16.84C Vancouver 16.84C VancouverAug 28, 2025 10:27 PM - Pervez Sandhu - Connect Newsroom
28 ਸਾਲਾ ਨਿਕੋਲਸ ਖਾਬਰਾ ਦਾ ਸਾਲ 2017 'ਚ 23 ਅਕਤੂਬਰ ਨੂੰ ਸਰੀ 'ਚ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ ਗਿਆ ਸੀ।
ਮਈ 2018 'ਚ ਮਾਮਲੇ ਸੰਬੰਧੀ ਕੰਬਾਈਂਡ ਫੋਰਸਿਸ ਸਪੈਸ਼ਨ ਐਨਫੋਰਸਮੈਂਟ ਯੂਨਿਟ ਨੇ ਇੰਟੈਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ ਜਾਣੀ ਕਿ ਆਈ.ਹਿਟ ਨਾਲ ਮਿਲ ਕੇ ਜਾਂਚ ਸ਼ੁਰੂ ਕੀਤੀ ਸੀ, ਜਿਸ ਦੌਰਾਨ ਕਈ ਸ਼ੱਕੀ ਜਾਂਚ ਦੇ ਦਾਇਰੇ 'ਚ ਸਨ ਅਤੇ ਇਸ 'ਚ ਬਰੈਂਡਨ ਟੈਕਸੀਰਾ ਵੀ ਸ਼ਾਮਿਲ ਸੀ।
ਇਸ ਮਾਮਲੇ 'ਚ ਹੁਣ ਬ੍ਰੈਂਡਨ ਟੈਕਸੀਰਾ ਨਾਮ ਦੇ ਵਿਅਕਤੀ ਨੂੰ ਫਰਸਟ ਡਿਗਰੀ ਕਤਲ ਦਾ ਦੋਸ਼ੀ ਪਾਇਆ ਗਿਆ ਹੈ।
ਮਾਮਲੇ ਸੰਬੰਧੀ ਕਨੈਕਟ ਐਫ.ਐਮ. ਨੇ ਸੀ.ਐਫ.ਐਸ.ਈ.ਯੂ. ਦੀ ਬੁਲਾਰੀ ਕੌਰਪੋਰਲ ਸਰਬਜੀਤ ਸੰਘਾ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਟੈਕਸੀਰਾ ਖਿਲਾਫ ਚਾਰਜ ਹਾਸਿਲ ਕਰਨਾ ਆਸਾਨ ਪ੍ਰੀਕਿਰਿਆ ਨਹੀਂ ਸੀ।
ਕੌਰਪੋਰਲ ਸੰਘਾ ਨੇ ਕਿਹਾ ਕਿ ਸਾਲ 2018 'ਚ ਟੈਕਸੀਰਾ ਦੀ ਗ੍ਰਿਫਤਾਰੀ ਦੀ ਕੋਸ਼ਿਸ਼ ਹੋਈ ਸੀ ਪਰ ਉਹ ਪੁਲਿਸ ਨੂੰ ਚਕਮਾ ਦੇ ਕੇ ਰਫੂਚੱਕਰ ਹੋ ਗਿਆ ਸੀ।
ਇਸ ਤੋਂ ਬਾਅਦ ਸਾਲ 2019 'ਚ ਦਿਸੰਬਰ ਵਿੱਚ ਕੈਲੀਫੋਰਨੀਆ 'ਚ ਟੈਕਸੀਰਾ ਨੂੰ ਗ੍ਰਿਫਤਾਰ ਕੀਤਾ ਗਿਆ ਅਤੇ ਫਿਰ ਸਾਲ 2020 'ਚ ਉਸ ਨੂੰ ਕੈਨੇਡਾ ਐਕਸਟ੍ਰਾਡਾਈਟ ਕੀਤਾ ਗਿਆ।
ਕੌਰਪੋਰਲ ਸੰਘਾ ਨੇ ਦੱਸਿਆ, "ਤਿੰਨ ਦਿਨ ਪਹਿਲਾਂ 25 ਅਗਸਤ ਨੂੰ ਟੈਕਸੀਰਾ ਨੂੰ ਨਿਕੋਲਸ ਖਾਬਰਾ ਦੇ ਕਤਲ ਦੇ ਮਾਮਲੇ 'ਚ ਫਰਸਟ ਡਿਗਰੀ ਕਤਲ, ਅਟੈਂਪਟਿਡ ਮਰਡਰ ਅਤੇ ਕਤਲ ਦੇ ਇਰਾਦੇ ਨਾਲ ਬੰਦੂਕ ਦੀ ਵਰਤੋਂ ਦਾ ਦੋਸ਼ੀ ਪਾਇਆ ਗਿਆ।"
ਕੌਰਪੋਰਲ ਸੰਘਾ ਦਾ ਕਹਿਣਾ ਸੀ, "ਫਿਲਹਾਲ ਮਾਮਲੇ 'ਚ ਸਜਾ ਸੁਣਾਈ ਜਾਣਾ ਬਾਕੀ ਹੈ, ਅਤੇ ਇਹ ਪ੍ਰੀਕਿਰਿਆ ਪੂਰੀ ਹੋਣ ਤੋਂ ਬਾਅਦ ਵਿਸਤਾਰ ਨਾਲ ਮਾਮਲੇ ਸੰਬੰਧੀ ਹੋਰ ਡਿਟੇਲਸ ਸਾਂਝੀਆਂ ਕਰਨ ਲਈ ਇੱਕ ਪ੍ਰੈਸ ਕਾਨਫਰੰਸ ਦਾ ਪ੍ਰਬੰਧ ਕੀਤਾ ਜਾਵੇਗਾ।"
ਉਨ੍ਹਾਂ ਆਖਿਆ ਕਿ ਟੈਕਸੀਰਾ ਦਾ ਹਿੰਸਕ ਪਿਛੋਕੜ ਹੋਣ ਕਾਰਨ ਏਜੈਂਸੀ ਆਪਣੀ ਜਾਂਚ ਅਤੇ ਇਸ ਦੇ ਨਤੀਜੇ ਤੋਂ ਸੰਤੁਸ਼ਟ ਹੈ।
