ਰੇਚਲ ਨੌਟਲੀ ਦੇਣਗੇ ਐੱਮ.ਐੱਲ.ਏ. ਦੇ ਅਹੁਦੇ ਤੋਂ ਅਸਤੀਫ਼ਾ

ਐਲਬਰਟਾ ਦੀ ਸਾਬਕਾ ਪ੍ਰੀਮੀਅਰ ਰੇਚਲ ਨੌਟਲੀ ਜਲਦ ਹੀ ਐੱਮ.ਐੱਲ.ਏ. ਵਜੋਂ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਣ ਜਾ ਰਹੀ ਹੈ। ਉਹ ਐਡਮਿੰਟਨ ਸਟਰੈਥਕੋਨਾ ਤੋਂ ਐੱਮ.ਐੱਲ.ਏ. ਸਨ ਅਤੇ 30 ਦਸੰਬਰ ਨੂੰ ਇਸ ਨੂੰ ਛੱਡ ਦੇਣਗੇ। ਉਹ ਸੂਬੇ ਦੀ 17ਵੀਂ ਪ੍ਰੀਮੀਅਰ ਵਜੋਂ ਅਤੇ ਨਿਊ ਡੈਮੋਕ੍ਰੇਟਿਕ ਪਾਰਟੀ ਦੀ ਸਾਬਕਾ ਲੀਡਰ ਵਜੋਂ ਸੇਵਾਵਾਂ ਨਿਭਾਅ ਚੁੱਕੀ ਹੈ।

ਉਨ੍ਹਾਂ ਸੋਸ਼ਲ ਮੀਡੀਆ ’ਤੇ ਦੱਸਿਆ ਕਿ ਉਨ੍ਹਾਂ ਨੂੰ ਜੋ ਮਾਣ-ਸਨਮਾਨ 17 ਸਾਲਾਂ ਤੋਂ ਮਿਲਿਆ ਹੈ, ਉਸ ਨੂੰ ਉਹ ਭੁਲਾ ਨਹੀਂ ਸਕਦੇ। ਐਲਬਰਟਾ ਐੱਨ.ਡੀ.ਪੀ ਦੇ ਮੌਜੂਦਾ ਲੀਡਰ ਨਾਹੀਦ ਨੈਨਸ਼ੀ ਨੇ ਪਿਛਲੇ ਹਫਤੇ ਕਿਹਾ ਸੀ ਕਿ ਜੇਕਰ ਉਨ੍ਹਾਂ ਨੂੰ ਮੌਕਾ ਮਿਲਿਆ ਤਾਂ ਉਹ ਐਡਮਿੰਟਨ ਜਾਂ ਕੈਲਗਰੀ ਤੋਂ ਐੱਮ.ਐੱਲ.ਏ. ਲਈ ਚੋਣ ਲੜਨਗੇ, ਇਸ ਲਈ ਮੰਨਿਆ ਜਾ ਰਿਹਾ ਹੈ ਕਿ ਉਹ ਹੁਣ ਇਸ ਇਲਾਕੇ ਤੋਂ ਚੋਣ ਲੜ ਸਕਦੇ ਹਨ।

ਨੌਟਲੀ ਨੇ ਅਧਿਕਾਰਤ ਜੂਨ ਮਹੀਨੇ ਪਾਰਟੀ ਲੀਡਰ ਵਜੋਂ ਅਸਤੀਫਾ ਦੇ ਦਿੱਤਾ ਸੀ ਜਦਕਿ ਇਸ ਦੀ ਘੋਸ਼ਣਾ ਉਨ੍ਹਾਂ ਨੇ ਜਨਵਰੀ ਵਿਚ ਕੀਤੀ ਸੀ। ਗੌਰਤਲਬ ਹੈ ਕਿ 2015 ਵਿਚ ਉਨ੍ਹਾਂ ਦੀ ਅਗਵਾਈ ਵਿਚ ਐਲਬਰਟਾ ਐੱਨ.ਡੀ.ਪੀ. ਨੇ ਬਹੁਮਤ ਵਾਲੀ ਸਰਕਾਰ ਬਣਾਈ ਸੀ।