19.83C Vancouver 19.83C VancouverJun 23, 2020 10:37 PM -
ਵੁਆਵੇ ਦੀ ਐਗਜ਼ੀਕਿਊਟਿਵ ਮੰਗ ਵਾਂਜੋ ਦੇ ਅਮਰੀਕਾ ਨੂੰ ਹਵਾਲਗੀ ਦੇ ਮਾਮਲੇ ਨਾਲ ਜੁੜੀਆਂ ਫਾਈਨਲ ਦਲੀਲਾਂ ਦੀ ਸੁਣਵਾਈ ਅਗਲੇ ਸਾਲ ਦੀ ਸ਼ੁਰੂਆਤ ਵਿੱਚ ਹੋਵੇਗੀ।
ਕਰਾਊਨ ਅਤੇ ਮੰਗ ਵਾਂਜੋ ਦੀ ਡਿਫੈਂਸ ਟੀਮ ਵੱਲੋਂ ਪੇਸ਼ ਕੀਤੀ ਗਈ ਸਮੇਂਸੀਮਾ ਨੂੰ ਬੀ.ਸੀ. ਸੁਪ੍ਰੀਮ ਕੋਰਟ ਨੇ ਮਨਜ਼ੂਰੀ ਦੇ ਦਿੱਤੀ ਹੈ।
ਐਸੋਸੀਏਟ ਚੀਫ਼ ਜਸਟਿਸ ਹੈਦਰ ਹੋਮਜ਼ ਨੂੰ ਲਿਖੀ ਇੱਕ ਚਿੱਠੀ ਵਿੱਚ, ਕਰਾਊਨ ਵਕੀਲ ਗਿਬ ਕਾਰਸਲੀ ਨੇ ਕਿਹਾ ਕਿ ਸਮੇਂਸੀਮਾ ਦਾ ਟੀਚਾ ਹੈ ਕਿ ਗਵਾਹਾਂ ਅਤੇ ਸਬੂਤਾਂ ਨਾਲ ਜੁੜੇ ਅਹਿਮ ਮਸਲਿਆਂ ਨੂੰ ਇਸ ਗਰਮੀ ਅਤੇ ਪੱਤਝੜ ਦੀ ਰੁੱਤ ਤੱਕ ਹੱਲ ਕਰ ਲਿਆ ਜਾਵੇ।
ਇਸ ਮਾਮਲੇ 'ਚ 17 ਅਗਸਤ ਤੋਂ ਅੱਗੇ ਦੀ ਸੁਣਵਾਈ ਹੋਣ ਜਾ ਰਹੀ ਹੈ, ਜਦ ਕੋਰਟ 'ਚ 5 ਦਿਨ ਤੱਕ ਮਾਮਲੇ ਨਾਲ ਜੁੜੇ, ਪ੍ਰੀਵਲਿਜ ਕਲੇਮਜ਼ ਨਾਲ ਜੁੜੀਆਂ ਦਲੀਲਾਂ ਦੀ ਸੁਣਵਾਈ ਹੋਵੇਗੀ।
ਯਾਦ ਰਹੇ ਬੀਤੇ ਹਫ਼ਤੇ ਵੁਆਵੇ ਐਗਜ਼ੀਕਿਊਟਿਵ ਮੰਗ ਵਾਂਜੋ ਦੇ ਮਾਮਲੇ ਦੀ ਸੁਣਵਾਈ ਕਰ ਰਹੇ ਬੀ.ਸੀ. ਸੁਪ੍ਰੀਮ ਕੋਰਟ ਜੱਜ ਨੇ ਕਾਰਵਾਈਆਂ ਨੂੰ ਲੱਗ ਰਹੇ ਸਮੇਂ ਨੂੰ ਲੈ ਕੇ ਫਿਕਰ ਜ਼ਾਹਿਰ ਕੀਤਾ ਸੀ।
ਬੀਤੇ ਹਫ਼ਤੇ ਦੀ 'ਕੇਸ ਮੈਨੇਜਮੈਂਟ ਕਾਨਫਰੰਸ' ਦੌਰਾਨ ਐਸੋਸੀਏਟ ਚੀਫ਼ ਜਸਟਿਸ, ਹੈਦਰ ਹੋਮਜ਼ ਨੇ ਕਿਹਾ ਸੀ ਕਿ ਕਰਾਊਨ ਪ੍ਰਾਸੀਕਿਊਟਰ ਅਤੇ ਮੰਗ ਦੇ ਕਾਉਂਸਲ ਵੱਲੋਂ ਦਿੱਤੀ ਗਈ ਸਮਾਂਸੂਚੀ ਅਨੁਸਾਰ, ਇਹ ਮਾਮਲਾ ਅਗਲੀ ਬਸੰਤ ਰੁੱਤ ਤੱਕ ਖਿੱਚ ਸਕਦਾ ਹੈ।
ਜੱਜ ਨੇ ਕਿਹਾ ਸੀ ਕਿ ਅਦਾਲਤ ਇਸ ਤੋਂ ਵਧੇਰੇ ਤੇਜ਼ ਕੰਮ ਕਰ ਸਕਦੀ ਹੈ।
ਮੰਗ ਵਾਂਜੋ, ਅਮਰੀਕਾ 'ਚ ਧੋਖਾਧੜੀ ਦੇ ਮਾਮਲੇ 'ਚ ਵਾਂਟਿਡ ਹਨ। ਪਰ ਮੰਗ ਵਾਂਜੋ ਅਤੇ ਵੁਆਵੇ ਨੇ ਇਲਜ਼ਾਮਾਂ ਨੂੰ ਗਲਤ ਦੱਸਿਆ ਹੈ ਅਤੇ ਲਗਾਤਾਰ ਮੰਗ ਉਠਾਈ ਹੈ ਕਿ ਇਸ ਹਵਾਲਗੀ ਦੇ ਮਾਮਲੇ ਨੂੰ ਰੱਦ ਕੀਤਾ ਜਾਵੇ।
