11.92C Vancouver 11.92C VancouverJan 29, 2024 4:07 PM - The Canadian Press
ਕੈਨੇਡੀਅਨ ਰਾਜਨੀਤੀ ਵਿਚ ਵਿਦੇਸ਼ੀ ਦਖਲਅੰਦਾਜ਼ੀ ਬਾਰੇ ਲੰਬੇ ਸਮੇਂ ਤੋਂ ਉਡੀਕੀ ਜਾ ਰਹੀ ਸੁਤੰਤਰ ਜਾਂਚ ਲਈ ਸੋਮਵਾਰ ਤੋਂ ਜਨਤਕ ਸੁਣਵਾਈ ਸ਼ੁਰੂ ਹੋ ਗਈ ਹੈ।
ਪਿਛਲੀਆਂ ਦੋ ਫੈਡਰਲ ਇਲੈਕਸ਼ਨਸ ਵਿਚ ਚੀਨ, ਰੂਸ ਅਤੇ ਭਾਰਤ ਨੇ ਕਿਸ ਹੱਦ ਤੱਕ ਦਖਲਅੰਦਾਜ਼ੀ ਕੀਤੀ ਜਾਂ ਦਖਲ ਦੇਣ ਦੀ ਕੋਸ਼ਿਸ਼ ਕੀਤੀ ਇਸ ਬਾਰੇ ਜਸਟਿਸ ਮੈਰੀ-ਜੋਸੀ ਹੋਗ ਦੇ ਸੁਤੰਤਰ ਕਮਿਸ਼ਨ ਦੀ ਅਗਵਾਈ ਹੇਠ 29 ਜਨਵਰੀ ਤੋਂ ਪੰਜ ਦਿਨ ਜਨਤਕ ਸੁਣਵਾਈ ਹੋਵੇਗੀ।
ਸ਼ੁਰੂਆਤੀ ਸੁਣਵਾਈ ਇਸ ਗੱਲ ’ਤੇ ਕੇਂਦ੍ਰਿਤ ਹੋਵੇਗੀ ਕਿ ਸਰਕਾਰ ਜੋ ਕੁਝ ਜਾਣਦੀ ਹੈ ਉਸ ਨੂੰ ਰਾਸ਼ਟਰੀ ਸੁਰੱਖਿਆ ਨੂੰ ਨੁਕਸਾਨ ਪਹੁੰਚਾਏ ਬਿਨਾਂ ਜ਼ਿਆਦਾ ਤੋਂ ਜ਼ਿਆਦਾ ਜਨਤਕ ਕਿਵੇਂ ਕਰਨਾ ਹੈ।
ਕਿਊਬੈਕ ਦੀ ਕਾਰਟ ਆਫ ਅਪੀਲ ਦੀ ਜੱਜ ਹੋਗ ਨੂੰ ਪਿਛਲੇ ਸਾਲ ਸੁਤੰਤਰ ਜਾਂਚ ਕਮਿਸ਼ਨਰ ਨਿਯੁਕਤ ਕੀਤਾ ਗਿਆ ਸੀ, ਪਹਿਲਾਂ ਇਸ ਦਾ ਫੋਕਸ 2019 ਅਤੇ 2021 ਦੀਆਂ ਕੈਨੇਡੀਅਨ ਫੈਡਰਲ ਚੋਣਾਂ ਵਿਚ ਚੀਨ, ਰੂਸ ਦੀ ਦਖਲਅੰਦਾਜ਼ੀ ਦੀ ਜਾਂਚ ਕਰਨਾ ਸੀ ਪਰ ਐਨ.ਡੀ.ਪੀ. ਲੀਡਰ ਜਗਮੀਤ ਸਿੰਘ ਨੇ ਇਸ ਵਿਚ ਭਾਰਤ ਨੂੰ ਵੀ ਸ਼ਾਮਲ ਕਰਨ ਲਈ ਜ਼ੋਰ ਪਾਇਆ ਜਿਸ ਬਾਰੇ ਪਿਛਲੀ ਦਿਨੀਂ ਜਾਂਚ ਕਮਿਸ਼ਨ ਨੇ ਟਰੂਡੋ ਸਰਕਾਰ ਕੋਲੋਂ ਇਨ੍ਹਾਂ ਦੋਸ਼ਾਂ ਨਾਲ ਸਬੰਧਤ ਦਸਤਾਵੇਜ਼ ਮੰਗੇ ਸਨ।
ਜੱਜ ਹੋਗ ਨੂੰ ਸੌਂਪੀ ਗਈ ਜਿੰਮੇਵਾਰੀ ਤਹਿਤ ਉਨ੍ਹਾਂ ਨੂੰ ਪਿਛਲੀਆਂ ਇਲੈਕਸ਼ਨਸ ਵਿਚ ਕਿਸ ਹੱਦ ਤੱਕ ਬਾਹਰੀ ਦਖਲਅੰਦਾਜ਼ੀ ਹੋਈ ਸੀ- ਇਸ ਦੀ ਪਹਿਲੀ ਰਿਪੋਰਟ ਮਈ ਵਿਚ ਦੇਣੀ ਹੋਵੇਗੀ ਅਤੇ ਫਾਈਨਲ ਰਿਪੋਰਟ ਦਸੰਬਰ ਤੱਕ ਪੂਰੀ ਕਰਨੀ ਹੋਵੇਗੀ।
