ਐਲਬਰਟਾ ਹੈਲਥ ਕੇਅਰ ਦੀ ਸਾਬਕਾ ਮੁਖੀ ਨੇ ਬਰਖਾਸਤਗੀ ਸਬੰਧੀ ਜਾਂਚ ਦਾ ਫੈਸਲਾ ਜਲਦੀ ਕਰਨ ਦੀ ਕੀਤੀ ਅਪੀਲ

ਐਲਬਰਟਾ ਹੈਲਥ ਕੇਅਰ ਦੀ ਸਾਬਕਾ ਮੁਖੀ ਅਥਾਨਾ ਮੈਂਟਜ਼ੇਲੋਪੌਲੋਸ ਨੇ ਉਸ ਨੂੰ ਗਲਤ ਤਰੀਕੇ ਨਾਲ ਨੌਕਰੀ ਤੋਂ ਬਰਖਾਸਤ ਕਰਨ ਦੇ ਮਾਮਲੇ ਦੀ ਜਾਂਚ ਦਾ ਫੈਸਲਾ ਜਲਦੀ ਕਰਨ ਦੀ ਅਪੀਲ ਕੀਤੀ ਹੈ। ਉਸ ਨੇ ਜੱਜ ਨੂੰ ਅਪੀਲ ਕੀਤੀ ਕਿ ਸੰਖੇਪ ਜਜਮੈਂਟ ਦਿੱਤੀ ਜਾਵੇ, ਜਿਸ ਨਾਲ ਉਹ ਟ੍ਰਾਇਲ ਲਈ ਜਾਣ ਤੋਂ ਬਚ ਸਕਦੀ ਹੈ।

ਮੈਂਟਜ਼ੇਲੋਪੌਲੋਸ ਨੇ ਸੂਬੇ ਦੀ ਸਿਹਤ ਮੰਤਰੀ ਖਿਲਾਫ ਜਨਵਰੀ ਵਿਚ ਮੁਕੱਦਮਾ ਦਾਇਰ ਕੀਤਾ ਸੀ ਅਤੇ ਕਿਹਾ ਸੀ ਕਿ ਉਹ ਹੈਲਥ ਸਰਵਸਿਸ ਦੇ ਕਈ ਮਿਲੀਅਨ ਡੌਲਰਜ਼ ਦੇ ਇਕਰਾਰਨਾਮੇ ਸਬੰਧੀ ਜਾਂਚ ਕਰ ਰਹੀ ਸੀ, ਜਿਸ ਲਈ ਉਸ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ। ਇਸ ਮਾਮਲੇ ਦੀ ਜਾਂਚ ਪੁਲਿਸ,ਸੂਬੇ ਦੇ ਆਡੀਟਰ ਜਨਰਲ ਅਤੇ ਸਰਕਾਰ ਵਲੋਂ ਹਾਇਰ ਕੀਤੇ ਮੈਨੀਟੋਬਾ ਦੇ ਸਾਬਕਾ ਜੱਜ ਵਲੋਂ ਕੀਤੀ ਜਾ ਰਹੀ ਹੈ।

ਮੈਂਟਜ਼ੇਲੋਪੌਲੋਸ ਨੇ ਇਸ ਹਫਤੇ ਅਦਾਲਤ ਵਿਚ ਅਰਜ਼ੀ ਦਾਇਰ ਕੀਤੀ ਅਤੇ ਸਿਹਤ ਮੰਤਰੀ 'ਤੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਉਨ੍ਹਾਂ ਏਐਚਐਸ ਬੋਰਡ ਵਿਚੋਂ ਉਸ ਨੂੰ ਬਾਹਰ ਕਰਨ ਲਈ ਮੀਟਿੰਗ ਕੀਤੀ ਸੀ ਪਰ ਕੁਝ ਡਾਇਰੈਕਟਰਜ਼ ਨੇ ਮਨ੍ਹਾ ਕਰ ਦਿੱਤਾ ਸੀ। ਮੈਂਟਜ਼ੇਲੋਪੌਲੋਸ ਨੇ ਇਸ ਸਭ ਵਿਚ ਉਸ ਸਮੇਂ ਦੇ ਉਪ ਸਿਹਤ ਮੰਤਰੀ ਐਂਡਰੀ ਟ੍ਰੈਂਬਲੇ ਦੇ ਸ਼ਾਮਲ ਹੋਣ ਦਾ ਵੀ ਦੋਸ਼ ਲਾਇਆ ਹੈ।ਮੈਂਟਜ਼ੇਲੋਪੌਲੋਸ ਦੇ ਨੌਕਰੀ ਵਿਚੋਂ ਕੱਢੇ ਜਾਣ ਮਗਰੋਂ ਸਾਰੀ ਬੋਰਡ ਨੂੰ ਖਤਮ ਕਰ ਦਿੱਤਾ ਗਿਆ ਸੀ।