ਕੋਵਿਡ-19 ਦਾ ਨਾਮ ਦੇ ਦਿੱਤਾ ਗਿਆ ਹੈ, ਇਸ ਬਿਮਾਰੀ ਨੂੰ ਲੈਕੇ ਮੰਗਲਵਾਰ ਨੂੰ ਪੱਤਰਕਾਰਾਂ ਨਾਲ ਜਾਣਕਾਰੀ ਸਾਂਝੀ ਕਰਨ ਤੋਂ ਬਾਅਦ, ਨਿਰਧਾਰਿਤ ਸਮੇਂ ਅਨੁਸਾਰ, ਸ਼ੁੱਕਰਵਾਰ ਨੂੰ ਅਧਿਕਾਰੀਆਂ ਨੇ ਦੁਪਹਿਰ ਕਰੀਬ 12.30 ਵਜੇ ਜਾਣਕਾਰੀ ਸਾਂਝੀ ਕੀਤੀ। ਹਾਲਾਂਕਿ ਸਿਹਤ ਅਧਿਕਾਰੀਆਂ ਦਾ ਕਹਿਣਾ ਸੀ ਕਿ ਇਸ ਤਾਜ਼ਾ ਮਾਮਲੇ ਨੂੰ ਲੈਕੇ, ਵਿਨੀਪੈਗ ਸਥਿਤ, ਰਾਸ਼ਟਰੀ ਮਾਈਕਰੋਬਾਇਓਲੋਜੀ ਲੈਬ ਤੋਂ ਹਾਮੀ ਭਰੇ ਜਾਣਾ ਬਾਕੀ ਹੈ। ਇਹ ਜਾਣਕਾਰੀ ਸੂਬੇ ਵੱਲੋ ਵਾਇਰਸ ਸੰਬੰਧੀ ਸਾਂਝੀ ਕੀਤੀ ਜਾਣ ਵਾਲੀ ਬਾਈ-ਵੀਕਲੀ ਗੱਲਬਾਤ ਦੌਰਾਨ ਸਾਹਮਣੇ ਲਿਆਂਦੀ ਗਈ। ਤਾਜ਼ਾ ਮਾਮਲੇ 'ਚ ਪੀੜਤ ਇੱਕ ਔਰਤ ਨੂੰ ਦੱਸਿਆ ਗਿਆ ਹੈ, ਜਿਸਦੀ ਉਮਰ 30 ਤੋਂ 40 ਸਾਲ ਦਰਮਿਆਨ ਦੱਸੀ ਗਈ ਹੈ। ਗੱਲਬਾਤ ਕਰਨ ਲਈ ਸੂਬਾਈ ਸਿਹਤ ਅਫਸਰ, ਡਾ. ਬੌਨੀ ਹੈਨਰੀ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਮੌਜੂਦ ਸਨ। ਅਧਿਕਾਰੀਆਂ ਨੇ ਦੱਸਿਆ ਕਿ ਔਰਤ ਬੀਤੇ ਹਫਤੇ ਚੀਨ 'ਚ ਸ਼ੰਘਾਈ ਤੋਂ ਪਰਤੀ ਸੀ। ਉਨ੍ਹਾਂ ਨੂੰ ਮੰਗਲਵਾਰ ਨੂੰ ਪਾਜੀਟਿਵ ਪਾਇਆ ਗਿਆ ਸੀ। ਅਧਿਕਾਰੀਆਂ ਅਨੁਸਾਰ ਹੁਣ ਤਕ ਕਰੀਬ 500 ਲੋਕਾਂ ਦੇ 715 ਟੈਸਟ ਕਰਵਾਏ ਗਏ ਹਨ, ਜਦਕਿ ਹੁਣ ਤਕ 5 ਲੋਕ ਇਸਲਈ ਪਾਜੀਟਿਵ ਪਾਏ ਗਏ ਹਨ।