13.65C Vancouver 13.65C VancouverFeb 4, 2026 4:55 PM - Connect Newsroom - Ramandeep Kaur with files from The Canadian Press
ਬੀ.ਸੀ. ਸੁਪਰੀਮ ਕੋਰਟ ਨੇ ਕੈਮਲੂਪਸ ਦੇ ਇੱਕ ਸਾਬਕਾ ਵਕੀਲ ਰੋਜੇਲਿਓ ਬਾਗਾਬੁਯੋ ਨੂੰ ਆਪਣੇ ਹੀ ਕਲਾਈਂਟ ਦੇ ਕਤਲ ਮਾਮਲੇ ਵਿਚ ਫਰਸਟ-ਡਿਗਰੀ ਮਰਡਰ ਦਾ ਦੋਸ਼ੀ ਪਾਇਆ ਹੈ। ਜੱਜ ਕੈਥਲੀਨ ਕੇਰ ਨੇ ਮੰਗਲਵਾਰ ਨੂੰ ਸੁਣਾਏ ਫੈਸਲੇ ਵਿਚ ਕਿਹਾ ਕਿ ਇਹ ਕਤਲ ਕੋਈ ਅਚਾਨਕ ਵਾਪਰੀ ਘਟਨਾ ਨਹੀਂ ਸੀ ਸਗੋਂ ਇੱਕ ਸੋਚੀ-ਸਮਝੀ ਸਾਜ਼ਿਸ਼ ਸੀ।
ਜਾਂਚ ਵਿਚ ਸਾਹਮਣੇ ਆਇਆ ਕਿ ਬਾਗਾਬੁਯੋ ਨੇ ਆਪਣੇ ਕਲਾਈਂਟ ਮੋਹਦ ਅਬਦੁੱਲਾ ਜੋ ਕਿ ਥੌਮਸਨ ਰਿਵਰਜ਼ ਯੂਨੀਵਰਸਿਟੀ ਵਿਚ ਲੈਕਚਰਾਰ ਸਨ ਦੇ ਲਗਭਗ $800,000 ਹੜੱਪ ਲਏ ਸਨ। ਜਦੋਂ ਅਬਦੁੱਲਾ ਨੇ ਆਪਣੇ ਪੈਸੇ ਵਾਪਸ ਮੰਗਣੇ ਸ਼ੁਰੂ ਕੀਤੇ ਤਾਂ ਫੜੇ ਜਾਣ ਦੇ ਡਰੋਂ ਵਕੀਲ ਨੇ ਉਸ ਨੂੰ ਮੌਤ ਦੇ ਘਾਟ ਉਤਾਰ ਦਿੱਤਾ। ਅਬਦੁੱਲਾ ਆਪਣੀ ਪਤਨੀ ਤੋਂ ਵੱਖ ਹੋ ਰਿਹਾ ਸੀ ਅਤੇ ਆਪਣੇ ਪੈਸੇ ਨੂੰ ਤਲਾਕ ਦੇ ਕੇਸ ਤੋਂ ਬਚਾਉਣ ਲਈ ਉਸ ਨੇ ਵੱਡੀ ਰਕਮ ਵਕੀਲ ਦੇ ਹਵਾਲੇ ਕੀਤੀ ਸੀ।
ਮਾਰਚ 2022 ਵਿਚ ਬਾਗਾਬੁਯੋ ਨੇ ਇਸ ਕਲਾਈਂਟ ਨੂੰ ਆਪਣੇ ਦਫ਼ਤਰ ਬੁਲਾਇਆ ਅਤੇ ਉੱਥੇ ਉਸ ਦਾ ਚਾਕੂ ਮਾਰ ਕੇ ਕਤਲ ਕਰ ਦਿੱਤਾ। ਜਿਸ ਤੋਂ ਬਾਅਦ ਲਾਸ਼ ਨੂੰ ਪਲਾਸਟਿਕ ਸ਼ੀਟ ਵਿਚ ਪਾ ਕੇ ਖੁਰਦ-ਬੁਰਦ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ।
ਬਾਗਾਬੁਯੋ ਨੂੰ ਇਸ ਕਤਲ ਲਈ ਉਮਰ ਕੈਦ ਦੀ ਲਾਜ਼ਮੀ ਸਜ਼ਾ ਸੁਣਾਈ ਗਈ ਹੈ, ਜਿਸ ਤਹਿਤ ਉਹ 25 ਸਾਲਾਂ ਤੱਕ ਪੈਰੋਲ ਲਈ ਅਪਲਾਈ ਨਹੀਂ ਕਰ ਸਕੇਗਾ। ਬੀ.ਸੀ. ਲਾਅ ਸੋਸਾਇਟੀ ਨੇ ਉਸ ਦਾ ਵਕਾਲਤ ਦਾ ਲਾਇਸੈਂਸ ਪਹਿਲਾਂ ਹੀ ਰੱਦ ਕਰ ਦਿੱਤਾ ਸੀ।
